Imran Khan - Daily Lalkaar

ظالم کو جو ظالم نہیں کہے گا…نہیں رہے گا، نہیں رہے گا! – تحریر: ناصر منصور

للکار نیوز — Sun, 04 Feb 2024 18:35:46 +0000

انسانوں کے شُد نجی و مذہبی معاملات کو کھینچ تان کر قانون کی گرفت میں لا کر انتقام کا نشانہ بنانے نے غیر مرئی قوتوں کو ایک ایسا جواز فراہم کیا جسے وہ ہر بار زیادہ زہر آلودہ انداز میں ناپسندیدہ افراد کے خلاف استعمال کریں گے۔ عمران خان اور ان کی اہلیہ کے خلاف نکاح اور عدت کیس کا فیصلہ عدالتی تاریخ پر ایک اور بدنما داغ ہے جو دھوئے نہ دُھلے گا۔ مرئی مخلوق کسی بھی سیاسی حریف کو بے داغ نہیں رہنے دینا چاہتی۔

عمران خان کے طرز سیاست اور جنرلوں کے لیے ہتھیار کے طور استعمال کے لیے تیار رہنے پر تنقید کا قطعی یہ مطلب نہیں ہونا چاہیے کہ اس نے جو کچھ کیا اس کے خلاف ہونے والے اسی طرح کے ریاستی دباؤ اور ریشہ دوانیوں کی حمایت کی جائے۔

جیسا کرنا ویسا بھرنا پر مبنی ”سیاسی کرما“ سی خوش فہمی ایک نہ ختم ہونے والے سیاسی انتقام کو جنم دے گی جو جرم کے اصل منبع کو ہی ہر لحظہ تقویت پہنچانے گی۔

سیاست کے میدان میں ہمارے ہاں چور کو چوری کی سزا اس لیے نہیں دی جاتی کہ وہ چور ہے بل کہ اسے اس وقت ملعون و مطعون ٹھہرایا جاتا ہے جب وہ طاقتوروں کی ضرورت نہیں رہتا یا پھر ان کے دائرہ اختیار کو چیلنج کرتا ہے۔

ماضی قریب میں جس طرح بھٹو اورنواز شریف کو سیاست سے باہر کرنے کے لئے ریاستی طاقت کا استعمال کیا گیا آج وہی کچھ عمران خان کے ساتھ ہو رہا ہے۔ جنہوں نے کل تک اس طرح کے طرزِ عمل کی حمایت کی وہ بھی غلط تھے اور جو آج جاری اس دھونس و دھاندلی پر مریضانہ مسرت کا اظہار کر رہے ہیں وہ بھی جلد ہی اپنے رویے پر نالاں ہوں گے۔

آئین ، قانون یا پھر پارلیمنٹ اور عدالت نے گر خود کو لوگوں کے بیڈ روم کی چادریں سونگھنے اور عقائد اور سیاسی رجحانات جانچنے پر مامور کیا ہوا ہے تو اس کے بھیانک نتائج بھی ہمارے سامنے ہیں۔

آپ نے احمدیوں کو مل کر نفرت کا نشانہ بنایا ، ہندو کو دھتکارا، مسیحی کو نیچ گردانہ اور اب سنی ،شیعہ سے ، دیوبندی ،بریلوی سے ، اور یہ سب اہل حدیث سے نفرت کو جزائے ایمان بنائے ہوئے ہے۔ یہی کج روی سیاست کے میدان میں بھی در آئی ہے کہ ایک وقت میں آپ کو مجروح کرنے والا بھی مسیحا دِکھائی دے رہا ہے کہ وہ آپ کے مخالف پر حملہ آور ہے۔

ظالم ،ظالم ہی ہے چاہے وہ آپ پر ظلم کرے یا آپ کے بدترین مخالف پر۔

ظالم کو جو ظالم نہیں کہے گا
نہیں رہےگا ، نہیں رہے گا

—♦—

مصنف کے بارے

ناصر منصور نیشنل ٹریڈ یونینز فیڈریشن پاکستان کے مرکزی جنرل سیکرٹری ہیں۔بائیں بازو کے متحرک ساتھی ہیں، پچھلی کئی دہائیوں سے پاکستان کے محنت کشوں کو منظم کرنے کا کام جاری رکھے ہوئے ہیں۔ آپ اکثر سیاسی ، سماجی اور معاشی مسائل پر لکھتے رہتے ہیں۔

The post ظالم کو جو ظالم نہیں کہے گا…نہیں رہے گا، نہیں رہے گا! – تحریر: ناصر منصور first appeared on Daily Lalkaar.

سائفرکیس: عمران اور شاہ محمودکو 10، 10 سال قیدِ بامشقت کی سزا۔۔!

للکار نیوز — Tue, 30 Jan 2024 13:50:28 +0000

للکار (نیوز ڈیسک) آفیشل سیکرٹ ایکٹ کے تحت راولپنڈی کی اڈیالہ جیل میں قائم خصوصی عدالت نے سائفر کیس میں عمران خان اور شاہ محمود قریشی کو 10، 10 سال قیدِ بامشقت کی سزا سنا دی۔ 30 جنوری کی دوپہر کو خصوصی عدالت کے جج ابوالحسنات ذوالقرنین نے زبانی مختصر فیصلہ سُنایا۔

فیصلہ سنانے کے وقت عمران خان اور شاہ محمود قریشی کمرۂ عدالت میں ہی موجود تھے۔ اس موقع پر عمران خان اور شاہ محمود قریشی کو 342 کا بیان کمرۂ عدالت میں ریکارڈ کرنے کے لیے سوالنامہ دیا گیا۔ عمران خان اور شاہ محمود قریشی نے عدالت سے استفسار کیا کہ ہمارے وکلاء موجود نہیں ہم کیسے بیان ریکارڈ کرائیں گے؟

جج ابوالحسنات ذوالقرنین نے عمران خان اور شاہ محمود قریشی سے کہا کہ آپ کے وکلاء حاضر نہیں ہو رہے، آپ کو سٹیٹ ڈیفنس کونسل فراہم کی گئی ہے۔

وکلائے صفائی نے سوال کیا کہ ہم جرح کر لیتے ہیں۔

جج نے وکلائے صفائی سے کہا کہ آپ نے مجھ پر عدم اعتماد کیا ہے۔

واضح رہے کہ گزشتہ روز عدالت نے عمران خان اور شاہ محمود قریشی کے وکلاء کو جرح کا موقع دیا تھا۔ مگر انہوں نے گواہان پر جرح کرنے کے بجائے جج پر عدم اعتماد سے متعلق اپنی درخواست پر فیصلہ سنانے پر زور دیا تھا۔ جس پر خصوصی عدالت کے جج ابوالحسنات ذوالقرنین نے عمران خان کے وکلاء کی درخواست خارج کرتے ہوئے عمران خان اور شاہ محمود کو گاہان پر جرح کے لئے سٹیٹ کونسل فراہم کیے تھے۔

فیصلہ سناتے وقت پراسیکیوٹر ذوالفقارنقوی، سٹیٹ کونسل، عمران خان کی بہنیں، شاہ محمود قریشی کے اہلِ خانہ، میڈیا کے نمائندے اور عام افراد بھی کورٹ روم میں موجود تھے۔

خصوصی عدالت میں عمران خان نے اپنی صفائی میں 342 کا بیان ریکارڈ کرایا جس میں انہوں نے کہا کہ ان کے سرکاری معاون (اے ڈی سی) میں سے کسی ایک نے سابق فوجی سربراہ جنرل قمر جاوید باجوہ کی ایما پر سائفر چوری کیا۔

انہوں نے کہا کہ سائفر وزیراعظم آفس میں تھا جس کی سیکیورٹی کی ذمہ داری ملٹری سیکریٹری، پرنسپل سیکریٹری اور سیکریٹری پروٹوکول پر آتی ہے۔

عمران خان نے کہا کہ ان کے ساڑھے تین سالہ دورحکومت کے دوران یہ واحد دستاویز ہے جو وزیراعظم آفس سے گم ہوئی۔

عمران خان کے مطابق سائفر میں کہا گیا تھا کہ اگر وزیرِ اعظم کو نہ ہٹایا تو اس کے نتائج ہوں گے۔ البتہ انہوں نے پریڈ گراؤنڈ جلسے میں جو پیپر لہرایا تھا اس میں صرف خطرے کا ذکر کیا تھا کسی ملک کا نام نہیں لیا۔ ان کے بقول پیپر لہرانے کا مقصد جنرل باجوہ کو یہ پیغام دینا تھا کہ اگر سازش ہوئی تو تمام پلان ایکسپوز کر دیا جائے گا۔

سابق وزیرِ اعظم نے کہا کہ ان کی حکومت گرانے کے لیے سازش اکتوبر 2021 میں شروع ہوئی جب جنرل باجوہ نے آئی ایس آئی چیف جنرل فیض حمید کو تبدیل کیا تھا جب کہ اپریل 2022 میں ہماری حکومت گرائی گئی اور چار ماہ بعد جنرل باجوہ نے کہا کہ مجھ پر اور شاہ محمود قریشی پر سیکرٹ ایکٹ کے تحت کیس ہوگا۔

سائفر کیس میں عمران خان نے اپنے بیان میں مزید کہا کہ جنرل باجوہ کی دھمکی کے بعد ان کے خلاف 200 مقدمات درج ہوئے جس کا مقصد جنرل باجوہ اور امریکی سفارت کار ڈونلڈ لو کے حوالے سے ان کا منہ بند کرانا تھا۔

خیال رہے کہ امریکہ نے عمران خان کے الزامات کو رد کرتے ہوئے کہا تھا کہ اس نے پاکستان کے اندرونی معاملات میں دخل نہیں دیا تھا۔

سائفر مقدمےکا پسِ منظر؟

عمران خان نے امریکا میں پاکستانی سفیر کے مراسلے یا سائفر کو بنیاد بنا کر ہی اپنی حکومت کے خلاف سازش کا بیانیہ بنایا تھا جس میں انہوں نے دعویٰ کیا تھا کہ ان کی حکومت کے خاتمے میں امریکا کا ہاتھ ہے ۔

اس کے علاوہ سائفر سے متعلق عمران خان اور ان کے سابق سیکریٹری اعظم خان کی ایک آڈیو لیک بھی سامنے آئی تھی جس میں سابق وزیرِ اعظم کو کہتے سنا گیا تھا کہ ’اب ہم نے صرف کھیلنا ہے، امریکا کا نام نہیں لینا، بس صرف اس کے اوپر کھیلنا ہے کہ یہ ڈیٹ پہلے سے تھی جس پر اعظم خان نے جواب دیا کہ میں یہ سوچ رہا تھا کہ اس سائفر کے اوپر ایک میٹنگ کر لیتے ہیں‘۔

اس آڈیو لیک کے بعد پی ڈی ایم کی اتحادی حکومت کی وفاقی کابینہ نے 30 ستمبر 2022 کو عمران خان کی سائفر سے متعلق آڈیو لیک ہونے کے بعد کابینہ کمیٹی تشکیل دی تھی۔

کابینہ کمیٹی نے یکم اکتوبر کو اجلاس میں قانونی کارروائی کی سفارش کی۔ کمیٹی کی سفارشات کو سمری کی شکل میں کابینہ سے منظور کرنے کے لے پیش کیا گیا جب کہ پاکستان کی وفاقی کابینہ نے ‘سرکولیشن’ کے ذریعے کمیٹی کی سفارشات کی اتوار کو منظوری دے دی ہے۔

کابینہ کی ذیلی کمیٹی نے تجویز کیا ہے کہ یہ قومی سلامتی کا معاملہ ہے، جس کے قومی مفادات پر سنگین اثرات مرتب ہوئے ہیں، اس لیے اس پر قانونی کارروائی لازم ہے۔

کمیٹی نے یہ بھی سفارش کی ہے کہ ایف آئی اے کے سینیئر حکام پر مشتمل کمیٹی تشکیل دی جائے جب کہ ایف آئی اے دیگر انٹیلی جنس اداروں سے بھی افسران اور اہلکاروں کو ٹیم میں شامل کر سکتی ہے۔

کابینہ سے سرکولیشن کے ذریعے منظور ہونے والی سمری میں کمیٹی نے کہا ہے کہ ایف آئی اے کی ٹیم جرم کرنے والوں کے خلاف قانون کے مطابق کارروائی کرے۔

دوسری طرف پی ٹی آئی کی قانونی ٹیم کا کہنا ہے کہ وہ اس فیصلے کے خلاف کل ہائیکورٹ میں اپیل دائر کریں گے۔
اس بات کے امکانات موجود ہیں کہ ہائیکورٹ یا پھر سپریم کورٹ سے عمران خان اور شاہ محمود قریشی کی سزا میں کمی ہو جائے مگر سزا کی مکمل معطلی ممکن نظر نہیں آتی۔

The post سائفرکیس: عمران اور شاہ محمودکو 10، 10 سال قیدِ بامشقت کی سزا۔۔! first appeared on Daily Lalkaar.

عمران خان اور مقدمے

للکار نیوز — Tue, 29 Aug 2023 18:47:30 +0000

ایک مصیبت سے نکل کر دوسری اور پھر تیسری مصیبت میں گرفتار ہو جانا اب تقدیر نہیں کہلوائے گی بلکہ یہ طاقت کے اظہار کی وہ اسکواش گیند ہے جو ریباؤنڈ ہو کر عمران خان سے خود ٹکراتی رہے گی جب تک کہ ” کھیل کا وقت” ختم نہ ہو جائے کیونکہ یہ کھیل تو خان نے ہی خود شروع کیا تھا۔

عمران خان کی سیاست میں دلچسپی تو ایک عرصہ سے رہی تھی لیکن ورلڈ کپ جیتنے کے بعد شوکت خانم کی فنڈ ریزنگ کے دوران اِسے احساس ہوا کہ اس ملک میں سیاست مفت بری اور طاقت کے بے پناہ استعمال کا آسان ترین راستہ ہے جو حکمران استعمال کرتے رہے ہیں۔

سو اس نے خود بڑھ کر اس کھیل میں قدم رکھ دیا اور پھرطاقت ور حلقوں کے ذریعے ہی حکمران بن گیا۔ طاقت اور دولت کا فطری کمال یہ ہے کہ وہ انسان کی وحشیانہ جبلت کو مکمل طور پر کھول دیتی ہے۔
اسی لیے مذاہب ان دونوں عناصر کو انسان کا بدترن دشمن قرار دیتے ہیں اور کہا جاتا ہے کہ انسان کا امتحان شروع ہوگیا۔

خان ایک معمولی لیکن مکار ذہن کا شخص تھا وہ اقتدار کی طاقت کا اسیر ہو کر اپنی جبلت سے مجبور ہو کر حکمرانی کے نشے میں سب سے لڑ بیٹھا۔اور زیادہ طاقت وروں نے اب اسے نکال باہر کر دیا ہے۔ اب وہ تاریخ کا حصہ ہی رہے گا۔ بھلے وہ جیل کے اندر ہو یا باہر۔

دریں چی شک است کہ ہم آج گزشتہ آمروں کی بوئی ہوئی فصل ہی تو آج کاٹ رہے ہیں ۔ جو معاشرتی و معاشی بربادی ‘ تضحیک ‘ مذہبی فقہی اور لسانی تفریق سماج میں پہلے ہی ضیا کے وقت سے پیدا ہو چکی تھی ۔ خان نے اس میں نفرت کے بیج بو کر اپنے کلٹ یا مقبولیت کی کھاد سے اس ملک کی پوری نئی فصل کو زہریلا کر دیا۔
یاد رہے کہ ایسی صورت میں فصل کو جلانا پڑتا ہے تاکہ نئی فصل انسان کے لیے بہتر آئے لیکن یہاں فصل نہیں نسلِ انسانی کا سوال ہے ۔

چنانچہ سماج جب تک خود اس کا ادراک نہیں کرے گا جب تک کھیت زہریلے ہی رہیں گے۔
خان نے صدیوں کی بربادی اپنی حکمرانی کے چند برس میں کر دی ہے۔

سرمایہ دارانہ نظام کے کل پرزے اور نیو امپیرئیل ازم کے اس ایجنٹ نے پاکستانی ریاست کے راستے میں ایسے کانٹے بو دئیے ہیں کہ اب پاکستان کے ترقی پسند ادیب و شاعر پاکستان کے دیگر نظریاتی طبقات اہل علم و ادب کے ساتھ شامل بھی ہوجائیں تو تب بھی سماج کی درستگی میں بہت عرصہ درکار ہوگا تب جا کر ریاست درست سمت میں سفر کرنے کے قابل ہوگی ۔

—♦—

ممتاز افسانہ نگار، ناول نگار اور دانش ور، نعیم بیگ، مارچ ۱۹۵۲ء میں لاہور میں پیدا ہوئے۔ گُوجراں والا اور لاہور کے کالجوں میں زیرِ تعلیم رہنے کے بعد بلوچستان یونی ورسٹی سے گریجویشن اور قانون کی ڈگری حاصل کی۔ ۱۹۷۵ میں بینکاری کے شعبہ میں قدم رکھا۔ لاہور سے سنئیر وائس پریذیڈنٹ اور ڈپٹی جنرل مینیجر کے عہدے سے مستعفی ہوئے۔ بعد ازاں انہوں نے ایک طویل عرصہ بیرون ملک گزارا، جہاں بینکاری اور انجینئرنگ مینجمنٹ کے شعبوں میں بین الاقوامی کمپنیوں کے ساتھ کام کرتے رہے۔ نعیم بیگ کو ہمیشہ ادب سے گہرا لگاؤ رہا اور وہ جزو وقتی لکھاری کے طور پر ہَمہ وقت مختلف اخبارات اور جرائد میں اردو اور انگریزی میں مضامین لکھتے رہے۔ نعیم بیگ کئی ایک ملکی و عالمی ادارے بَہ شمول، عالمی رائٹرز گِلڈ اور ہیومن رائٹس واچ کے تاحیات ممبر ہیں۔

The post عمران خان اور مقدمے first appeared on Daily Lalkaar.

توشہ خانہ کیس میں سزا معطلی کے باوجود عمران خان کی رہائی ناممکن!

للکار نیوز — Tue, 29 Aug 2023 16:02:24 +0000

اسلام آباد ہائی کورٹ کی جانب سے توشہ خانہ کیس میں سابق وزیر اعظم عمران خان کی ضمانت پر رہائی کے حکم پر تحریکِ انصاف کے وکلاء اور کارکنان خوشی کے شادیانے بجانے لگے۔ اور انہیں لگا کہ شاید عمران خان کی رہائی اب یقینی ہو جائے جائے گی اور وہ اٹک جیل سے رہا ہو کر اپنے گھر جا سکیں گے۔ اسلام آباد ہائیکورٹ کے چیف جسٹس کے اس فیصلے پر تحریکِ انصاف کے کارکنان کی جانب سے سوشل میڈیا پر ان کی بہت زیادہ تحسین کی گئی کہ بہت درست فیصلہ دیا ہے اور عمران خان کی سزا معطل کر دی گئی ہے۔ سب سے پہلے تو یہ سمجھ لینا چاہئے کہ سزا معطلی کا ہر گز یہ مطلب نہیں ہے کہ وہ اس مقدمے سے بری ہوگئے ہیں۔

دوسری طرف حقائق یہ بتاتے ہیں کہ عمران خان کی سزا معطلی کے باوجودوہ فوری طور پر رہا نہیں ہو سکیں گے کیونکہ اسلام آباد میں آفیشل سیکرٹ ایکٹ کے تحت بنائی جانے والی خصوصی عدالت کے جج ابوالحسنات ذوالقرنین کی جانب سے اٹک جیل کے سپرٹنڈنٹ کو حکم دیا گیا ہے کہ ملزم عمران خان کو آفیشل سیکرٹ ایکٹ کے تحت درج مقدمہ میں جوڈیشل ریمانڈ میں زیر حراست رکھا جائے۔حکم نامے میں یہ بھی کہا گیا ہے کہ ملزم کو تیس اگست یعنی بدھ کے دن ان کی عدالت میں پیش کیا جائے۔یعنی عمران خان توشہ خانہ کیس میں سزا کے ساتھ ساتھ سائفر مقدمے میں بھی جوڈیشل ریمانڈ پر ہیں۔

اس ساری صورتحال کے پیشِ نظر اسلام آباد ہائیکورٹ کا یہ فیصلہ آنے سے کچھ دیر قبل ہی عمران خان کے وکیل سلمان صفدر کی جانب سے چیئرمین پی ٹی آئی کو کسی اور کیس میں گرفتار نہ کرنے کی درخواست بھی اسلام آباد ہائیکورٹ میں دائر کر دی گئی تھی۔ جس پر کوئی پیش رفت سامنے نہ آسکی۔ بادیَ النظر میں اسلام آباد ہائیکورٹ ساری صورتحال میں صرف اپنا دامن بچاتی نظر آتی ہے۔ کیونکہ اکثر ایسے مقدمات میں مجرم کی جانب سے سزا کے خلاف اپیل کا فیصلہ آنے تک سزاکی معطلی کوئی بڑی بات نہیں ہے۔
سپریم کورٹ کے چیف جسٹس عمر عطاء بندیال کی عمران خان کے مقدمات میں خصوصی طور پر ” ذاتی دلچسپی” پہلے دن سے عیاں ہے جس پر انہیں شدید تنقید کا نشانہ بھی بنایا جاتا ہے۔ سابق وزیراعظم شہباز شریف اور مسلم لیگ (ن ) کی طرف سے اسلام آباد ہائیکورٹ کے اس فیصلے کو چیف جسٹس عمر عطاء بندل کے زیر اثر فیصلہ قرار دیا گیا ہے۔ ایک بات تو طے ہے کہ چیف جسٹس عمر عطاء بندیال کی تمام ترکوششوں کے باوجود عمران خان کے لئے ” عشق کے امتحاں ابھی اور بھی ہیں”۔

اس ساری صورتحال سے کا غیر جانبدارانہ تجزیہ کیا جائے تو ایک بات بالکل واضح ہو جاتی ہے کہ عمران خان اُسی قانونی شکنجے میں جکڑے جا چکے ہیں جس میں وہ اپنے سیاسی حریفوں کو بڑے فخر سے جکڑتے رہے ہیں۔ دوسرا یہ کہ عمران خان اپنے سیاسی مقاصد کے حصول کے لئے خود ایسے دوراہے پر آپہنچا ہے کہ جہاں سے اب اس کی واسپ شاید ممکن نہیں۔ ابھی تو 9 مئی کے واقعات کا مقدمہ عمران خان کا انتظار کر رہا ہے جو سب سے خطرنا ک ثابت ہو سکتا ہے۔عمران خان نے پاکستان کی سیاست میں جس درجے کی غلاظت اور انتہا پسندی کو پروان چڑھایا ہے اس کی 76 سالہ تاریخ میں اور کوئی مثال نہیں ملتی۔ عمران خان کے جرائم کی ایک لمبی فہرست ہے کہ کس طرح پاکستانی سماج کو ایک انتہائی خطرنات دوراہے لا کھڑا کیا ہے،جن میں 40 ہزار پاکستانی طالبان کو بھی اپنے دورِ حکومت میں خیبر پختونخواہ میں دوبارہ آباد کروانا انتہائی بھیانک ہے۔( ان معاملات پر علیحدہ سے کسی تحریر میں تفصیل سے بحث کریں گے) ۔

عمران خان کو ایک چیز سمجھ لینی چاہئے کہ پاکستانی سیاست میں اب شاید ان کا کوئی مستقبل نہیں رہا۔ یا تو عمران خان کو سیاست کو خیر باد کہہ کر ملک چھوڑنا پڑے گا یا پھر ایک لمبا عرصہ جیلوں میں گزارنا ہوگا۔

The post توشہ خانہ کیس میں سزا معطلی کے باوجود عمران خان کی رہائی ناممکن! first appeared on Daily Lalkaar.