پنجابی کے لیجنڈری شاعر، گیت نگاراحمد راہی سے ایک یادگار ملاقات

ہوش سنبھالا تو پنجابی کے صوفی شعراے علاوہ مختلف بک اسٹالوں پر پنجابی کی چار کتابیں ہی نظر آئیں ۔ پروفیسر موہن سنگھ کی ‘ ساوے پتر’ امرتا پریتم کی ‘نویں رُت’ درشن سنگھ آوارہ کی ‘بغاوت’ اور احمد راہی کی ‘ترنجن’ ۔ گوکہ احمد راہی کے نام سے ہم اُن کے فلمی گانوں کی وجہ سے ہوش سنبھالتے ہی واقف ہو چکے تھے اور فلم ’بنجارن‘ کا لکھا ہوا گیت

دِل کے افسانے نگاہوں کی زُباں تک پہنچے

بات چل نکلی ہے اب دیکھیں کہاں تک پہنچے

ہمارا پسندیدہ ترین گیت تھا۔ جب پنجابی لکھنے کی طرف مزید متوجہ ہوئے تو یہ شوق بھی پیدا ہوا کہ پنجابی کے اہم لکھنے والوں سے ملا جائے، مگر جہاں کے ہم رہنے والے تھے وہ مرکزی شہروں سے تو کیا خود اپنے شہر (اٹک) سے بھی کافی دور تھا۔
وقت اپنی لاٹھی سے ہانکتے ہوئے ہمیں کراچی لایا تو یہ فائدہ ہوا کہ پنجاب کے جن علاقوں میں وہاں رہتے ہوئے بھی نہ جا سکے وہاں جانے کا بھی اتفاق ہوا اور وہاں رہنے والے جن اہم لکھاریوں سے ملاقات نہ ہو سکی اُن سے بھی سے مل لیے، لیکن اُس سے پہلے احمد راہی کی پنجابی شاعری سے اچھی طرح واقف ہو چکے تھے ، جس کا ذریعہ اُس دور میں بننے والی پنجابی فلمیں تھیں اور احمد راہی کے لکھے ہوئے گیت ان فلموں کا اہم جزو تھے ۔ اُس زمانے میں سینما پر نمائش کے لیے پیش ہونے والی فلموں کے اشتہارات اخبارات کے رنگین صفحات پر اتنے پرکشش انداز سے چھاپے جاتے کہ فلم بینوں کی توجہ کو اپنی گرفت میں لے لیتے۔

ہمیں یاد پڑتا ہے کہ انیس سو ستر میں جب فلم ‘ہیر رانجھا ’ مکمل ہونے کے بعد نمائش کے لیے پیش ہوئی تو اخبارات میں اس کے بڑے بڑے اشتہارات نے ہمارے فلم بینی کے شوق کو بھی مزید ہوا دی ۔ اس وقت ہم جس مڈل سکول میں زیر تعلیم تھے وہاں باقاعدگی سے آنے والے اردو کے ایک اخبار میں ‘ہیر رانجھا ’ کا اشتہار پورے صفحے پر چھپا تھا اور اس اشتہار میں گیت کار کے طور پر احمد راہی کا نام انتہائی نمایاں تھا ۔ فلم میں تیرہ گیت شامل تھے جن میں وارث شاہ کے کلام کے علاوہ احمد راہی کے لکھے ہوئے بارہ گیت شامل تھے ۔ اس زمانے میں ہماری عمر صرف دس سال تھی اور تب تک ہم نے دو چار فلمیں ہی دیکھی تھیں، مگر ہیررانجھا دیکھنے کی کوئی بھی سبیل نہ بن سکی ۔

کچھ عرصے بعد جب راول پنڈی جانا ہوا تو وہاں کے حیدر روڈ پر واقع ایک بک اسٹال پر ان چار کتابوں پر نظر پڑی جن کا ہم اوپر ذکر کر چکے ہیں ۔ چونکہ احمد راہی کا نام ہیر رانجھا کے گیتوں اور کچھ دوسری فلموں کے گیتوں کی وجہ سے پہلے سے ہی ہمارے ذہن میں محفوظ تھا لہذا اُن کی کتاب ‘ ترنجن’ خریدی اور ایک گھنٹے میں اسے پڑھ بھی لیا۔ سلسلہ مزید آگے بڑھا تو ہم لاہور سے چھپنے والے پنجابی رسالے ’ لہراں ‘کی سیڑھیاں پھلانگتے ہوئے پنجابی کے بہت سارے لکھاریوں سے متعارف ہوئے ، لیکن احمد راہی کی کسی اور کتاب کا کچھ پتا نہ چل سکا ۔ پتا بھی کیسے چلتا کہ اس کے بعد کافی عرصے تک اُن کی کوئی کتاب چھپ ہی نہ سکی ۔

طویل عرصے بعد نوے کی دہائی میں لاہور جانا ہوا تو احمد راہی صاحب کا فون نمبر لیا ان سے اپنا تعارف کروایا اور اس خواہش کا اظہار کیا کہ آپ سے ملنا بھی ہے اور انٹرویو بھی کرنا ہے ۔ انھوں نے بہت محبت کے ساتھ ملاقات کا وقت بھی دے دیا اور انٹرویو کا وعدہ بھی کر لیا ۔ طے شدہ مقام پر اُن سے ملاقات سے پہلے ہم اور پنجابی ادب کے منفرد کہانی کار ادیب اور دانش ور الیاس گھمن ان کے پاس پہنچ گئے ۔ ہم نے اُن کا طویل انٹرویو کیا جو دوستوں کے ساتھ کسی وقت ضرور شیئر کیا جائے گا ۔ اس ملاقات میں انھوں نے ہماری ڈائری پر اپنے ہاتھ سے جو چھوٹی سی نظم لکھی تھی وہ ہم یہاں درج کرنا زیادہ مناسب سمجھتے ہیں ۔

پل پل چھلاں کھان سمندر

بل بل ڈُلہدے نیر

کس بیلے دی میں البیلی

کس رانجھے دی ہیر

—♦—