Art - Daily Lalkaar

کارل مارکس: محنت کشوں کا راہبر! – تحریر: اسعد بشیر

للکار نیوز — Thu, 07 Mar 2024 13:41:18 +0000

وہ بڑی سی عمارت جو ایک بینک کی عمارت ہوتی ہے اس میں چوکیدار ہے، غربت انسان کو کچھ نہ کچھ کرنے پر مجبور کر ہی دیتی ہے، میٹرک پاس کر کے اس نے شہر آنے کو ترجیح دی اور اپنے والدین، بہن بھائیوں کا پیٹ پالنے کے لیے بینک میں نوکری کر لی۔ یہ دوسرا سال تھا، جون کا مہینا اور لاہور کی گرمی وہ بینک کے باہر بیٹھا رہتا۔ بینک کے اندر ائیر کنڈیشنر میں بیٹھے لوگ فائلیں چھانتے، بینک کسٹمر صوفوں پہ بیٹھے ارام سے اخبار کا مطالعہ کرتے یا پھر اپنی کیش بک بھر رہے ہوتے یا چیک لکھ رہے ہوتے۔ وہ اکثر سوچتا ہے کہ میری اور ان کی تعلیم میں زیادہ سے زیادہ چار پانچ سال کا فرق ہو گا لیکن کیا یہ فرق ساری زندگی کا ہے؟ کیا وہ ہمیشہ بینک کے باہر بیٹھا رہے گا؟ وہ سوچتا کہ بینک میں اتنا زیادہ پیسہ ہے لیکن اس کے پاس بمشکل ہزار روپے بھی نہیں ہیں، مہینہ بھر تنخواہ کا انتظار کرنا پڑتا ہے۔ وہ سوچتا ہے کہ جہاں بینک والوں نے اتنا خرچا کیا، کیا وہ ایک پنکھا باہر نہیں لگوا سکتے؟ لیکن خیر وہ چوکیدار ہے کوئی اکاؤنٹنٹ نہیں ہے۔ اس کی تقدیر نے اسے باہر بٹھایا ہے۔ اس کا کیا قصور ہے اس میں کہ وہ ایک غریب کے گھر پیدا ہوا؟ وہ کسی امیر کے گھر بھی تو پیدا ہو سکتا تھا نا؟ یہ خدا کی بنائی دنیا میں بھی عجیب قسم کی تفریق ہے، غریب سمجھتا ہے کہ خدا نے اس کو سزا کے طور پر دنیا میں بھیجا ہے جبکہ امیر اس کو انعام سمجھتا ہے۔

اب بھلا اس میں اس غریب کا کیا قصور جو غریب خاندان میں پیدا ہوا ہے اور اس امیر نے کیا ایسے کرم کیے کہ وہ امیر خاندان میں پیدا ہوا ہے؟

خیر چونکہ وہ ایک چوکیدار ہے تو اس کا ان باتوں سے کیا لینا؟ وہ اکثر یہ باتیں سوچ کر ان کو نظر انداز کر دیتا۔

معاشرے میں موجود یہ تفریق اسے اندر سے جلا کر راکھ کر دیتی تھی۔ وسائل کی غیر منصفانہ تقسیم کی کیا وجہ ہو سکتی ہے؟ محلے کے مولانا صاحب اس کو مشیت ایزدی کہتے ہیں، خداوند کی مرضی کہہ کر غربت کو امتحان کہتے ہیں، لیکن یہ جواب اسے مطمئن نہ کر پاتا، وہ اکٹر سوچتا کہ بقول مولانا صاحب خداوند تو انسان سے بہت پیار کرتا ہے، اس کی ماں سے بھی زیادہ پیار کرتا ہے۔ بھلا کیا ایک ماں اپنے ایک بیٹے کو طرح طرح کی سہولیات اور پیسے دے اور ایک بیٹے کو در در کی ٹھوکریں کھانے پر مجبور کرے گی کبھی؟ ہر گز نہیں یہ تو ہو ہی نہیں سکتا تو پھر خدا کیونکر ایسا کرے گا۔ اس کا صاف مطلب ہے کہ مولوی کو اس کا جواب معلوم ہے ہی نہیں کیونکہ اس کی باتوں میں بے تحاشہ تضاد ہے۔

یہی باتیں سارا دن رات اس کے ذہن میں گردش کرتی رہتی تھیں، وہ کسی مولوی یا بابے کی تلاش میں تھا جو یہ بتا سکے کہ معاشرے کے اندر یہ تفریق کیوں ہے؟ خدا کی بنائی اس سانجھی زمین پر کسی کا حق زیادہ اور کسی کا کم کیوں ہے؟ خدا کے بنائے اس نظام میں اتنی تفاریق کیوں ہیں؟؟ یہ سوالات اسے ہر وقت سوچنے پر مجبور کرتے۔

چانچہ وہ بابوں کی تلاش میں نکل گیا، کوئی تو اسے جواب دے گا، اس نے کتابیں اٹھا کر پڑھنا شروع کیا۔ کتابوں سے بہترین کون اسے جواب دے سکتا تھا، چنانچہ اس نے معاشرے کے اندر ان طبقات اور تفاریق کو پڑھنا تھا۔ اس نے انٹرنیٹ پر کتابوں کی فہرست دیکھی، گوگل کو استعمال کیا لیکن اس کی حیرت کی انتہا نہ رہی، طبقاتی تقسیم اور اس کی وجوہات پر ایک بابے نے کتاب لکھی ہوئی تھی، بڑے بڑے بال، مونچھیں اور بڑی داڑھی۔ شکل سے کوئی پہنچی ہوئی سرکار لگ رہی تھی۔

اس نے مزید تجسس سے اس کے بارے میں جاننے کی کوشش کی تو پتہ چلا یہ تو کوئی گزرے زمانے کا کارل مارکس ہے، اس کو تو آئے ہوئے ڈیڑھ دو صدیاں بیت گئی ہیں۔ مزے کی بات یہ تو کوئی گورا ہے۔ مزید جاننے پر اس کو معلوم ہوا کہ کارل مارکس کی طبقاتی تقسیم پر لکھی گئی تحریریں اور کتابیں اتنی سچ اور مؤثر ثابت ہوئیں ہیں کہ ان کی وجہ سے دو تین ممالک کے محنت کش انقلاب لے کر آئے ہیں۔ اس کی تعلیمات کو آج بھی کروڑوں لوگ مانتے ہیں۔

پہلے تو اسے لگا کہ یہ کارل مارکس کوئی گوروں کا پیغمبر ہو سکتا ہے یا ان کا کوئی بابا۔ جیسے ہمارے ہاں” بابے“ ہیں۔ لیکن یہ بات کچھ اور تھی، کارل مارکس تو ماہر اقتصادیات یا ماہر معاشیات تھا۔

یہ جان کر اس کی ہنسی چھوٹ گئی، یہی کارل مارکس ہمارے ہندوستان میں ہوتا تو اس کا ایک بڑا سا مزار ہوتا ،جہاں چوبیس گھنٹے لنگر تقسیم ہونا تھا اور مجاور بھنگ پیس کر پی رہے ہوتے۔ عجیب آدمی ہے اس کے تو مجاور چرس اور بھنگ تو پیتے ہی نہیں بلکہ دنیا میں حکومتوں کو چیلنج کرتے پھرتے ہیں، جان ہتھیلی پہ لیے گھوم رہے ہوتے ہیں۔ دنیا کے طاقتور سامراج اور ان سرمایہ داروں کو آنکھیں دکھا رہے ہوتے ہیں۔ اس نے بہت ڈھونڈا کہ کارل مارکس کا کوئی گدی نشین ہی مل جائے، لیکن اس کو کوئی گدی نشین کیا اس کی اولاد میں بھی کوئی نہ ملا۔ اسے یہ جان کر مزید حیرانی ہوئی۔

اتوار کے دن چھٹی ہوتی ہے، وہ دیر سے اٹھا اور اٹھتے ہی اسے خیال آیا کہ پاکستان میں تو مزدورں کے حقوق کو بلکل ہی نظر انداز کیا جاتا ہے، ہمارے بابے اس پر کیوں نہیں کچھ لکھتے جیسے کارل مارکس نے لکھا ہے؟؟ آخر کیا وجوہات ہیں اس کی کہ یہاں ایسا نہ ہو سکا؟؟

ان سوالوں نے اسے دن بھر الجھائے رکھا۔ اس کا جواب اسے یوں ملا کہ ہم ہندوستان والے عرصے سے محکوم رہے ہیں، ہمارے ذہن ابھی تک غلامی کی زنجیروں میں جکڑے ہیں۔ یورپ والے کب کے آزاد ہو چکے تھے۔ وہ کب کے حاکم بن چکے تھے۔ جب بھی کوئی قوم حاکم بنتی ہے تو وہاں علمی، سائنسی اور ادبی ترقی ہوتی ہے۔ مسلمان بھی کبھی حاکم تھے اس لیے اس وقت انہوں نے بھی ترقی کی تھی۔

ہم سامراج کے شکنجے میں اس طرح سے قید ہیں کہ ہمیں ہماری غلامی ہی آزادی لگتی ہے، ہم ہر چودہ اگست کو جشن بھی مناتے ہیں۔ ہماری معاشی آزادی پر سو قدغن لگے ہیں، آئی ایم ایف، ورلڈ بینک اور باقی ادارے ہمیں آزاد معاشی پالیسی بنانے کا حق ہی نہیں دیتے۔

معاشرے میں ہم کچھ تبدیلی لا ہی نہیں سکتے، مذہبی بنیاد پرست طبقہ ہمارے ہر قدم کی مخالفت کرتا ہے، ہتھیار اور طاقت کے زور پر من چاہے قوانین بنواتا ہے، ہماری پارلیمنٹ تو بس نام کی پارلیمنٹ ہے۔ ساری کی ساری قانون سازی تو سڑکوں پر ہوتی ہے، یا واشنگٹن ڈی سی میں ہوتی ہے۔ آئے روز احتجاجی دھرنے اور توجہ دلاؤ ہڑتالیں صرف ان بہرے گونگے پارلیمنٹ میں بیٹھے لوگوں کے لیے ہوتی ہیں تاکہ قانون سازی ہو سکے۔

یہ سب باتیں جان کر اسے تقریباً ساری بات سمجھ آنے لگی، وہ جان چکا تھا کہ وہ غریب کیوں ہے؟ اس کے پاس وسائل کم کیوں ہیں؟ اسے سمجھ آچکی تھی کہ وہ بھی ایک بے بس انسان کی طرح زندگی کیوں گزار رہا ہے۔ اسے علم ہو گیا کہ یہاں کارل مارکس کیوں نہیں آیا، یہاں کے لوگ غلامی کی زنجیروں کو کیوں نہیں توڑتے۔ اسے سمجھ آ گیا کہ بینک کے اندر ائیر کنڈیشنر اور باہر پنکھا تک کیوں نہیں لگا ہوا۔ یہ جان کر وہ خیالات کی دنیا میں محنت کشوں کے راہبر کارل مارکس کی تلاش میں نکل پڑا۔

—♦—

مصنف کے بارے

اسعد بشیر ، آزاد جموں و کشمیر کے ضلع کوٹلی سے تعلق رکھتے ہیں، آج کل جامعہ کوٹلی آزاد جموں و کشمیر سے بائیو ٹیکنالوجی میں ایم فل کر رہےہیں اوراسی یونیورسٹی میں ہی شعبہ ہیلتھ سائنسز میں بطور وزیٹنگ لیکچرر پڑھا رہے ہیں۔

The post کارل مارکس: محنت کشوں کا راہبر! – تحریر: اسعد بشیر first appeared on Daily Lalkaar.

احمد سلیم ایک منفرد ادیب اور بےباک انقلابی! – تحریر: پرویزفتح

للکار نیوز — Sat, 03 Feb 2024 11:29:44 +0000

ہماری دھرتی کے ایک انتہائی قابلِ قدر شاعر، محقق، مفکر، آرکائیوسٹ، ترقی پسند ادیب، مارکسی دانشور اور انسانی حقوق کے علمبردار ہمارے پیارے ساتھی، کامریڈ احمد سلیم اتوار 10 دسمبر کو سماجی استحصال سے پاک معاشرے کے سپنے بُنتے اور ایک نئے سویرے کی امید جگاتے، اپنے جگر کے عارضے سے ہار کر ہم سے جدا ہو گئے۔ اُنہوں نے اپنی ساری زندگی ملک کے مظلوم، محکوم اور پسے ہوئے طبقات، کسانوں، مزدوروں، عورتوں، مذہبی اقلیتوں اور غیر منصفانہ سماج کے ہاتھوں پستی ہوئی وفاقی اکائیوں کے حقوق و تحفظ کے لیے اپنے قلم کو ہتھیار بنائے رکھا۔

اُن کا اصل نام محمد سلیم خواجہ تھا اور وہ 26 جنوری 1945ء کو منڈی بہاؤالدین کے ایک چھوٹے سے قصبے میانہ گوندل کے ایک چھوٹے متوسط گھرانے میں پیدا ہوئے۔

احمد سلیم جی اپنے عہدِ جوانی میں ہی ایک جفاکش، سچے اور بےباک انقلابی کارکن کے طور پر نمودار ہوئے۔

وہ ایک منجھے ہوئے ترقی پسند ادیب، محقق اور صحافی تھے اور ترقی پسند ادبی تحریک کے انتہائی فعال اور مخلص کارکنوں میں شمار ہوتے ہیں۔ ترقی پسند ادب پرانی وضع، پرانے انداز، دقیانوسی خیالات، رویوں اور طریقوں کو رد کر کے نئے اصول، قاعدے، اسلوب، طرز اور رجحانات کو ترتیب دیتا، اختیار کرتا اور قبول کرتا ہے۔

یہ ادب تہذیب و ثقافت کے نظریہ ارتقاء، فہم و ادراک اور معاشرے کے اثرات سے نشوونما پاتا ہے۔ ترقی پسند شاعری تصوراتی، فرضی اور غیر حقیقی نہیں ہوتی، بلکہ یہ ادب کے ذریعے عوامی خدمت کرتی اور حقائق بیان کرتی ہے، لوگوں کا حوصلہ بلند کرتی ہے اور زندگی کا مقصد قابل بیان تصورات اور تذکروں سے کرتی ہے۔

ترقی پسند ادب اور شاعری معاشرے میں تشدد، دنگا فساد، آمرانہ سوچ، جبراً اطاعت، سیاسی قبضے، سماجی استحصال، انسانی برائیوں اور کمزوریوں کے رد عمل کے نتیجے میں لکھی جاتی ہے۔

یہ دنیا میں کامیابی حاصل کرنے کے جذبے کو ابھارتی ہے اور انسانوں میں ان کے بنیادی حقوق سے متعلق آگاہی پیدا کرتی ہے۔ اس لیے یہی ترقی پسندی احمد سلیم جی کی زندگی کا اوڑھنا بچھونا بنیی اور آنے والی نسلوں کے لیے علم و ادب کا وسیع ذخیرہ مرتب ہونے کا سبب بن گئی۔

میری احمد سلیم جی سے میری پہلی ملاقات 1987ء میں لاہور میں ہوئی جب وہ قومی انقلابی پارٹی بنانے میں اپنا کردار ادا کر رہے تھے اور مال روڈ کے قریب ایک دفتر سے ”ماہنامہ راستہ“ شائع کرتے تھے۔ چونکہ وہ پاکستان میں بائیں بازو کی سیاسی جماعتوں کو اکٹھا کر کے ایک ایسی مضبوط اور متحرک جماعت بنانے کے قائل تھے، جو ملکی سیاسی منظرنامے میں نمایاں کردار ادا کر سکے اور معاشی ڈھانچے کو توڑ کر وسائل کی منصفانہ تقسیم کی بنیاد پر تشکیل نو کرنے میں اپنا کردار ادا کرے۔ ایک ایسی جماعت جو ملک پر مسلط قبائلی، جاگیردارنہ، سرمایہ دارانہ، اشرافیہ اور بیوروکریسی کی لوٹ گھسوٹ پر مبنی فرسودہ نظام کو توڑ کر ایک سوشلسٹ معاشرے کے قیام کے لیے قائدانہ کردار ادا کر سکے۔

میں اُن دنوں انجنیئرنگ یونیورسٹی لاہور میں زیر تعلیم اور طلباء سیاست میں سرگرم تھا۔ میں سوشلسٹ سٹوڈنٹس آرگنائزیشن کا جنرل سیکرٹری اور پاکستان سوشلسٹ پارٹی کا ممبر تھا۔ اُن دنوں پروفیسر عزیزالدین گروپ نے، جو پرولتاری گروپ کے نام سے کام کرتا تھا، مزنگ روڈ لاہور پر مکتبہ فکرودانش کھول رکھا تھا، جو بظاہر ترقی پسند کتب کا مرکز اور پبلشنگ کا کام کرنے کا سینٹر تھا، لیکن وہیں سے پروفیسر جمیل عمر ماہنامہ نیاپاکستان شائع کرتے تھے۔ اور وہ دفتر رانا عبدالرحمان(موجودہ بُک ہوم والے) اور ظہور احمدخان(موجودہ فکشن ہاؤس والے) کی مدد سے سیاسی بحث مباحثے کا مرکز بن گیا تھا۔

جمیل عمر سے میری گہری دوستی تھی اور ہم دونوں سیاسی حلقوں میں بائیں بازو کی متحدہ جماعت بنانے کی بحث کا آغاز کرنے کے لیے کوشاں تھے۔ اسی سلسلے میں ایک روز ہم ریگل چوک کے قریب احمد سلیم جی سے ملنے ماہنامہ راستہ کے دفتر پہنچ گئے۔ ایک لمبی بحث کے بعد ہم نے طے کیا کہ ” آج پاکستان کی ترقی پسند سیاست، پروگرام اور طریقۂ کار“ کے عنوان سے سیمینار منعقد کیا جائے، جِس کے لیے جمیل عمر، احمد سلیم اور مجھ (پرویز فتح) پر مشتمل تین رکنی کمیٹی تشکیل دی گئی جو پاکستان کی بائیں بازو کی تمام جماعتوں کے راہنماؤں سے ملاقات کرے اور اُنہیں اپنا تحریری مقالہ سیمینار میں پڑھنے کی درخواست کرے۔

ہم نے یہ بھی طے کیا کہ اس سیمینار کے بعد تمام مقالوں کو کتابی شکل میں شائع کیا جائے، جو بعد ازاں بائیں بازو کو اکٹھا کرنے کے ڈاکومنٹ کا کردار ادا کرے گا۔ ہم تینوں مل کر ملک کے مختلف شہروں میں ترقی پسند پارٹیوں کے راہنماؤں سے ملنے گئے۔ کامریڈ نعیم شاکر ایڈووکیٹ کی وساطت سے لاہور ہائی کورٹ کا کراچی ہال ہمیں مل گیا۔ ہم نے بھرپوُر سیمینار بھی منعقد کیا اور مکتبہ فِکرودانش نے تمام مقالوں پر مشتمل ایک کتابچہ بھی شائع کر دیا۔ آج ایسے فکری اجتماعات کا ثمر ہمارے سامنے ہے اور متعدد مرجرز کے بعد عوامی ورکرز پارٹی کی شکل میں بائیں بازو کی ایک باعمل جماعت سیاسی دہارے میں موجود ہے۔

میں 1996ء میں برطانیہ منتقل ہو گیا تو ان سے رابطہ نہ رہا۔ پھر اچانک اپریل 2017ء کی ایک خوشگوار شام کامریڈ نزہت عباس جی کا فون آیا کہ احمد سلیم برطانیہ آئے ہوئے ہیں اور آکسفورڈ میں ان کے ہاں قیام پذیر ہیں۔ جب وہ کامریڈ محمد عباس اور نزہت عباس کے ساتھ ہمارے پاس لیڈز بریڈفورڈ تشریف لائے تو ہم نے ساؤتھ ایشین پیپلز فورم کے پلیٹ فارم سے ان کے اعزاز میں ایک تقریب بھی منعقد کی۔ اُنہوں نے ایک رات بائیں بازو کی نامور شخصیت اور ہم سب کی راہنما باجی نسیم شمیم ملک کے ہاں قیام بھی کیا۔ احمد سلیم جی کا میرے والد محترم سے بھی نظریاتی اور محبت کا رشتہ تھا اور جب بھی وہ انہیں ملنے ٹوبہ ٹیک سنگھ تشریف لاتے تو اپنی علمی پیاس بھجانے اور آرکائیو کے لیے کتابوں کی ایک دو بوریاں بھر کر ساتھ لے جاتے۔

احمد سلیم جی کی ملک کی سیاسی تاریخ پر گہری نظر تھی۔ انہوں نے درجنوں کتابیں لکھیں اور پاکستانی اخبارات سے ملکی تاریخ کے اہم واقعات کو چار جلدوں میں اکٹھا کیا۔

وہ اک بیباک، بہادر، ثابت قدم اور جہدِ مسلسل کرنے والے انقلابی راہنما کے ساتھ ساتھ پنجابی اور اردو زبان کے شاعر، نثر نگار، کالم نویس اور محقق بھی تھے۔

ان کی زندگی کے ہمہ جہت پہلو تھے جن کی وجہ سے اُنہوں نے تحقیقی مضامین اور کتب کی تصانیف و ترتیب میں گرانقدر خدمات سرانجام دیں۔ وہ پنجابی اور اردو کی 175 سے زائد کتابوں اور تحقیقی مقالوں کے مصنف ہیں۔

اُن کے شاعری مجموعوں میں نور منارے، کونجاں موئیاں، گھڑی دی ٹک ٹک، جب دوست نہیں ہوتا اور اک ادھوری کتاب دے بے ترتیب ورق شامل ہیں۔

وہ ملک میں بولی جانے والی دوسری زبانوں کے ادب کا پنجابی میں ترجمہ کر کے شائع کرتے رہے۔ نامور ترقی پسند ادیب شیخ ایاز کی شاعری کا ” جو بیجل نے آکھیا“ کے نام سے پنجابی میں ترجمہ بھی کیا، جِسے وہ ہمیشہ فخر سے پیش کرتے تھے۔

”نال میرے کوئی چَلے اور ” تتلیاں تے ٹینک “کے نام سے دو ناول بھی تخلیق کیے۔

سیاست کے موضع پر جو کتابیں تحریر کیں ان میں ٹوٹتی بنتی اسمبلیاں، سیاست دانوں کی جبری نا اہلیاں، پاکستان اور اقلیتیں، محمود الرحمٰن کمیشن رپورٹ اور پاکستان کے سیاسی قتل کے نام سرِ فہرست ہیں۔ اس کے علاوہ انہوں نے فیض احمد فیض، حمید اختر، مسعود کھدرپوش، احمد راہی اور کئی دوسرے اہلِ قلم پر کتابیں بھی قلم بند کیں۔

اُنہیں بہت سے ایوارڈز سے بھی نوازا گیا جن میں 14 اگست 2010ء میں صدارتی تمغہ برائے حسن کارکردگی اور حکومتِ بنگلہ دیش کی جانب سے 1971ء میں بنگلہ دیشی عوام پر ڈھائے جانے والے مظالم کے خلاف آواز اُٹھانے پر بنگلہ دیش فریڈم ایوارڈ شامل ہیں۔

وہ ساؤتھ ایشین ریسورس اینڈ ریسرچ سینٹر اسلام آباد کے شریک بانی تھے، جسے پاکستان میں سب سے بڑا پرائیویٹ ریسرچ آرکائیو ہونے کا اعزاز حاصل ہے۔

احمد سلیم جی نظریاتی اور سیاسی طور پر ہمیشہ درست راستے کی نشاندہی کرتے رہے اور انہوں نے سیاسی کارکنوں کی تعلیم و تربیت میں اپنا بھرپور کردار ادا کیا۔ اُنہوں نے محنت کش عوام اور ملک کے پسے ہوئے طبقات سے وابستگی کی قیمت ادا کرتے ہوئے ڈکٹیٹر یحییٰ کے دور میں قیدوبند کی صعوبتیں بھی برداشت کیں۔ میں آج فخر سے کہہ سکتا ہوں کہ ہم سب کے احمد سلیم ایک منجھے ہوئے باعمل سوشلسٹ تھے، جنہوں نے اپنی زندگی کو آنے والی نسلوں کے لیے وقف کر دیا۔ اُنہوں نے اپنے نظریات کی ترویج و ترقی کے لیے قلم کا انتخاب کیا اور ترقی پسند ادب کا وسیع زخیرہ مرتب کیا۔

اُن کی تحقیقی کتب، تنقیدی مضامین، تراجم اور شاعری ہمیشہ آنے والی نسلوں کی راہنمائی کرتی رہے گیں اور اُن کی ادبی میدان میں گراں قدر خدمات کو ہمیشہ یاد رکھا جائے گا۔

آج پاکستان تنزلی کے جِس مقام پر پہنچ چکا ہے اُس میں احمد سلیم جیسے باشعور اور ہمہ جہت نقاد، مفکر اور انقلابی راہنما کی کمی کو پورا کرنا ممکن نہیں ہے۔ ہاں ایک سوشلسٹ کارکن کی حیثیت سے میں اس بات کا عزم کرتا ہوں کہ ہم سب مل کر احمد سلیم کے مشن کو جاری رکھنے اور ملک کے مظلوم، محکوم اور پچھڑے ہوئےطبقات، کسانوں، مزدوروں اور محنت کار عوام کے حقوق کی جدوجہد کو جاری رکھیں گے اور ملک کو بالادست طبقات، جاگیرداروں، سرمایہ داروں، اشرافیہ اور کرپٹ بیوروکریسی کے چنگل سے آزاد کروانے کے لیے اپنا کردار جانفشانی سے ادا کرتے رہیں گے۔

—♦—

مصنف کے بارے

پرویز فتح بائیں بازو کے سینئر ساتھی ہیں اور برطانیہ میں مقیم ہیں۔ آپ عوامی ورکرز پارٹی برطانیہ کے راہنما ہیں اور برطانیہ میں بائیں بازو کے انتہائی متحرک دوستوں میں سے ہیں۔ آپ اکثر سیاسی، سماجی اور معاشی مسائل پر لکھتے رہتے ہیں۔

The post احمد سلیم ایک منفرد ادیب اور بےباک انقلابی! – تحریر: پرویزفتح first appeared on Daily Lalkaar.

مُنّو بھائی: اپنے عہد کا ضمیر! – تحریر: طارق شہزاد

للکار نیوز — Fri, 19 Jan 2024 07:54:34 +0000

مُنّو بھائی اُس نسل کے سرکردہ لوگوں میں سے تھے جو اپنے عہد کا ضمیر ہوا کرتے تھے! عوامی اُمنگیں اُن کے فکر و فن کا اثاثہ جبکہ عوامی مصائب ان کی جرآتِ قلم ہوتے تھے۔ اپنے قلم سے عوامی مسائل کو زباں دیتے یہ لوگ اس صدی میں ناپید ہوں گے۔

مُنّو بھائی 19 جنوری 2018ء کو اِس جہانِ خراب کو درست کرنے کی سعی کرتے الوداع کہہ گئے۔ اور آنے والی نسلوں کے ذِمے حِرص و ہوس سے پاک اور باہمی تعاون پر مبنی انسانی معاشرے کی تعمیر کا فریضہ سونپ گئے۔

مُنّو بھائی جن کا اصل نام منیر احمد قریشی تھا ، 6 فروری 1933ءکو وزیر آباد پیدا ہوئے اور 19 جنوری 2018ء کو ریواز گارڈن لاہور میں85 سال کی عمر میں انتقال کر گئے۔

مُنو بھائی کو طلبہ سیاست میں سرگرم ہونے کی پاداش میں کالج سے نکال دیا گیا۔ یوں اُنہیں اپنی رسمی تعلیم کو مزید جاری رکھنے سے محروم ہونا پڑا۔ اُن کے والد نےاُنہیں ریلوے میں بھرتی کرادیا۔ نوکری کا تقرر نامہ بھی آگیا۔ لیکن اُنہیں یہ پسند نہیں آیا۔ گھر سے نکل کر اپنے کالج کے دوست اور ساتھی شفقت تنویر مرزا کے پاس راولپنڈی آگئے۔

1950ء کی دہائی کے اواخر میں راولپنڈی کے اخبار تعمیر میں پچاس روپے ماہوار پر نوکری کی۔ اور اسی اخبار سے ’’اوٹ پٹانگ‘‘ کے عنوان سے کالم نگاری کا آغاز کیا۔ اُس عہد کے معروف ترقی پسند اخبار اَمروز میں نظم بھیجی تو اُس وقت کے ایڈیٹر احمد ندیم قاسمی نے اُنہیں قلمی نام مُنّو بھائی عطا کیا۔ جو اُن کے اصل نام کی بجائے ان کی شناخت بنا، اِسی نام سے ہی اُنہوں نے کالم لکھے اور ڈرامہ نگاری بھی کی۔

مُنّو بھائی کے ترقی پسند نظریات سے متاثر ہو کر احمد ندیم قاسمی اُنہیں’’تعمیر‘‘ سے ’’امروز‘‘ میں لاہور لے آئے۔ یہاں مُنّو بھائی نے دیگر صحافتی ذمہ داریوں کے ساتھ ’’گریبان‘‘ کے نام سے کالم لکھنے کا سلسلہ شروع کیا۔

حکومت سے صحافیوں کے معاوضے کے جھگڑے پر سزا کے طور پر مُنّو بھائی کا تبادلہ ’’امروز‘‘ ملتان میں کر دیا گیا، جہاں سے ذوالفقار علی بھٹو انہیں مساوات میں لے آئے۔ 7 جولائی 1970ء کو مساوات میں ان کا پہلا کالم چھپا۔ بعد ازاں مُنّو بھائی مساوات سے روزنامہ جنگ لاہور میں آ گئے۔

ڈرامہ نگاری بھی مُنّو بھائی کی شخصیت کا ایک معتبر حوالہ ہے۔ اُنہوں نے پی ٹی وی کے لیے سونا چاندی، جھوک سیال، دشت اور عجائب گھر جیسے شاہکار ڈرامے لکھے۔ کالم نویسی کی طرح اپنے ڈراموں میں بھی انہوں نے محنت کشوں اور محروم طبقات کی زندگی اور مسائل پیش کیے۔ ٹی وی کے لیے ڈرامہ نویسی کی طرف اُنہیں معروف ترقی پسند براڈ کاسٹر اسلم اظہر لائے۔

مُنّو بھائی کی تصانیف میں سے چند درج ذیل ہیں؛

اجے قیامت نئیں آئی (پنجابی شاعری کا مجموعہ)
جنگل اداس ہے (منتخب کالم)
فلسطین فلسطین
محبت کی ایک سو ایک نظمیں
انسانی منظر نامہ (تراجم)

مُنّو بھائی اور ان کے قبیل کے دیگر احباب جو صحیح اور غلط کو اجتماعی سماجی شعور پر پرکھتے ، اور ذاتی آسودگی پر سماجی بہتری کو ترجیح دیتے تھے، سماج کے محروم طبقات کے لئے ان کے وکیل بن کر اپنے فن پاروں کو غاصب حاکمین کے خلاف چارج شیٹ مرتب کرتے تھے۔ یہ وہ نسل تھی جو ادب کو ’’ذہنی عیاشی‘‘کے بجائے سماجی تبدیلی کا اہم ذریعہ سمجھتی تھی۔

عہدِ حاضر کی کمرشلائزیشن کے آگے سرنگوں انسانی اقدار و احساسات کے نتیجے میں نسلِ نو بنیادی انسانی جذبوں سے عاری ہوتی جارہی ہے۔ ایسے میں مُنّو بھائی اور اُن کے رُفقاء کی کمی زیادہ شدت کے ساتھ محسوس ہوتی رہے گی۔ ذاتی فوائد سے مبّرا پچھلی صدی کی اس نسل کا گویا سانچا ہی مختلف تھا۔

عصر حاضر کی غمازی کرتی ہوئی عزیز دوست اور ترقی پسند شاعر واصف اخترؔ کی نظم ’’جہانِ معنی ‘‘ سے اقتباس؛

’’

جہانِ معنی تجھے خبر ہے۔۔۔

میں عہدِ حاضر میں جی رہا ہوں

یہ عہدِ حاضر جو نسلِ نو کو سکھا رہا ہے

فروخت کرنا!

تجھے خبر ہے؟

ہزار چیخے تُو لاکھ تڑپے

مگر یہ عہدِ کمال جس نے

شعورِ رنگِ چمن کوحرفِ غلط بتا کر مٹا دیاہے

نحیف آنکھوں کو پھوڑ کر اب۔۔۔ جدید ذہنوں کو کھا رہا ہے !

جہانِ معنی تجھے خبر ہے؟

جدید ذہنوں میں کہنہ سوچوں کی تخم پاشی سے کیا ملے گا۔۔۔!

شدید جذبوں کی تلملاہٹ!

برہنہ روحوں کا یہ تماشہ!

کہاں رکے گا۔۔۔

‘‘

مُنّو بھائی اور ان کی نسل کے زیادہ تر لوگ اپنے سماجی وجود کے اِدراک سے مسلح، اپنے قلم کو تقدیسِ انسانیت کی حُرمت سے لیس کیے غمِ دوراں کو زباں دیتے رہے۔ اس نسل نے آنے والی نسلوں کے لئے تَرکے میں سماجی زندگی کو اجتماعی طور پر بہتر بنانے کی جہد کا اثاثہ چھوڑا ہے۔

انسان کا سماجی وجود تاریخ کی گردشوں میں کہیں کھو تا جا رہا ہے۔

موجودہ معاشی نظام کا شاید تقاضا بھی یہی ہے کہ انسان اپنے سماجی وجود سے بیگانہ محض انفرادی بقاء کے لئے شب و روز سر پھینکے عذابِ مشقت جھیلتا رہے۔

مُنّو بھائی کی نسل کے ہر ذی شعور نے جو راز تاریخ کی ورق گردانی سے پایا تھا وہ یہ کہ ؛

’’انسان کا سماجی وجود ہی اس کی انفرادی بقاء کا ضامن ہے۔‘‘

منو بھائی نے پنجابی میں شاعری کی، ان کی پنجابی زبان میں کئی نظموں کو شہرت و مقبولیت ملی۔

نمونہِ کلام
او ہ وی خوب دیہاڑے سن
بُھکھ لگدی سی منگ لیندے ساں
مل جاندا سی کھا لیندے ساں
نئیں سی ملدا تے رو پیندے ساں
روندے روندے سوں رہندے ساں
ایہہ وی خوب دیہاڑے نیں
بھک لگدی اے منگ نیں سکدے
ملدا اے تے کھا نیں سکدے
نئیں ملدا تے رو نئیں سکدے
نہ روئیے تے سوں نئیں سکدے

پاکستان کی موجودہ معاشی و سیاسی صورتِ حال میں مُنّو بھائی کے قبیل کی کمی شدت سے محسوس ہوگی۔ جو اپنے قلم کو محروم اور استحصال زدہ عوام کے مصائب کی سیاہی سے بھر کر استحصالی حکمرانوں کے سامنے کلمۂ حق لکھتے ، اور عوام میں سیاسی شعور کی آبیاری کرتے رہتے تھے۔

—♦—

مصنف کے بارے

طارق شہزاد ڈیلی للکار کے ایڈیٹر ہیں، اورگزشتہ 25 سالوں سے بائیں بازو کی تحریک کے ساتھ وابستہ ہیں۔ پاکستان میں محنت کشوں اور محروم طبقات کی نمائندہ سیاسی جماعت کے قیام کی کاوشیں کرتے چلے آرہے ہیں۔ آپ بائیں بازو کے متحرک نظریاتی لوگوں میں سے ہیں اور سیاسی، سماجی ، معاشی مسائل پر لکھتے رہتے ہیں۔

The post مُنّو بھائی: اپنے عہد کا ضمیر! – تحریر: طارق شہزاد first appeared on Daily Lalkaar.

"کیا میں آپ کو چُھو سکتا ہوں؟”- زاہد ڈار- تنزیلہ مغل

للکار نیوز — Wed, 25 Oct 2023 00:29:02 +0000

یہ میں نے کیا سنا تھا! کتاب سے نظریں اٹھا کر ان کو دیکھا۔ کانوں میں یہی الفاظ بار بار گونج رہے تھے۔ میں کچھ لمحے ان کا چہرہ دیکھتی رہی۔ میں نے جو سنا اسے میں غلط فہمی ثابت کرنا چاہتی تھی۔ مگر وہ جس طرح مسکرا کر مجھے اتنے مطمئن انداز سے دیکھ رہے تھے تو یقین ہو گیا کہ جو سنا ہے وہی انہوں نے کہا ہے۔

یہ ایک انتہائی ناقابلِ یقین سوال تھا جو نہ تو میں نے کبھی کسی کو کسی سے پوچھتے ہوئے سنا اور نہ ہی کبھی کسی نے مجھ سے پوچھا۔ میری حیرت کی کوئی انتہا نہ رہی تھی۔ اور بوکھلاہٹ تھی کہ الگ۔ کہ کبھی کسی مرد نے کسی عورت کو چُھونے سے پہلے اس طرح باقاعدہ طور پر پوچھا نہیں ہو گا۔ وہ یا تو عورت کی مرضی کے خلاف ہی یہ جراَت کر لیتا ہے یا اس کی آنکھوں میں اس کی ہاں پڑھ لیتا ہے۔ اور اگر ہمت نہ کر پائے تو دل میں یہ خواہش لیے موقع کی طاق میں پھرتا رہتا ہے۔ مگر پوچھتا ہرگز نہیں۔

سامنے بیٹھے اس شخص کے چہرے پہ جُھریاں، ہونٹوں پہ ہلکی سی مسکراہٹ اور آنکھوں میں عورت کو چُھو لینے کی بے پناہ خواہش!! کتنی جرآت سے یہ سوال کیا تھا اس نے۔ سوال بھی ایسا جس نے رسم و رواج، روایات ، منافقت اور لحاظ کی سبھی زنجیروں کو توڑ کر رکھ دیا تھا ۔

میں ان کے بارے میں کافی کچھ جانتی تھی۔ کچھ تو انہوں نے خود بتا رکھا تھا کچھ لوگوں سے سنتی رہتی تھی۔ مگر لوگوں کے کہے کی اہمیت نہیں تھی۔ وہ یونہی ہنسی ہنسی میں ان کے بارے میں ایسی باتیں کہتے تھے جو میرے لیے نہ تو قابلِ یقین تھیں اور نہ ہی قابلِ توجہ۔ ان کی زندگی زیادہ تر مطالعہ میں ہی گزری تھی۔ امریکن، جرمن، فرانسیسی، انگلش، اردو گو ہر طرح کا لٹریچر انہوں نے پڑھ رکھا تھا۔ جبکہ رسمی سے ان کی زیادہ بن نہ پائی تھی اور دسویں پاس بھی نہ کی تھی۔ جب جب جس جس کتاب یا رائیٹر کا ذکر ہوتا وہ اس کے بارے میں کچھ دلچسپ باتیں بتاتے۔ پاؤنڈ ان کا پسندیدہ شاعر تھا۔ رسمی تعلیم، نوکری، شادی ان سب سب چیزوں کے لئے تو جیسے وہ بنے ہی نہیں تھے. سکول نہ جانے ، شاعری پڑھنے اور شعر کہنے پر اپنی ماں سے مار بھی خوب پڑتی تھی۔ کہتے تھے پہلا ہی شعر کہنے پر مجھے میری ماں سے بہت مار پڑی۔ وہ پہلا شعر وہ اکثر مجھے سنایا کرتے تھے جو کچھ یوں تھا،

"رحمِ مادر سے نکلنا میرا بے سود ہوا
آج بھی قید میں ہوں”

عمومی سماجی روایات کی رُو سے وہ بہت عجیب تھے۔ خواب، تخیل، حقیقت، جھرنے، ندی، پہاڑ، نغمے، ماضی، حال، مستقبل، نرگسیت، وہم، اندیشے، نفرت، غصہ کسی بھی چیز کا کوئی عکس ان کی باتوں سے نہ جھلکتا۔ بس ایک ہی مخلوق کو نظریں ڈھونڈتی تھیں۔ ایک ہی مخلوق کے گُن گاتے۔ اور وہ تھی عورت!

جیسے ہی کوئی عورت کافی شاپ میں آتی یا کوئی نسوانی آواز ان کے کانوں میں پڑتی وہ فوراً پلٹ کر اس طرف دیکھتے اور پھر بار بار دیکھتے۔ پھر مجھ سے پوچھتے، "کیا یہ آپ کی دوست ہے؟” میں کہتی ، "جی نہیں ۔” اس سوال کے مبہم معنی میں خوب سمجھتی تھی۔ بسا اوقات تو کتاب کی طرف نظر ہوتے ہوئے بھی میرا دھیان انہی میں ہوتا۔ وہ خاموشی سے مجھے دیکھتے رہتے۔ جب تک میں کتاب چھوڑ کر ان کی طرف متوجہ نہ ہوتی چپ رہتے۔ بس ہر تھوڑی دیر بعد دو سوال پوچھتے۔

"آپ کی گھڑی پر کتنے بجے ہیں۔” میں وقت بتاتی۔ پھر کہتے، "یہ میرا موبائل کام تو کر رہا ہے نا؟”

میں کہتی ، "جی بالکل ٹھیک کام کر رہا ہے۔ مگر آپ بار بار کیوں پوچھتے ہیں؟”

وہ جواب دیتے، "انگلینڈ سے میری بہن کا فون آنا ہے۔”

ان کی بے چینی دیکھ کر دل اداسی سے بھر جاتا۔ مگر میں پھر سے کتاب میں گم ہونے کی کوشش کرتی۔ مقررہ وقت پر ان کا موبائل بجتا۔ وہ خوشی خوشی فون سننے لگتے۔ دو ہی باتیں کہتے۔ "میں اپنی دوست کے ساتھ بیٹھا ہوا ہوں۔” اور یہ کہ "جن کے ساتھ میں رہتا ہوں وہ مجھ سے سارے پیسے چھین لیتے ہیں اور میں کوئی اور گھر ڈھونڈ رہا ہوں۔” 2 منٹ کی فون کال کے بعد وہ پھر سے مرجھا جاتے۔۔۔ کتاب پڑھتے پڑھتے میں جونہی مسکرا کر انہیں دیکھتی ان کے قصے کہانیاں شروع ہو جاتے۔

نہ کسی کو دیکھ کر خوش ہوتے نہ منھ بناتے۔ کسی اور سے کم ہی بات کرتے تھے اور نہ کسی اور کے متعلق بات کرتے تھے۔ صرف اپنی بات کرتے اور چند ہی باتیں کرتے۔ وہی چند باتیں وہ بار بار کرتے۔

مرد حضرات سے دور بھاگتے تھے۔ زیادہ تر میرے والی ٹیبل پر ہی بیٹھتے۔ اور ہمیشہ ہی بیٹھنے سے پہلے مجھ سے پوچھ لیتے۔ تھوڑا مسئلہ رہتا مجھے کہ جو کوئی بھی ان سے ملنے آتا وہ اسی ٹیبل کی طرف آ جاتا۔ وہ مردوں سے بیزار رہتے۔ قریب بیٹھے مرد کو بالکل نظر انداز کر دیتے مگر عورت کو دور سے ہی آتے دیکھ کر جیوِت ہو جاتے۔ کبھی کبھی جب وہ قریب بیھٹے کسی مرد کی برائی میرے ساتھ کرتے تو میں شرمندہ ہونے لگتی۔۔۔۔

عورت کو بے حد پسند کرتے تھے۔ کہتے تھے عورت ڈانٹنے اور گالیاں دینے کے لیے نہیں بلکہ پیار کرنے کے لئے ہے۔ ایک بار اپنی نظم کی ایک لائن بھی سنائی۔ پھر اکثر ہی سناتے تھے۔ کہتے تھے،

"عورت کا برہنہ بدن میرے لیے خدا ہے۔” یہ مصرع سن کر میں دائیں بائیں دیکھنے لگتی۔ پھر مسکرا دیتی۔ عورت کا اتنا بڑا پجاری میں نے نہیں دیکھا تھا۔ کہنے والوں نے عورت کو رنگ، خوشبو کا پیکر، سنگِ مرمر، گل اور مخملیں بدن، محبت، اجالا، زندگی، کیا کیا نہیں کہا! مگر یہ ایک خیال، یہ ایک استعارہ۔۔۔ اُف!!

پچاسی سال کی عمر تھی مگر عورت کے لیے یہ گہرے جذبات اور خیالات!

میرے لیے یہ سب باتیں اور رویہ حیران کن نہیں تھا نہ شرمناک، نہ قابلِ نفرت۔ روزانہ ان سے باتیں کرتی، ان کی باتیں سنتی تھی۔ وہ بڑی بڑی نیلی آنکھیں ہر عورت میں اپنی عورت کو ڈھونڈتی تھیں۔ مگر کوئی عورت اُن کی نہیں تھی۔ وجہ بھی وہ خود بتاتے تھے۔ کہتے تھے کشور ناہید سمیت جس بھی عورت سے انہوں نے شادی کے لیے پوچھا اُس نے صاف انکار کر دیا۔ اور کہا، "تم کوئی کام تو کرتے نہیں۔” یہ الفاظ کئی بار انہوں نے مجھے بتائے۔ مگر چہرے پر مسکراہٹ ہوتی تھی۔ مسکراہٹ اس لیے کہ روپے پیسے کی اہمیت سے انہیں انکار نہیں تھا۔

میں نے ایک بار کہا، "لکھنے والوں نے ہیٹی، ہیڈا، یوسٹیشیا اور میڈم باوری کے روپ میں عورتوں کے بہت بُرے روپ دکھائے ہیں۔” کہنے لگے، "پاگل ہیں سب ۔”

کوئی بھی وہاں آ جاتا، ان کو پرواہ نہیں ہوتی تھی۔ چاہے وہ کوئی بھی فلسفہ بیان کرتا، وہ کسی کو نہیں سنتے تھے۔ بس عورت کو ڈھونڈا کرتے، عورت کو دیکھا کرتے۔ عورت کو دیکھنا چاہتے۔ عورت کو سننا چاہتے۔

ان کو کتابوں اور بیکاری سے عشق تھا اور اس عشق کی خاص بات یہ تھی کہ یہ عشق عورت کے عشق کے بر عکس ان کو میسر بھی تھا۔ لیکن لوگ کچھ بھی کہیں، مجھے ہمیشہ یہی محسوس ہوا کہ اپنی محبوب عورت یا کوئی بھی اور عورت اگر ان کو میسر آ جاتی تو عورت سے ان کا یہ والہانہ عشق تا عمر نہ رہتا کہ بدنی رشتہ قائم کر کے دوسری صنف میں چھپے راز ٹٹولنے کے بعد واپسی کا سفر شروع ہو جاتا ہے۔ وہ راز جو دونوں طرف سے ہی آشکار نہیں ہونے چاہئیں۔

انہوں نے دوسرے لوگوں کی طرح روایتی طور سے زندگی نہیں گزاری تھی۔ لیکن یہ زندگی بھی تو کوئی زندگی نہیں تھی۔ اجالوں کی خواہش تو کرنا مگر اپنی دنیا اندھیروں میں بسائے رکھنا۔ انہوں نے یا تو ہر کام ادھورا کیا یا سرے سے کیا ہی نہیں۔

بتایا کرتے تھے کہ جس لڑکی کے گھر وہ رہتے تھے وہاں بہت شور ہوتا تھا۔ وہ مطالعہ نہیں کر سکتے تھے۔ ان کی ساری کتابیں کہیں گم ہو گئی تھیں۔ لندن میں مقیم ان کی بہن سمیت جو بھی دوست اور ادارے ان کو پیسے بھیجا کرتے تھے وہ لڑکی اور اس کے گھر والے چھین لیتے۔ مجھ سے اکثر کہا کرتے تھے ، "کیا میں آپ کے ساتھ آپ کے گھر رہ سکتا ہوں؟” اور میرے پاس ان کے سوال کا کوئی جواب نہیں ہوتا تھا۔

وہ کوئی مشکل انسان نہیں تھے، نہ بیزار، نہ ذہنی الجھنوں کا شکار۔ آزادی سے محبت نے ان کو ادھورا رکھا اور تنہا بھی۔ مجھے یہ ان کی شعوری کوشش لگتی تھی کیونکہ کبھی تنہائی کا رونا نہیں رویا تھا ۔مجھے لگتا تھا کہ اگر وہ شادی کرنا چاہتے تو کر ہی لیتے۔ عورت کو لے کر ان کے دل میں اپنی کوئی جذباتی یا جسمانی لذت یا ضرورت پوری کرنے کی کوئی خواہش نہیں تھی۔ مگر شاید اس کو پوجنے میں۔۔

کوئی مخصوص فکر و نظر کے انسان نہیں تھے۔ نہ بھر بھر کے کتابیں لکھی نہ ہی کسی نظریے سے اختلاف و اتفاق کیا۔ مارکسیت ، جدیدیت ، وجودیت ، مذہب، سائنس کسی بھی چیز سے ان کا کوئی لینا دینا نہیں تھا۔ شاید وہ جو کچھ پڑھ چکے تھے اس کو ہضم کر چکے تھے۔ دوسروں کی کہی ہوئی باتوں کو دہرانا یا خود اپنی بات کہنے سے بھی ان کا کوئی سروکار نہیں تھا۔ ایک بات جو وہ باقاعدہ تو نہیں کہتے تھے مگر میں محسوس کیا کرتی تھی۔ اکیلے پن کا شکار تھے۔ تنہائی کے اس آسیب کے ساتھ رات تو کاٹ لیتے مگر دن چڑھتے ہی وہ اس جگہ آنے کے لیے پر تولتے۔ جن کو جانتے تھے ان سے وہ چار سو روپے مانگتے۔ میں نے ایک بار پوچھا آپ ہمیشہ چار سو روپے ہی کیوں مانگتے ہیں۔ کہنے لگے، یہ ماڈل ٹاون سے یہاں تک آنے کے لیے رکشہ کا کرایہ ہوتا ہے۔۔ اور جن کے ساتھ میں رہتا ہوں وہ مجھ سے پیسے چھین لیتے ہیں۔ پھر میرے پاس پورا مہینہ کوئی پیسہ نہیں ہوتا۔ وہ ہر ایک سے اتنے ہی پیسوں کا پوچھتے۔ وہ یہاں اس جگہ آنے کے لیے بے چین ہوتے تاکہ یہاں آ کر وہ لوگوں میں بیٹھ سکیں۔

کہتے ہیں کہ عورت کا کوئی گھر نہیں ہوتا۔ گھر تو اس مرد کا بھی نہیں تھا۔ یہ مردِ واحد تھا شاید جسے رہنے کو گھر کی خواہش تھی بھی نہیں۔ اسے تو بس مکان چاہیے تھا جہاں وہ تنہائی کے آسیب کے ساتھ بچی کچی زندگی سکون سے کاٹ سکے۔

ایڈگر ایلن پو، بیکٹ، کالرج، میرا جی، سلویا، ایلیا، پروین شاکر، ورجینیا، ہیمنگ وے اور کون کون!! کب زندگی کو زندگی جیسا پایا! کئی خواب تھے جو ٹوٹے، توقعات، کچھ من مندر کی تمنائیں جو کہیں محبوب کے ہاتھوں کچل دی گئیں۔ کبھی دشمن سماج ، کہیں حالات۔ مگر یہاں کیا تھا!! ایک عجیب سی بے حسی۔ دنیا کا کوئی بھی معاملہ ، کوئی نشیب و فراز ، موت، زندگی۔۔۔ کچھ بھی ان کا موضوع نہیں تھا۔ ان کے نزدیک اور کوئی دکھ حتیٰ کہ اور کوئی خوشی بھی نہیں تھی محبت کے سوا۔۔۔ محبت مگر کس سے؟؟ وہ کون تھی۔ شاید ایک۔ شاید کئی۔ شاید سب۔ مگر پھر بھی کوئی نہیں۔

کسی کو چُھونے کی خواہش بھی ایک عجیب سی سائنس ہے۔ یا نفسیات ہے۔ یا فرض۔ یا حق۔ یا تجسس یا پھر قدرتی امر کہہ دینے کی سازش۔ جو بھی ہے، کچھ تو ہے۔

میں کتنی دیر ان کے چہرے کو دیکھتی رہی۔ انہوں نے پھر سے اپنا سوال دُہرایا۔

"کیا میں آپ کو چُھو سکتا ہوں؟”

وہ مجھے دیکھ کر مسکرا رہے تھے۔ میں کچھ لمحے ان کو دیکھتی رہی، سوچتی رہی کہ کیا کہوں۔ سوچا اٹھ کر چلی جاتی ہوں۔۔۔۔۔

۔۔۔۔۔۔۔ بیٹھی رہی۔ ان کو دیکھتی رہی۔ میں ان کے چہرے کے تاثرات سے کوئی اندازہ لگانا چاہتی تھی۔ میں جلدی اپنے دماغ سے کوئی من پسند نتیجہ چاہتی تھی اور وہ اس وقت نتیجہ اخذ کرنے میں اتنی ہی دیر لگا رہا تھا۔ یہ بھی سوچا کہ میں آخر ایسے سوال پر اتنا سوچ ہی کیوں رہی ہوں۔ ساتھ ہی اندر سے یہ جواب بھی ملا کہ جس کی طرف سے یہ پوچھا گیا ہے وہ ایسا عام انسان بھی نہیں، نہ اس کا سوال۔

میں اس سوال کو نظر انداز نہ کر سکی۔ میں کوئی تجربے کرنے والی انسان نہیں اور نہ مجھے کسی دوسرے کی خواہش کی کوئی پرواہ تھی۔ نہ اعتبار۔ مگر اب ایسی بات کا جواب انکار بھی نہیں تھا کہ کیوں ایسے سوال کو اتنی اہمیت دی جائے کہ انکار میں بھی جواب دیا جائے۔

میرا ذہن کئی طرح کی باتیں بنا رہا تھا۔

مجھے اس سوال پر غصہ بھی تو نہیں آیا تھا بلکہ حیرت ہوئی تھی۔ کتنا سب کچھ سوچنے کے بعد ایک اور خیال آیا کہ اتنا نحیف، اتنا بوڑھا، اتنا بے بس انسان میرا کیا بگاڑ لے گا آخر! "ہاں کہہ دیتی ہوں۔” میں ان کی طرف دیکھتی رہی۔ وہ مسکراتے رہے۔

بالآخر گھبراتے ہوئے کہہ دیا۔ "جی ہاں۔”

بس پھر کیا تھا۔ وہ تھوڑا قریب آئے، میری طرف دیکھ کر پھر سے مسکرائے۔ کرسی کی بیک سے ٹیک لگا کر بیٹھے ہوئے تھے۔ ہاں سنتے ہی تھوڑا آگے بڑھے۔ میں نے آنکھیں بند کر لیں۔

جانے کیا ہونے والا تھا!! میں گھبرا رہی تھی۔ سوچا اگر انہوں نے کوئی عجیب حرکت کر دی تو؟ اندر سے آواز آئی، "قصور تو پھر تمہارا ہی ہوگا۔ کیوں ہاں کہی تھی۔”

ادھ کھلی آنکھ سے انہی کو دیکھ رہی تھی۔

کہ اچانک ہی۔۔۔۔

ٹیبل پر دھرے میرے ہاتھ پر۔۔۔۔۔۔

انہوں نے اپنی شہادت کی انگلی ہلکے سی رکھی اور اٹھا لی۔۔۔۔۔۔!!

یہ کیا؟؟ فٹا فٹ پوری آنکھیں کھولیں۔

دل میں سوچا! "بس؟”

انہیں دیکھا۔ وہ کتنے خوش تھے۔۔۔!

وہ جتنے خوش تھے میں اتنی حیران پریشان۔۔۔ !

"یہ تھا اس شخص کے نزدیک کسی کو چھونے کا معنی؟” دل میں سوچا۔

پھول کی کوئی مرجھائی ہوئی پتی رکھ کر اٹھا لی ہو جیسے۔

یہ معنی کتنا خوبصورت،

کتنا عجیب،

کتنا ادھورا،

کتنا مکمل۔

اتنا سا چھونے سے جسے میں محسوس بھی نہ کر پائی تھی انہیں کس قدر خوشی ملی تھی۔۔۔!! نہیں۔ خوشی نہیں ۔ شاید زندگی۔

اتنی خوشی تو کھویا ہوا خزانہ پا کر نہیں ہوتی، موت کے تخت پر زندگی پا کر نہیں ملتی، محبوب کے دیدار پر نہیں ملتی، امتحان میں کامیابی پر نہیں ملتی!!

یہ انہوں نے کیا خزانہ پا لیا تھا۔ وہ مجھے دیکھ کر مسکراتے رہے۔ اور مجھ پر بھی کوئی حقیقت آشکار ہوئی۔

میں دل ہی دل شرمندہ ہوتی رہی۔ خود کو ملامت کرتی رہی۔ میرا خیال تھا کہ خیالات کی کوئی حد نہیں ہوتی۔ مگر نہیں۔ یہ ایک لمحہ عمر بھر کی خیال پرستی کو مات دے گیا۔ اس دن پتا چلا میری بھی سوچ کی کوئی حد تھی۔ روایتی سی۔ جو بحثیتِ عورت میرے سماج کی دین تھی۔ شرمندگی سے آنکھیں موند لیں۔

وہ سگریٹ کے لیے باہر جا چکے تھے۔

کون تھا یہ؟ جسے بھرپور جنسی تجربہ کرنے میں رتی بھر دلچسپی نہ تھی۔

بدن سے بدن ملا کر لذت حاصل کرنے کے فرسودہ خیال اور تجربے سے ماورا یہ شخص! نہ خلافِ قدرت تھا نا مطابقِ قدرت۔ بس خلافِ خطہِ زمیں تھا، خطہِ خاک ہوا۔

—♦—

تنزیلہ مغل شاعرہ، مصنفہ اور گلوکارہ ہیں۔ زیادہ تر انگریزی زبان میں لکھتی ہیں، ان کی شاعری کی دو کتابیں بھی شائع ہو چکی ہیں۔ سماجی مسائل پر اکثر مضامین بھی لکھتی رہتی ہیں۔

ادارتی نوٹ: یہ مضمون سلیم الرحمٰن صاحب کی ادارت میں لاہور سے شائع ہونے والے ادبی جریدے "سویرا" کے اکتوبر 2023ء کے شمارے میں بھی شائع ہوچکا ہے۔

The post "کیا میں آپ کو چُھو سکتا ہوں؟”- زاہد ڈار- تنزیلہ مغل first appeared on Daily Lalkaar.

کارپوریٹ اداروں کی ادب اور ثقافتی سرگرمیوں کی سرپرستی: ایک پیچیدہ گفتگو

للکار نیوز — Tue, 26 Sep 2023 11:39:58 +0000

کیا ادب اور ثقافتی کوششوں کے لیے نجی کاروباری کارپوریٹ اداروں کی امداد و سرپرستی انسانی معاشروں اور انسانیت کی خودمختاری کے لیے ایک ممکنہ بڑا خطرہ ہے؟ اس سوال کا کوئی ایک سیدھا یا قطعی جواب دینا مشکل ہے۔ تاہم اس طرح کے پیچیدہ مسائل اکثر پیچیدہ اور کثیر الجہتی بحثوں کے آغاز کا سبب بنتے ہیں۔

ایک کتاب ‘لٹریری فیسٹیولز اینڈ کنٹیمپریری بک کلچر’ کی مصنفہ ڈاکٹر ملیسنٹ ویبر کی تحقیق کے مطابق؛ "ان میں (یعنی لیٹریری فیسٹولز میں) غیر متناسب طور پر مراعات یافتہ پس ِمنظر کے لوگ شرکت کرتے ہیں، عام طور پر، ان کے شرکاء امیر، پڑھے لکھے اور سفید فام ہوتے ہیں۔” (پاکستان/انڈیا کے سیاق و سباق میں ‘سفید فام’ کو ممکنہ طور پر مراعات یافتہ شہری متوسط یا امیر طبقہ کہا جا سکتا ہے۔)

عالمی کارپوریٹ سیکٹر کا ایک بڑا پلیٹ فارم، ورلڈ اکنامک فورم کے ایک تحقیقی مقالے کے مطابق، نجی کاروبار ، ثقافت اور تخلیقی سرگرمیوں کے شعبوں کے درمیان تعاون ہماری غیر مستحکم، غیر یقینی، پیچیدہ، اور مبہم دنیا کے چیلنجوں سے نمٹنے میں ہماری مدد کر سکتا ہے۔

اس کے ساتھ ساتھ کارپوریٹ سیکٹر ان فنکاروں اور ثقافتی کارکنوں کی مدد میں بھی اپنا حصہ ڈال سکتا ہے جو ناکافی معاوضے کی وجہ سے اکثر اپنے معاشروں میں مالی طور پر پسماندہ رہتے ہیں۔

تاہم کارپوریٹ سیکٹر اور ادب و ثقافت کی سرگرمیوں کے درمیان تعاون کے بارے میں خدشات اُس وقت پیدا ہوتے ہیں جب اکثر متمول مغربی ممالک میں مقیم ترقی پذیر ممالک سے آئے ہوئے تارکین وطن فنکاروں کی ساکھ کا اندازہ ان کی فطری صلاحیتوں کی بنیاد پر نہیں بلکہ شہرت کی بنیاد پر کرتا ہے۔ اس لیے یہ”شہرت “ یا ریٹنگ کا پیمانہ فنکاروں کی شناخت کی تشکیل میں تعلقات عامہ کی کمپنیوں کے کردار کو زیادہ اہم بنا دیتا ہے، اور اس طرح یہ پورا نظام کارپوریٹ طاقت کے اثر و رسوخ میں ایک اور پرت یعنی پبلک ریلیشننگ کمپنیوں کے کردار کا اضافہ کرتا ہے۔

اس موضوع کے بارے میں ایک اور نقطہ نظر یہ ہے کہ کارپوریٹ سرپرستی درحقیقت انسانی معاشرے اور انسانیت کے لیے خطرے کا باعث بن سکتی ہے خاص کر جب ان کی سرپرستی کی وجہ سے ایک ایسا ماحول پیدا ہو جس میں غلط مقاصد کے حصول کے لیے اخلاقی اور سماجی اقدار کو نقصان پہنچانے کے خطرات کو نظر انداز کیا جا رہا ہو۔

کارپوریٹ سیکٹر بے ایمانی سے ادب اور ثقافتی سرگرمیوں کو سماجی اقدار میں اپنے کاروباری مقاصد کے لیے تبدیلیاں لانے کے آلات کے طور پر استعمال کر سکتا ہے۔ صارفین، ملازمین، یا معاشرتی گروہوں کو ان کے وقار، خودمختاری، حقوق یا مفادات کا خیال کیے بغیر انہیں منفی انداز میں متاثر کر سکتا ہے۔

اس قسم کی سرپرستی کے نتیجے میں کاروباری اداروں اور ثقافتی سرگرمیوں کے شعبوں کے درمیان تعاون کے اس عمل سے کارپوریٹ اقدار اور اصول ادب اور ثقافتی سرگرمیوں پر غالب ہو سکتے ہیں، جس سے ادب اور ثقافتی سرگرمیوں کی خود مختاری، تنوع اور حق گوئی کی صلاحیت خطرے میں پڑ سکتی ہے۔ اس لحاظ سے ادب اور ثقافتی سرگرمیاں انسانی ایجنسی کے تخلیقی اظہار کو آزادی سے پیش کرنے کے بجائے کارپوریٹ مفادات کی خدمت کرتے ہوئے نظر آئیں گی۔

مزید برآں ادب اور ثقافتی سرگرمیوں کی "سرپرستی” کے ذریعے کارپوریٹ سیکٹر کی ہیرا پھیری کی صلاحیت اور طاقت میں اضافہ ہوجاتا ہے۔ اس کے بیرون ملک میں آباد تارکین وطن جو ہر وقت تفریحی تقریبات کے منتظر رہتے ہیں وہ بغیر سوال کیے کارپوریٹ سرپرستی کو لاشعوری طور پر قبول کر لیتے ہیں اور انہیں اس بات کا اندازہ ہی نہیں ہوتا ہے کہ انہوں نے اپنے ادب و ثقافت میں پنہاں سچ پر سمجھوتہ کر لیا ہے۔

مختلف آراء

کاپوریٹ سیکٹر کی سرپرستی کو مختلف زاویوں سے پرکھا جا سکتا ہے۔ مارکسی یا بائیں بازو کے نقطہ نظر سے ادبی اور ثقافتی سرگرمیوں کی کارپوریٹ سیکٹر کی سرپرستی کے بارے میں رائے مختلف زاویوں سے تجزیوں کی بنیاد پر مختلف ہوتی ہے:

• کچھ مارکسسٹ کارپوریٹ سیکٹر کی سرپرستی کو ثقافت پر اس کی بالادستی کی ایک شکل کے طور پر دیکھتے ہیں، جہاں سماجی طور پر معاشرے کا غالب اور مراعات یافتہ طبقہ مخصوص ادبی اور ثقافتی سرگرمیوں کو فنڈ اور فروغ دے کر ثقافتی اور نظریاتی منظر نامے کو اپنے حق میں ڈھالتا ہے۔ یہ انتونیو گرامچی کے ثقافتی بالادستی کے تصور سے اخذ کرتے ہوئے عوام کو ان کے استحصال اور جبر کے بارے میں تنقیدی بیداری پیدا کرنے سے روک سکتا ہے۔

• کچھ بائیں بازو کے دانشوران کارپوریٹ سیکٹر کی سرپرستی کو ادب اور ثقافتی سرگرمیوں سے ایک ایسے تعاون کے طور پر دیکھتے ہیں، جہاں کارپوریٹ سیکٹر فائدے یا علامتی انعامات کی پیشکش کرکے امیر طبقے پر بائیں بازو کی ممکنہ تنقید کرنے والے ناقدین کو بے اثر اور غیر مسلح کرنے کی کوشش کرتا ہے۔ رابرٹ مشیلز کے تصور کے مطابق، ایسا عمل غیر اخلاقی طریقوں سے کارپوریٹ سیکٹر کی اس بدمعاشی سے لوگوں کی توجہ ہٹاتا ہے اور کارپوریٹ سیکٹر کی ساکھ اور طاقت میں اضافہ کرتا ہے۔ اس کی سب سے بڑی مثال فارماسوٹیکل کمپنیوں کی جانب سے ڈاکٹروں کی ثقافتی سرگرمیوں کے لیے عطیات دینا ہے جس کے ذریعے وہ اپنی مصنوعات پر ڈاکٹروں کی ممکنہ تنقید کو تقریباً ناممکن بنا دیتی ہیں۔

• مارکسسٹ اسے کموڈیفیکیشن سے بھی تعبیر کر سکتے ہیں، جہاں کارپوریٹ سیکٹر ادبی اور ثقافتی سرگرمیوں کو قابل فروخت مصنوعات میں تبدیل کرتا ہے، ممکنہ طور پر ان کی فنکارانہ ساکھ سے سمجھوتہ کرتا ہے اور کارل مارکس کے کموڈیفیکیشن کے تصور کے مطابق، ان سرگرمیوں پر سرمایہ کاری کرکے منافع بنانے کے آلات قرار دیتا ہے۔

•اس کے برعکس، کچھ لبرلز کارپوریٹ سیکٹر کی سرپرستی کو کارپوریٹ سیکٹر اور ادب و ثقافتی سرگرمیوں کے درمیان تعاون کو دونوں کے لیے باہمی طور پر سودمند قراردیتے ہیں۔ ان لبرلز کے خیال میں کارپوریٹ سیکٹر باہمی طور پر فائدہ مند طریقوں سے ثقافتی سرگرمیوں کی مدد کرتا ہے اور وہ خود مختاری کے ساتھ حق گوئی کا کام جاری کرتے ہیں۔ لبرلز کا یہ نظریہ امریکی عملیت پسند، جان ڈیوی (John Dewey) کے تعاون کے تصور کی بازگشت ہے جس کے مطابق اس سرپرستی کے ذریعے کارپوریٹ سیکٹر معاشرے میں مثبت کردار ادا کرتا ہے۔

ایک تنقیدی ویب سائیٹ” سپرنگرلنک“ (SpringerLink) نے زور دیا ہے کہ انسان دوست ماحول کی تشکیل کا عمل یعنی انسانی اقدار کے معاشرے کا فروغ افراد کے مجموعی نظریہ اور مشترکہ بھلائی کے بغیر ممکن نہیں ہے۔ تاہم کارپوریٹ کلچر بعض اوقات لوگوں کی بھلائی پر اپنے منافع کو ترجیح دے کر، مراعات کو غلط انداز میں، یا غیر ذمہ دارانہ طور پر انسانی اقدار کو خطرے میں ڈال کر ان اصولوں سے متصادم بنتا ہے۔

اس طرح خودمختار اور مستند ادبی اور ثقافتی سرگرمیوں کے لیے سب سے بڑا خطرہ کارپوریٹ سیکٹر کی سرپرستی بن جاتا ہے کیونکہ اس کے لیے منافع یا اپنی کاروباری ”گُڈوِل “ (goodwill) زیادہ اہم ہوتی ہے۔ ایسے خطرے کی ابتدا سیاسی، سٹریٹجک اور جوڑ توڑ کی مداخلتوں سے ہوتی ہے جس کا مقصد معاشرے کی ثقافتی اقدار اور بنیادوں کو کھوکھلا کر کے مغربی اقدار کو متعارف کرانا ہوتا ہے۔

ترقی پذیر ممالک، جہاں فنکاروں کو کم معاوضہ دیا جاتا ہے، متوسط طبقے کے پاس فن کو سپورٹ کرنے کے لیے وسائل کی کمی ہوتی ہے، اور قوم پرست کارپوریٹ سیکٹر عالمی کاروباری کارپوریشنز سے مقابلہ کرنے کے قابل نہیں ہوتا ہے تو پھر وہ ان کےسامنے بے بس نظر آتا ہے۔ اور قوم پرست یا تو عالمی کارپوریٹ سیکٹر کو جوائن کر لیتا ہے یا تباہ ہوجاتا ہے۔

ایک اور اہم نکتہ یہ ہےکہ بہت سے ترقی پذیر معاشروں میں ریگولیٹری فریم ورک اور قواعد و ضوابط کا فقدان ہے جو کارپوریٹ سیکٹر کے ادبی اور ثقافتی اقدار کو ان کے پوشیدہ کاروباری ایجنڈوں کو ہیرا پھیری سے روکنے کے لیے استعمال کیے جا سکتے ہیں۔ لیکن ترقی پذیر معاشرے بھی اس کارپوریٹ سیکٹرز کے سامنے بالکل بے بس نظر آتے ہیں۔ اس کی واضح مثال افریقہ کی کمزور ریاستیں ہیں جہاں کے لوگ اپنی تاریخی ثقافت کا ایک گھٹیا ثقافت کے طور ادراک کرتے ہیں۔

اس کے علاوہ، ادبی اور ثقافتی سرگرمیوں کی کارپوریٹ سیکٹر کی سرپرستی "ایلیٹ کلچر” کو تقویت دیتی ہے، جو ثقافتی سامراج کے اثر و نفوذ کو بڑھانے کا ایک بڑا آلۂِ کار طبقہ ثابت ہوتا ہے، کیونکہ یہ طبقہ عام دیگر ثقافتوں کو پرکھنے اور اپنی ثقافتی اقدار کو تبدیل کرنے کے لیے استعمال ہونے والے معیارات اور ماڈلز قائم کرتا ہے۔

اس لیے ان آلۂِ کار طبقوں کی جانب بیرونی ممالک سے رقم پانی کی بہتی ہے۔ مغربی این جی اوز غریب ممالک کی این جی اوز پر اپنا اثر و رسوخ بڑھاتی ہیں، سیاسی اور سماجی انجینئرنگ کے مقاصد کے لیے سماجی ایجنڈے کے ڈسکورس کو تشکیل دیتی ہیں۔ یعنی سادہ الفاظ میں، پیسہ پھینک تماشہ دیکھ۔ اور رقم کی یہ ترسیل ان طبقوں کو اپنا قومی تشخص اور ثقافت کو مغربی کمرشل اقدار کے زیر نگیں کرنے میں کوئی برائی محسوس نہیں ہوتی ہے۔ غیر پارلیمانی الفاظ میں یہ طبقہ “دلّا گیروں” کا کردار ادا کرتا ہے۔

ایسے پیچیدہ حالات میں ترقی پسندوں کے لیے آگے بڑھنے کا بہترین راستہ یہ نہیں ہے کہ وہ عالمی کاپوریٹ سیکٹر کو کہیں کہ جب وہ مقامی ادبی اور ثقافتی سرگرمیاں کی سرپرستی کرتے ہیں تو مقامی ادبی شخصیات اور ثقافتی کارکنوں کی مالی مدد کریں لیکن ان کی تخلیقی آزادی کو بھی تسلیم کریں۔ ایسا کہنا مشکل ہی نہیں بلکہ ناممکن ہی ہے۔کوئی کمپنی اگر مالی مدد دیتی ہے تو اپنے کاروباری مفاد کے لیے کرتی ہے، "جنت میں گھر بنانے کے لیے نہیں”۔

اس کے بجائے، ایک زیادہ تعمیری حکمت عملی یہ ہوسکتی ہے کہ نچلے طبقات کی تنظیمیں آگے بڑھیں اور کمیونٹی کے اندر معروف اور معزز دانشوروں کی حمایت سے ادیب شاعر اور فنکاروں کی مالی امداد کریں اور ادب اور ثقافتی سرگرمیوں کو منظم کریں، نہ کہ اس مقصد کے لیے عالمی کارپوریٹ سے مالی امداد مانگیں۔ (بھارت کے پاس کمیونٹی کے اندر مالی طور پر مضبوط، اچھی شہرت و ساکھ والا اور معزز دانشور طبقہ موجود ہے، لیکن پاکستان میں ایسا نہیں ہے، اس لیے پاکستان میں یہ کام کرنا کافی مشکل ہے۔)

ہمارے ادب اور ثقافت کی اپنی اقدار کے مطابق تشکیل میں غیر ملکی اور عالمی کارپوریشنوں کے بڑھتے ہوئے اثر و رسوخ کا مقابلہ کرنے کے لیے ہمارے عام لوگوں کو بھی جن میں مزدور، طلبا، کسان، اساتذہ قومی کاروباری طبقے وغیرہ کو بڑھ چڑھ کر اپنے مقامی اچھی شہرت و ساکھ رکھنے والوں اور معزز دانشوروں کی کوششوں کا ساتھ دینا اشد ضروری ہے۔ ایسا کرنے میں ناکامی ہوئی تو ہمیں کارپوریٹ سیکٹر کے زیر کنٹرول "زندہ لاش” بننے سے کوئی نہیں بچا سکتا ہے۔

—♦—

ثقلین امام برطانیہ کے شہر لندن میں مقیم صحافی ہیں۔ آپ سیاسی و سماجی مسائل پر اکثر لکھتے رہتے ہیں۔

The post کارپوریٹ اداروں کی ادب اور ثقافتی سرگرمیوں کی سرپرستی: ایک پیچیدہ گفتگو first appeared on Daily Lalkaar.