War - Daily Lalkaar

’مارکس وادی‘ کا مذہبی رجعت پسندی کو سجدہ: موقع پر ستی یا فکری دیوالیہ پن؟-تحریر: طارق شہزاد

للکار نیوز — Tue, 14 Jul 2026 05:54:41 +0000

گزشتہ چند روز سے حقوقِ خلق پارٹی کے راہنما عمار علی جان اپنے تین رکنی وفد کے ہمراہ ایران کے دورے پر ہیں۔ ان کا یہ خصوصی دورہ امریکی واسرائیلی حملوں میں ہلاک ہونے والے ایرانی سپریم لیڈر سید علی حسینی خامنائی کی آخری رسومات میں شرکت کرنا تھا۔ عمار جان کی فیس بک پر کی گئی ایک فخریہ پوسٹ پر بائیں بازو کے متعدد لوگ ان کے اس دورے پر بات کر رہے ہیں، جس پر عمار جان نے ایک تفصیلی پوسٹ لکھتے ہوئے کہا کہ؛

 ”دلچسپ بات یہ ہے کہ ایران میں جنازے کے لئے ہمیں دعوت وہاں کے لیفٹ کے گروپ نے دی۔ لبنان، فلسطین، امریکہ، اٹلی، چین، کیوبا، روس، وینزویلا، برازیل، کینیا، جنوبی افریقہ اور دیگر کئی ممالک کے کمیونسٹ اور سوشلسٹ پارٹیوں کے نمائندے ان تقریبات میں شامل تھے۔ سوال ہے کہ کیا وہ سب کسی مذہبی فرقے سے عقیدت میں آئے تھے یا معروضی و تاریخی حالات کا تجزیہ کرکے علی خامنائی کو خراج عقیدت پیش کررہے تھے؟“

عمار جان نے اپنی اس پوسٹ میں ان کے اس عمل پر تنقید کرتے ہوئے جوابی حملے کرکے انہیں لبرل اور اسرائیل کے حامی ہونے کے القابات سے بھی نوازا ہے۔ اب آئیے اس ضمن میں چند بنیادی عناصر پربات کرلیتے ہیں۔ عمار جان جو کہ سوشلسٹ ہونے کے دعویدار ہیں اور یہ مختلف جامعات میں تاریخ اور سیاسیات بھی پڑھاتے ہیں۔ لیکن افسوس کہ انہوں نے نہ تو تاریخ سے کچھ سیکھا ہے اور نہ ہی یہ نظریاتی سیاست کے بنیادی اصولوں پر عمل پیرا ہیں (ناواقف یا نابلد میں بالکل نہیں کہوں گا کیونکہ موصوف کئی برسوں سے کسی نہ کسی طورپر بائیں بازو کی سیاست میں شامل رہے ہیں)۔

آگے چل کر اسی پوسٹ میں لکھتے ہیں کہ؛

”سیاسی تجزیہ کرنے کے لئے یہ بہت ضروری ہے کہ معروض کے اندر موجود تضادات کا صحیح ادراک کیا جائے اور خصوصی طور پر کسی بھی لڑائی کے دوران بنیادی تضاد کی نشاندہی کی جائے۔ مغربی ایشیا میں 1945سے لے کر اب تک بنیادی تضاد کیا رہا ہے؟ بلاشبہ یہ تضاد امریکی اور صہونی قوتوں کیاس خطے میں غلبہ ہے جس نے نہ صرف فلسطین کے وجود کو مٹا دیا بلکہ پورے خطے کو عسکری نظریے کے تابع کردیا۔ یہ عالمی سطح پر طبقاتی جدوجہد کی ایک علامت ہے کیونکہ سامراج غریب ممالک کے وسائل پر ملٹی نیشنل کمپنیوں کے راج کی ایک مثال ہے۔“

اوپر دئیے گئے کوٹ میں موصوف نے ایران اور امریکہ کی حالیہ لڑائی کو بنیادی تضاد قرار دیا، مگر ایرانی ریاست کے طبقاتی کردار، اندرونی جبر اور گزشتہ کئی دہائیوں کی توسیع پسندانہ پالیسیوں سے بالکل ہی آنکھیں موند لی ہیں۔موصوف جس کو بنیادی تضاد فرما رہے ہیں کیا یہ واقعی بنیادی سماجی تضاد ہے؟ نہیں۔۔۔ ہر گز نہیں! ایسی توجیہات محض اپنے موقع پر ستانہ عمل کو جائز اور درست قرار دینے کے لئے گھڑی جاتی ہیں یا پھر یہ نظریاتی دیوالیہ پن کا اظہار ہے۔ اب جبکہ عمار جان اس لڑائی کو بنیادی تضاد قرار دے چکے ہیں تو پھر یقیناً ان کے نزدیک طبقاتی سوال تو شاید کوئی سائیڈ ایشو رہ گیا

ہو۔۔۔

ان موصوف سے سوال یہ بھی ہے کہ کیا یہ واقعی سامراج مخالف جنگ ہے، یا خطے میں دو رجعت پسند قوتوں کے درمیان طاقت کی کشمکش؟جس کی پشت پناہی امریکی سامراج کر رہا ہے۔ انہوں نے سوال کرنے والوں کو خوب تنقید کا نشانہ بنایا ہے۔ بنیادی بات یہ ہے کہ جب کسی کے پاس تنقید کا جواب نہ ہو تو وہ عموماً دو کام کرتا ہے پہلا یہ کہ وہ ناقد پر کوئی لیبل لگا دیا ہے، یا یہ کہہ دیتا ہے کہ”اور بھی لوگ یہی کر رہے تھے“۔ مگریہ بھی یاد رکھنا چاہئے کہ کسی عمل کا اجتماعی ہونا، اسے درست ثابت نہیں

کرتا۔!

اب آئیے ڈاکٹر عمار جان کے مؤقف کو ذرا تاریخ کی روشنی میں دیکھتے ہیں۔ مجھے یقین ہے کہ انہوں نے بھی لازمی طور پر یہ تاریخ ضرورپڑھ رکھی ہوگی۔ تو چلتے ہیں گزشتہ 5دہائیوں کی ایرانی تاریخ کی طرف۔سقوطِ شاہ کے بعد آیت اللہ خمینی کے دورِ حکومت میں مارکسسٹ، سوشلسٹ اور بائیں بازو کی دیگر تنظیموں بشمول تودہ پارٹی (Tudeh Party) اور سازمانِ فدایانِ خلق (Fadayan-e-Khalq) کے ہزاروں کارکنان اور رہنماؤں کو ماورائے عدالت موت کے گھاٹ اتارا گیا۔ جو 1981 سے 1988 کے کریک ڈاؤن اور بالخصوص 1988 کے بدنامِ زمانہ قیدیوں کے قتلِ عام کے دوران مروائے گئے۔

ملائیت کی بربریت کا اندازہ آپ اس بات سے لگا لیجئے کہ جولائی 1988ء میں آیت اللہ خمینی نے جیلوں میں بند سیاسی قیدیوں کو سزائے موت دینے کا ایک خفیہ فتویٰ جاری کیا۔ اور محض پانچ ماہ میں مجموعی ہلاکتوں کی تعدادتقریباً 30ہزار قیدیوں کو پھانسی دی گئی۔ مقتولین کی اکثریت مجاہدینِ خلق (MEK) سے تھی، تاہم تودہ پارٹی اور فدایانِ خلق (اکثریت اور اقلیت دونوں دھڑوں) کے سینکڑوں سوشلسٹ کارکنان اور دانشور بھی شامل تھے جنہیں نظریات تبدیل نہ کرنے پر سزائے موت دی گئی۔ اور تودہ پارٹی پر(Tudeh Party)1982-83ء میں یہ کہہ کر کریک ڈاؤن کیا گیا کہ تودہ پارٹی سوویت یونین کے لئے جاسوسی کرتی ہے۔ حالانکہ یہی تودہ پارٹی نے ابتداء میں اسلامی حکومت کی حمایت کی تھی، خمینی حکومت نے ان پر سوویت یونین کے لیے جاسوسی اور بغاوت کا الزام لگا کر پابندی عائد کر دی۔اس کے ساتھ ہی پارٹی کے سینئر رہنماؤں، دانشوروں اور فوج میں موجود ہمدردوں کو گرفتار کیا گیا۔اور فروری 1984ء میں ایرانی بحریہ کے سابق کمانڈر بہرام افضلی سمیت تودہ پارٹی کے 10 مرکزی رہنماؤں کو ایک ساتھ فائرنگ اسکواڈ کے ذریعے ہلاک کیا گیا۔

اور دوسری طرف فدایانِ خلق (اقلیت) نے شروع سے ہی خمینی کی تھیوکریسی کی مخالفت کی تھی، جس کے نتیجے میں کردستان اور دیگر علاقوں میں ان کے خلاف خونی فوجی کارروائیاں کی گئیں۔اور انہیں جیلوں میں قتل کیا گیا، تنظیم کا وہ دھڑا جس نے حکومت کے ساتھ مفاہمت کی کوشش کی تھی (فدایانِ خلق – اکثریت)، انہیں بھی خمینی نے نہیں بخشا اور ان کے سینکڑوں ارکان کو گرفتار کر نے کے بعد 1988ء کے قتلِ عام میں پھانسیاں دے دی گئیں۔

ملائیت کی بربریت کا اندازہ اس سے بھی لگا لیجئے کہ قیدیوں کی موت کا فیصلہ کرنے کے لیے باقاعدہ ”ڈیتھ کمیٹیاں“ بنائی گئی تھیں، جو قیدیوں سے ان کے مذہبی اور سیاسی نظریات پر سوال کرتی تھیں۔ اگر کوئی سوشلسٹ حکومت کے حق میں بیان دینے سے انکار کرتا، تو اسے فوراً پھانسی کی طرف بھیج دیا جاتا۔اور ان تمام سوشلسٹ اور سیکولر قیدیوں کی لاشیں لواحقین کے حوالے کرنے کے بجائے تہران کے قریب خاوران قبرستان کی اجتماعی اور گمنام قبروں میں دفن کر دی گئیں۔

ڈاکٹر عمار علی جان جو کہ دنیا کی بہترین یونیوسٹیوں سے تاریخ اور سیاسیات میں ڈاکٹریٹ کر چکے ہیں اور اب متعدد پاکستانی جامعات میں پڑھاتے بھی ہیں تو کیا انہیں 1980ء کی دہائی میں تودہ پارٹی، فدایانِ خلق اور ہزاروں مارکسسٹوں کے قتل،اور 2022ء کی ”زن، زندگی، آزادی“ تحریک، کے ساتھ ساتھ مزدوروں، اساتذہ اور ٹرک ڈرائیورز کی حالیہ جدوجہد کا بالکل بھی علم نہیں ہے؟ یقیناً یہ سب جانتے ہیں! مگر ان کے پیش کردہ ”تجزیے“ یا دفاع میں یہ تمام حقائق مکمل طور پر غائب ہیں۔ سامراج کی مخالفت ضروری ہے، مگر اس کے ساتھ ریاستی جبر پر خاموشی اختیار کرنا اُصولی مؤقف نہیں ہو سکتا۔اگرتو موصوف یہ دلیل بھی دیں کہ”دشمن کا دشمن دوست ہے“، تو پھر یہی منطق طالبان، حزب اللہ، حماس اور جماعت اسلامی بارے بھی درست ہونی چاہئے۔

ایرانی پاسدارانِ انقلاب ریاست کے اوپر ایک ریاست ہے جس کا بنیادی مقصد ہی ایرانی ملائیت کے احکامات کا ہر طرح سے نفاذ عمل میں لانا ہے۔ ایسی ریاست کی نہ صرف حمایت کرنا بلکہ اس کے مذہبی پیشوا کی آخری رسومات میں شرکت کرتے ہوئے اسے باعث افتخار قرار دینا اور خود کو سوشلسٹ بھی کہنا دونوں ان کی اپنی سوچ کے اندر کے تضادات کی وضاحت کے سوا کچھ نہیں۔ اوپر سے جن افراد نے ان کے اس متضاد دورے پر سوالات اٹھائے ان پر ’لبرل‘ ہونے کا فتویٰ جاری کر دیا۔ حالانکہ موصوف کی ساری سیاست اور ان کا ہر عمل گہرے تضادات کا نمونہ ہے۔ ان کے والد محترم پیپلز پارٹی کے جیالے ہیں جبکہ ان کی ہمشیرہ پیپلز پارٹی میں سنٹرل پنجاب کی ڈپٹی انفارمیشن سیکرٹری ہیں۔اور کچھ عرصہ قبل عمار علی جان نے بھی پیپلز پارٹی کی قربت کی بہت کوششیں کیں لیکن لگتا ہے کہ ان کی بات نہیں بن پائی۔ اور اب موصوف عمران خان کی رہائی کے لئے سرتوڑ کوششوں میں بھی مصروف ہیں۔ اس ضمن میں تحریک تحفظ آئین پاکستان جو کہ تحریک انصاف سمیت متعدد سرمایہ داری کی حامی اور مذہبی جماعتوں کا اتحاد ہے، اس میں شامل ہیں۔

ایسی سیاسی چھلانگیں کوئی اس وقت ہی لگا سکتا ہے کہ جب یا تو انتہا درجے کی موقع پرستی کسی کے پیش نظر ہو یا پھر کوئی نظریاتی دیوالیہ پن کا شکار ہوجائے۔

—♦—

مصنف کے بارے

طارق شہزاد ڈیلی للکار کے ایڈیٹر ہیں، اورگزشتہ 28 سالوں سے بائیں بازو کی تحریک کے ساتھ وابستہ ہیں۔ پاکستان میں محنت کشوں اور محروم طبقات کی نمائندہ سیاسی جماعت کے قیام کی کاوشیں کرتے چلے آرہے ہیں۔ آپ بائیں بازو کے متحرک نظریاتی لوگوں میں سے ہیں اور سیاسی، سماجی ، معاشی مسائل پر لکھتے رہتے ہیں۔

Lorem ipsum dolor sit amet, consectetur adipiscing elit. Ut elit tellus, luctus nec ullamcorper mattis, pulvinar dapibus leo.

The post ’مارکس وادی‘ کا مذہبی رجعت پسندی کو سجدہ: موقع پر ستی یا فکری دیوالیہ پن؟-تحریر: طارق شہزاد first appeared on Daily Lalkaar.

اے شریف انسانو! – ساحر لدھیانویؔ

للکار نیوز — Thu, 18 Apr 2024 09:27:12 +0000

خون اپنا ہو یا پرایا ہو

نسل آدم کا خون ہے آخر

جنگ مشرق میں ہو کہ مغرب میں

امن عالم کا خون ہے آخر

بم گھروں پر گریں کہ سرحد پر

رُوح تعمیر زخم کھاتی ہے

کھیت اپنے جلیں کہ اوروں کے

زیست فاقوں سے تلملاتی ہے

ٹینک آگے بڑھیں کہ پچھے ہٹیں

کوکھ دھرتی کی بانجھ ہوتی ہے

فتح کا جشن ہو کہ ہار کا سوگ

زندگی میتوں پہ روتی ہے

جنگ تو خود ہی ایک مسئلہ ہے

جنگ کیا مسئلوں کا حل دے گی

آگ اور خون آج بخشے گی

بھوک اور احتیاج کل دے گی

اس لئے اے شریف انسانو

جنگ ٹلتی رہے تو بہتر ہے

آپ اور ہم سبھی کے آنگن میں

شمع جلتی رہے تو بہتر ہے

برتری کے ثبوت کی خاطر

خوں بہانا ہی کیا ضروری ہے

گھر کی تاریکیاں مٹانے کو

گھر جلانا ہی کیا ضروری ہے

جنگ کے اور بھی تو میداں ہیں

صرف میدان کشت و خوں ہی نہیں

حاصل زندگی خرد بھی ہے

حاصل زندگی جنوں ہی نہیں

آؤ اس تیرہ بخت دنیا میں

فکر کی روشنی کو عام کریں

امن کو جن سے تقویت پہنچے

ایسی جنگوں کا اہتمام کریں

جنگ وحشت سے بربریت سے

امن تہذیب و ارتقا کے لئے

جنگ مرگ آفریں سیاست سے

امن انسان کی بقا کے لیے

جنگ افلاس اور غلامی سے

امن بہتر نظام کی خاطر

جنگ بھٹکی ہوئی قیادت سے

امن بے بس عوام کی خاطر

جنگ سرمائے کے تسلط سے

امن جمہور کی خوشی کے لیے

جنگ جنگوں کے فلسفے کے خلاف

امن پُر امن زندگی کے لیے

—♦—

The post اے شریف انسانو! – ساحر لدھیانویؔ first appeared on Daily Lalkaar.

زوال پذیر امریکی سامراج! (نظم) – شاعر: ڈاکٹر طاہر شبّیر

للکار نیوز — Tue, 16 Jan 2024 08:48:41 +0000

ایک قیامت برپا کی ہے اہلِ اسرائیل نے پھر

آگ کی بارش برسادی ہے اہلِ اسرائیل نے پھر

کتنی وحشت پھیلا دی ہے اہلِ اسرائیل نے پھر

کیسی ذِلّت اپنا لی ہے اہلِ اسرائیل نے پھر

دھن دولت کی پوجا کی ہے اہلِ اسرائیل نے پھر

پھریں گے سارے مارے مارے اک دن اسرائیل میں بھی
رقص کرے گی موت کی دیوی اِک دن اسرائیل میں بھی

دُنیا بھر کے ملکوں میں امریکہ کا کھیل جاری ہے

ساری تیسری دُنیا میں پھیلی غربت اور بیماری

دُنیا بھر کے ملکوں کو لُوٹا اُس نے باری باری

اسلامی ملکوں میں ہے امریکہ کی تھانیداری

اُس سے دوستی ساروں کو پڑی ہے اب تک بہت ہی بھاری

اُس کے دل پر چلیں گے آرے اک دن اسرائیل میں بھی

رقص کرے گی موت کی دیوی اِک دن اسرائیل میں بھی

دہشت گردوں کی سرداری امریکہ کا پیشہ ہے

قتل و غارت رکھنا جاری امریکہ کا پیشہ ہے

لُو ٹنا سب کو باری باری امریکہ کا پیشہ ہے

پھیلانا غربت بیماری امریکہ کا پیشہ ہے

اور پھر اُس کی پردہ داری امریکہ کا پیشہ ہے

بنیں گے مقتل، مکتب سارے اِک دن اسرائیل میں بھی

رقص کرے گی موت کی دیوی اِک دن اسرائیل میں بھی

دیکھنا اِک دن کوئی مسیحا ہٹلر بن آ سکتا ہے

اُن کی گلیوں میں بھی وہ اُن کا خون بہا سکتا ہے

اِک دن پھر وہ بھٹی میں اُن کے جسم چلا سکتا ہے

وہ بھی اُن کے بچوں کو موت کی نیند سُلا سکتا ہے

خوف کا سایہ اُن کے سر پر وحشت بن چھا سکتا ہے

لمحے ہوں گے موت سے بھاری اِک دن اسرائیل میں بھی

رقص کرے گی موت کی دیوی اِک دن اسرائیل میں بھی

—♦—

مصنف کے بارے

ڈاکٹر طاہر شبّیر کا تعلق لاہور سے ہے۔ آپ پیشے کے اعتبار سے میڈیکل ڈاکٹر ہیں۔ آپ ترقی پسند شاعر اور ادیب ہیں۔ انجمن ترقی پسند مصّنفین پنجاب کے اہم رُکن ہیں۔ آپ پاکستان کے سیاسی و سماجی مسائل پر لکھتے رہتے ہیں۔

The post زوال پذیر امریکی سامراج! (نظم) – شاعر: ڈاکٹر طاہر شبّیر first appeared on Daily Lalkaar.

فلسطین کی جدوجہدِ آزادی زندہ باد ۔ عاصم علی شاہ

للکار نیوز — Tue, 24 Oct 2023 22:40:25 +0000

فلسطین میں گزشتہ کئی دنوں سے جاری اسرائیلی جارحیت کے نتیجے میں اب تک ہزاروں بے گناہ افراد اپنی جانوں سے ہاتھ دھو چکے ہیں اور اَن گنت زخمی ہو چکے ہیں۔ ہسپتالوں اور شہری علاقوں پر وحشیانہ بمباری جاری ہے۔ غزہ میں فلسطینی خوراک، پانی اور بجلی کے بغیر زندگی گزار رہے ہیں۔ اسرائیلی فضائی حملوں کے نتیجے میں غزہ کی پٹی زمین بوس ہو رہی ہے۔
فلسطین کی جدوجہد آزادی میں مزاحمت کے کئی طریقے اور رجحانات پائے جاتے ہیں جن میں مارکسی تنظیموں کے ساتھ ساتھ اسلامی تنظیمیں بھی شامل ہیں۔

تشدد کے حالیہ المناک واقعات کے پس پردہ اسرائیل کی طرف سے مقبوضہ فلسطینی علاقوں پر جاری غاصبانہ قبضہ اور غیر قانونی آباد کاری، چیک پوسٹوں پر روزانہ کی بنیاد پر ڈھائے جانے والے مظالم اور غزہ کی پٹی کی ناکہ بندی ہے جو فلسطینی عوام کے خلاف برسوں سے جاری ہے۔

فلسطینیوں کے خلاف مظالم کے ارتکاب میں اسرائیل کو بڑی سامراجی طاقتوں، یعنی امریکہ،برطانیہ، کینیڈا، یورپی یونین اور ان کے باقی اتحادیوں کی مکمل آشیرباد حاصل ہے، اور یہ مظالم حالیہ برسوں میں مزید سفاک ہو چکے ہیں۔

فقط فلسطین اور اسرائیل ہی نہیں بلکہ مشرق وسطیٰ میں بھی لوگوں کے لیے امن و سلامتی کا حصول اور اسے مستحکم کرنے کا واحد راستہ مقبوضہ علاقوں میں سے اسرائیلی قبضے اور آباد کاری کو فوری طور پر ختم کرنے میں مضمر ہے۔

اقوام متحدہ کی قراردادوں کے مطابق مشرقی یروشلم کے ساتھ 1967 کی سرحدوں پر ایک آزاد فلسطینی ریاست کا قیام اور فلسطینی پناہ گزینوں کی واپسی کے حق کی ضمانت دینا ہے۔

ان قراردادوں کے برعکس اسرائیل اور اس کی اتحادی قوتیں سامراجی جرائم کو جاری و ساری رکھے ہوئے ہیں اور انسداد دہشت گردی اور اسلامی انتہا پسندی کے خاتمے کے نعرے کی آڑ میں وہ فلسطینی عوام کی نسل کشی کی پالیسی پر کار فرما ہیں۔ ان دعووں کی آڑ میں انہیں فلسطینی عوام کو نیست و نابود کرنے کے لئے خطے میں خون خرابہ اور عدم استحکام ایک نیا جواز مل گیا ہے۔

اسرائیل جارحیت کی حالیہ پالیسی کی عالمی سامراجی قوتوں کی لیڈرشپ نے نہ صرف شدومد سے حمایت کی اور فلسطینی عوام کے خلاف جرائم اور قتل عام پر آنکھیں بند کر کے قبضے اور استعمار کو برقرار رکھنے میں اپنا کردار ادا کیا بلکہ ایسی راۓ عامہ بنانے کی کوشش کی جس میں اسرائیل کو فلسطینی جارحیت کا شکار بنا کر پیش کیا۔

یہ منافقت اور جھوٹ کا ایک ایسا پلندہ ہے جس کے خلاف دنیا بھر کے امن پسند عوام سراپا احتجاج ہیں اور فلسطینی عوام سے یک جہتی دکھانے سڑکوں پر نکل آئے ہیں ۔

ترقی پسند قوتوں کو اصولی طور پر فلسطینی عوام کے مصائب اور قومی آزادی کی جدوجہد کرنے والی قوتوں کے ساتھ کھڑا ہونا چاہیے اور فلسطینی عوام پر مسلط اس وحشیانہ جنگ کی بھرپور مذمت کرنا چاہیے جس کا واحد مقصد اسلحے کے وحشیانہ استعمال کے ذریعے فلسطینی سرزمین پر قبضے کو دوام بخشنا اور نوآبادیاتی نظام کو برقرار رکھنا ہے۔ ہمیں فلسطینی علاقوں میں قائم یہودی بستیوں کے خاتمے اور فلسطینی پناہ گزینوں کے امن و سلامتی کے ساتھ اپنے گھروں کو واپس جانے کے حق کی حمایت کرنا چاہیے۔

—♦—

عاصم علی شاہ نیشنل سٹوڈنٹس فیڈریشن پاکستان کے سابق راہنما ہیں اور عرصہ دراز سے لندن میں مقیم ہیں۔ آپ لندن میں بائیں بازو کے انتہائی سرگرم لوگوں میں سے ہیں۔ اس کے علاوہ فیض کلچرل فاؤنڈیشن برطانیہ اور انجمن ترقی پسند مصنفین برطانیہ کے ساتھ بھی وابستہ ہیں۔ آپ اکثر سیاسی، سماجی اور بین الاقوامی موضوعات پر لکھتے رہتے ہیں۔

The post فلسطین کی جدوجہدِ آزادی زندہ باد ۔ عاصم علی شاہ first appeared on Daily Lalkaar.

بلو چستان میں سرائیکی محنت کشوں کا قتل. تحریر: عامر حسینی

للکار نیوز — Tue, 17 Oct 2023 18:57:47 +0000

میں سرائیکی قوم کے پانچ محنت کشوں کے تربت بلوچستان میں متعصب رجعت پسند نام نہاد بلوچ عسکریت پسند گروپ کے ہاتھوں قتل کی شدید مذمت کرتا ہوں –

اس اقدام کے ارتکاب کرنے والوں نے مظلوم و محکوم سرائیکی قوم کے محنت کش طبقات کو دوسری مظلوم و مجبور و محکوم بلوچ قوم کے درمیان نفرت، دوری اور لڑائی ڈالنی کی کوشش کی ہے جبکہ دونوں اقوام ریاستی جبر، ظلم، استحصال، وسائل کی لوٹ مار، ڈیموگرافی کی تبدیلی ، ماحولیات کی تباہی کا سامنا کررہی ہیں ۔ دونوں اقوام کے محنت کش طبقات اپنی نجات کے لیے کوشاں ہیں-

جو نظریہ محنت کشوں کو رنگ، نسل، زبان، مذہب کے نام پر تقسیم کرے، انہیں ایک دوسرے سے لڑائے، ان کی ‘طبقاتی لڑائی’ کو ‘قومی آزادی’ کی لڑائی سے الگ کرے اور ‘مہا قوم’ کے ظالم حکمران طبقے کے ظلم کو بنیاد بناکر اس قوم کے یا کسی دوسری ہمسایہ قوم کے محنت کش طبقات کا قتل جائز ٹھہرائے وہ رجعت پرست ، بنیاد پرست، نسل پرست فاشزم کے سوا کچھ بھی نہیں ہے۔

ظالم حکمران طبقات کے ریاستی جبر کی لڑائی تمام اقوام کے محنت کش مل کر ،متحد ہوکر، ایک دوسرےکی سانجھ میں لڑسکتے ہیں –

پاکستان کی تمام محکوم ،مظلوم اقوام اور جس قوم سے پاکستان کے حکمران طبقات کے غالب حصّے یعنی پنجابی قوم سے تعلق ہے اس قوم کے محنت کشوں کے اتحاد کے ساتھ ہی جنگ لڑی اور جیتی جاسکتی ہے۔

ویت نام کی آزادی کی لڑائی میں جیت اس وقت تک ممکن نہیں ہوئی جب تک امریکہ اور یورپ کے محنت کشوں نے ہڑتالوں کا راستا نہ اپنایا اور سول نافرمانی کی تحریک نہ چل پڑی ۔

پاکستان کے جغرافیے کے اندر بسنے والی اقوام کے محنت کش، مظلوم و محکوم عوام جب تک حکمران طبقات کے خلاف باشعور ہوکر لڑائی نہیں لڑیں گے تب تک کسی کا آزاد ہونا اور نجات پانا ممکن نہیں ہوگا-

ہمیں حکمران طبقات کی جانب سے پنجابی محنت کش طبقات کے اندر ‘غلط شعور’ کو اکھاڑ پھینکنے اور ہر ایک موقعہ پرست رجحان کی بیخ کنی کرنی ہوگی یہ کوئی معمولی ٹاسک اور آسان فریضہ ہرگز نہیں ہے۔

حکمران طبقات جن کے پاس ریاستی طاقت، سیٹھوں کے میڈیا کی طاقت اور اس کے پاس اسکول، کالج، یونیورسٹی کے نصاب اور وہاں پڑھنے والوں کو کنٹرول کرنے اور ایسے ہی سماج میں مغلوب و مجبور، محکوم، مظلوم اور جنسی، مذہبی ، نسلی ہر طرح کے جبر اور استحصال کا شکار طبقات کے شعور پر اپنے مفادات کے مطابق شعور مسلط کرنے کا ایک بڑا اّریٹس ہوتا ہے اور وہ بار بار مظلوم، محکوم،مجبور اور استحصال کا شکار مختلف اقوام کے محنت کشوں کے شعور کو ‘گمراہ’ کرتا ہے اور انہیں آپس میں لڑانے کے لیے ہمہ وقت سرگرم رہتا ہے۔

اسے اس آپریٹس کے لیے سب سے زیادہ مدد شہری پڑھے لکھے درمیانے طبقے / پیٹی بورژوازی سے ملتی ہے اور یہ صرف کسی مہا قوم قوم کا اربن پڑھا لکھا درمیانہ طبقہ ہی نہیں ہوتا جو حکمران طبقات کے غلبے، تسلط اور جبر کو برقرار رکھنے میں سب سے بڑی مدد فراہم کرتا ہے-

اکثر یہ مدد مہا قوم پرستی جیسے ‘پاکستانی نیشنل ازم’ ہے کا جھنڈا اٹھاکر کی جاتی ہے لیکن کسی بھی مجبور و محکوم قوم کا اربن پڑھا لکھا درمیانہ طبقہ بار بار شاؤنزم / ایتھنک تعصب اور نفرت کے گڑھے میں گرتا ہے اور ایتھنک / لسانی شاؤنزم سے ابھرنے والا تشدد جو کسی دوسری قوم کے عام محنت کشوں کو نشانہ بناتا ہے ریاستی جبر اور حکمران طبقات کی وحشت و بربریت پر پردہ ڈالنے کے کام آتا ہے۔

سرائیکی محنت کشوں کے قاتل نہ تو بلوچ عوام ہیں نہ بلوچ محنت کش ہیں بلکہ یہ قاتل گروہ بلوچ قومی تحریک کو برباد کرنے کے لیے شاؤنسٹ بنیادوں پر دہشت گردی کررہا ہے اور اس سے بلوج قوم پر ریاستی جبر کرنے والی اسٹبلشمنٹ کو اپنا بیانیہ مسلط کرنے کا موقعہ ملتا ہے اور اسے بلوچ قوم پر اپنے جبر، ریاستی وسائل کی لوٹ کھسوٹ، جبری گمشدگیاں، ماورائے آئین و عدالت قتل ، آزادی اظہار پر لگی پابندیوں سے توجہ ہٹانے اور ایک گروہ کی انفرادی دہشت گردی کو اپنے جبر سے زیادہ بناکر دکھانے کا موقعہ ملتا ہے۔

سرائیکی خطے کے ترقی پسند قومیتی شعور کے حامل سیاسی کارکنوں، ادیبوں، سوشل میڈیا ایکٹوسٹوں کو اپنے اندر موجود دائیں بازو کے رجعت پرستانہ اور شاؤنسٹ قوم پرستانہ رجحان سے خبردار اور ہشیار رہنے کی ضرورت ہے اور اسے ‘بلوچ قوم کی سرائیکیوں کے خلاف دہشت گردی’ جیسا معنی دینے والوں کی مذمت کرنی چاہیے۔

دوسری طرف بلوچ قومی تحریک کے ترقی پسندوں کو بھی سرائیکی قومی تحریک کے رجعت پرست، شاؤنست، متعصب اور دائیں بازو کے رجحانات کے ترجمانوں کی ‘شدت پسندی/ اسٹیبلشمنٹ نوازی’ کو پوری سرائیکی قومی تحریک پر چسپان کرنے سے از حد گریز کی کوشش ہے۔

اس وقت پاکستان کے حکمران طبقات جہاں قومی جبر و ظلم میں بہت زیادہ اضافہ کرچکے ہیں ، وہیں وہ محنت کش طبقات کی پبلک سیکٹر مین بچے کچھے حقوق پر ڈاکہ ڈال رہے ہیں اور اس کے خلاف بڑی عوامی احتجاجی تحریکوں کا ابھار صاف نظر آرہا ہے۔ حکمران طبقات ان احتجاجی تحریکوں کو مقدمات قائم کرکے ، گرفتاریاں کرکے ، پولیس، رینجر تشدد اور خود لاقانونیت پھیلاکر زبردستی ختم کرنے کے درپے ہیں- ایسے وقت میں پاکستان کے اندر بسنے والی اقوام کے محنت کشوں کو تقسیم کرنے اور ان کے درمیان لڑائی کروانے کے لیے مذہبی و نسلی بنیادوں پر نفرت اور تشدد کی ہر ممکن کوشش کی جائے گی-

اسٹبلشمنٹ کے جبر اور استحصال کو ہمیشہ مذہبی فرقہ پرستوں، لسانی و نسلی شاؤنسٹوں نے ہمیشہ مدد فراہم کی ہے اور مجبو و محکوم اقوام کی نجات کی تحریکوں کو بدنام کرنے کی کوشش کی ہے – ان کی ان کوششوں کو شعوری مداخلت سے ختم کرنا ہوگا-

ہم بلوج قومی تحریک کے ترقی پسند شعور رکھنے والے کارکنوں، شاعروں، ادیبوں ، طالب علموں ، سوشل میڈیا ایکٹوسٹوں سے یہ امید رکھتے ہیں کہ وہ سرائیکی محنت کشوں کے قتل کی شدید مذمت کریں گے اور سرائیکی حطے کی عوام کو یک جہتی کا پیغام بھیجیں گے –

—♦—

عامر حسینی ترقی پسند صحافی و دانشور ہیں۔ آپ گذشتہ کئی دہائیوں سے ترقی پسند سیاست اور محنت کشوں کے حقوق کی تحریکوں میں انتہائی سرگرم ہیں۔ آپ ملکی اور بین الاقوامی اخبارات و جرائد میں محنت کشوں کے مسائل کے ساتھ ساتھ سیاسی و سماجی موضوعات پر تسلسل کے ساتھ لکھ رہے ہیں۔

The post بلو چستان میں سرائیکی محنت کشوں کا قتل. تحریر: عامر حسینی first appeared on Daily Lalkaar.

ہنگری: جنگ کو روکنے کے لیے ہمیں سرمایہ داری کو روکنے کی ضرورت ہے۔

للکار نیوز — Sat, 30 Sep 2023 18:50:24 +0000

بین الاقوامی اُمور کے ماہر ترقی پسند صحافی جعفر سلیموف نے خصوصی طور پر یہ انٹرویو ڈیلی للکار کے لئے مرتب کیا ہے۔

سوال: اٹیلا، ہنگری کے عوام اس بات سے کس قدر باخبر ہیں کہ یوکرین میں کیا ہو رہا ہے؟

جواب :بہت کم لوگوں نے اس جنگ کا نوٹس لیا، لیکن یوکرائنی حکومت سے شہریوں کا انخلا کافی عرصہ پہلے سے شروع ہوگیا تھا۔ گذشتہ کئی سالوں کے دوران، یوکرینیوں کی ایک بڑی تعداد ہنگری منتقل ہو گئی ہے۔ اور ان میں سے زیادہ تر "مہاجرین” کے اب بھی اپنے وطن میں دوست اور رشتہ دار ہیں، اس لیے ہم پڑوسی ملک میں ہونے والے واقعات کو کچھ تفصیل سے جانتے ہیں۔

ہنگری کے لوگ کمیونسٹوں کے خلاف ہونے والے جبر، اور بے حد بدعنوانی، اور فاشسٹ مسلح گروہوں سے بخوبی واقف ہیں جنہیں سرکاری پشت پناہی حاصل ہے۔ ہم یہ بھی جانتے ہیں کہ ہمارے ہم وطن – قومیت کے لحاظ سے ہنگری، لیکن یوکرین کے شہری ہیں انہیں سڑکوں پر پکڑا جاتا ہے اور سیدھا میدانِ جنگ میں لے جایا جاتا ہے۔

سوال: جو کچھ بھی ہو رہا ہے اس کے بارے میں رائے عامہ سے کیا اندازہ ہوتا ہے؟ سیاستدانوں؟ حکومت سے متعلق؟

جواب : ہم پریشان ہیں، اور یہ بات قابل فہم ہے – واقعات ہماری سرحد کے بہت قریب ہو رہے ہیں۔ اور ہنگری میں، شہریوں کی مطلق اکثریت فوری جنگ بندی اور تنازعہ کے مذاکراتی حل کی حمایت کرتی ہے۔

ہنگری کی حکومت نے بارہا یوکرین میں ہنگری کی قومیت کے لوگوں کے تحفظ کے حق میں بات کی ہے۔ اس نے یوکرین کو ہتھیاروں کی فراہمی سے انکار کرنے کا فیصلہ بھی کیا۔ اور اس مؤقف کو معاشرے کی غالب اکثریت کی حمایت حاصل ہے۔ لیکن، بدقسمتی سے، ہمارے ملک کی سرزمین سے (ہنگری کی حکومت کی رضامندی سے) نیٹو بھاری ہتھیار، حتیٰ کہ امریکی ٹینک، جو کہ پھر پولینڈ میں اور وہاں سے آگے تک پہنچاتا ہے۔ اس سے عدم اطمینان پیدا ہوتا ہے۔

سوال: – ہمیں ہم وطنوں کے تحفظ کے بارے میں مزید بتائیں؟۔

جواب: – بنیادی طور پر، ہم "زبان کے قانون” کے نام نہاد مسئلے کے بارے میں بات کر رہے ہیں۔ جیسا کہ آپ جانتے ہیں، یوکرین میں انہوں نے مختلف قومیتوں کی زبانوں کے استعمال کو محدود کرنا شروع کر دیا، اور ان میں سے ہنگری زبان بھی ہے ۔ یہ حکومتوں کے درمیان بنیادی تنازعہ ہے۔ ہمارے کمیونسٹوں کے لیے بلاشبہ بنیادی انسانی حقوق اور مختلف قومیتوں کے حق خود ارادیت پر قدغن لگانا ناقابل قبول ہے۔ ہم تمام قومیتوں کی زبان اور ثقافت کی مکمل آزادی کے لیے کھڑے ہیں۔ یہ صرف پرامن اور جمہوری حالات میں ہی حاصل ہو سکتا ہے۔

سوال: – کیا یوکرین کی ہنگرین آبادی کے تحفظ کے معقول اور مؤثر طریقے ہیں؟

جواب: – ہم جنگ کو ختم کرکے بحران سے نکلنے کے راستے تلاش کرتے ہیں اور ان حالات سے نکلنے کی کوشش کرتی ہیں جو ہم سب کو اس جنگ کی طرف لے گئے۔

ملٹی نیشنل کمپنیوں، نام نہاد "فری مارکیٹ” کے اثر و رسوخ کی جارحانہ توسیع کو روکنا ضروری ہے۔ اس سے تمام ممالک میں لوگوں کا آزادانہ استحصال ہوتا ہے، یہی نیٹو فوجی اتحاد کی توسیع کی وجہ ہے۔ اگر ہم سرمائے کی طاقت کو محدود کر سکتے ہیں، تو ہمارے پاس تمام ممالک میں انسانی حقوق کو وسعت دینے کا وقت ہو گا، اور پھر ہنگری اور یوکرین دونوں امن سے رہ سکتے ہیں۔

—♦—

اطالوی زبان میں انٹرویو پڑھنے کے لئے نیچے لنک پر کلک کریں!

https://www.lantidiplomatico.it/dettnews-attila_vajnai_presidente_del_partito_operaio_ungherese_per_arrivare_alla_pace_bisognare_fermare_il_capitalismo/45289_50990/

The post ہنگری: جنگ کو روکنے کے لیے ہمیں سرمایہ داری کو روکنے کی ضرورت ہے۔ first appeared on Daily Lalkaar.