اداریہ - Daily Lalkaar

الیکشن 2024ء: ووٹ کس کو دیں ۔۔۔؟

للکار نیوز — Thu, 01 Feb 2024 20:01:30 +0000

پاکستان میں عام انتخاب کا دور دورہ ہے، حکمران طبقے کی سیاسی جماعتیں اپنے روایتی انداز میں حصولِ اقتدار کی رسہ کشی میں اپنی اپنی انتخابی مہم میں مگن ہیں۔ اور 8 فروری کو پاکستانی ووٹرز اپنا حقِ رائے دہی استعمال کرتے ہوئے نئے آئندہ 5 سال کے لیے ”حکمرانوں کا انتخاب“ کریں گے۔ لیکن انتخابی عمل کی جو صورت ِحال انہی حکمران جماعتوں کی جانب سے بنا دی گئی ہے وہ یہ کہ پاکستان سے درمیانے طبقے کے افراد کے لئے بھی ان کے مدِ مقابل الیکشن مہم چلا پانا عملاً ناممکن بنا دیا گیا ہے۔

حکمران اشرافیہ کی سیاسی جماعتوں بشمول مسلم لیگ (ن)، تحریکِ انصاف، پیپلز پارٹی اور ان کی حلیف دیگر مذہبی و سیاسی جماعتیں جو کسی بھی طرح سے اقتدار حاصل کرنے کی تگ و دو میں ہیں، انہوں نے جاگیرادار، سرمایہ دار، وڈیروں اور سیاسی پیروں کو بطور اُمیدواران میدان میں اُتارا ہے۔ حکمران اشرافیہ کی تمام سیاسی جماعتوں کے یہ اُمیدواران اپنے اپنے حلقوں میں اپنی دولت اور سماجی کنٹرول کے باعث خاصہ اثر و رسوخ رکھتے ہیں۔ اس سب کے ساتھ ساتھ انتخابی عمل میں پیسے کے بے دریغ استعمال نے انتخابات کو محض دولتمندوں تک ہی محدود کر دیا ہے۔

ان تمام مساعد حالات کے باوجود بھی پاکستان کے بائیں بازو کی جماعتوں کی جانب سے اشرافیہ کے ان ارب پتی اُمیدواروں کے مقابلے میں مڈل کلاس اور محنت کش طبقے سے تعلق رکھنے والے مجموعی طور پر 45 سے اُمیدوار میدان میں اُتارے ہیں۔

اُمیداواروں کے تناسب سے برابری پارٹی پاکستان بائیں بازو کی سب سے بڑی جماعت بن کر اُبھری ہے۔ برابری پارٹی کے چیئرمین جواد احمد اس الیکشن میں خود اُمیدوار نہیں ہیں بلکہ وہ اپنی پارٹی کے نوجوان اُمیدواروں کی انتخابی مہم چلا رہے ہیں۔ برابری پارٹی پاکستان نے بہت ہی قلیل عرصے میں ملک کے سیاسی منظر نامے پر مڈل کلاس اور محنت کشوں کی متبادل سیاست کی گہری چھاپ بنائی ہے۔ اور برابری پارٹی کے31 اُمیدوار چاروں صوبوں سے میدان میں ہیں۔ان میں سے دو خواتین اُمیدوار بھی شیخوپورہ اور کوٹ ادو سے انتخابات میں حصہ لے رہی ہیں۔

برابری پارٹی پاکستان کا انتخابی نشان قلم ہے۔

برابری پارٹی پاکستان کے اُمیدوار اور ان کے حلقۂ انتخاب

قومی اسمبلی

عابد وزیرحلقہ این اے 36ہنگو
مظہر جعفر حلقہ این اے 234 کراچی
انیس رضا نقوی ایڈووکیٹ حلقہ این اے 60جہلم
وقاص احمد حلقہ این اے 93چنیوٹ پنجاب
محمد فہد حلقہ این اے 65گجرات، پنجاب
نثار احمد خٹک حلقہ این اے 34نوشہرہ، خیبر پختونخوا
محمد اجمل صدیقی حلقہ این اے 106ٹوبہ ٹیک سنگھ، پنجاب

صوبائی اسمبلی (پنجاب)

مزمل حسین حلقہ پی پی 167لاہور
مدثر احمد حلقہ پی پی 74سرگودھا
ارسلان احمد پی پی 72سرگودھا
نعیم اخلاق حلقہ پی پی 220ملتان
محمد توفیق حلقہ پی پی 152لاہور
عامر شہزاد حلقہ پی پی 143شیخوپورہ
وسیم رانا حلقہ پی پی 44سیالکوٹ
معظم عمران حلقہ پی پی 97چنیوٹ
شازیہ دلدار حلقہ پی پی 140شیخوپورہ
رقیہ بی بی حلقہ پی پی 277کوٹ اَدو
بلال حسین حلقہ پی پی 33گجرات
محمد علی حلقہ پی پی 261رحیم یار خان
حافظ سجاد احمد حلقہ پی پی 151لاہور
حسام جاوید حلقہ پی پی 151جہلم
محمد اشفاق حلقہ پی پی 234وہاڑی

صوبائی اسمبلی (خیبرپختونخوا)

سعید رحیم حلقہ پی کے 28شانگلہ
نثار احمد خٹک حلقہ پی کے 87نوشہرہ
محمد اعزاز علی خان حلقہ پی کے 17لوئر دیر
رحمان گل حلقہ پی کے 23مالاکنڈ
مظہر عالم حلقہ پی کے 73پشاور

صوبائی اسمبلی (سندھ)

جمشید اقبال حلقہ پی ایس 86ملیر کراچی
محمد مظہر جعفر حلقہ پی ایس 94کراچی کورنگی

صوبائی اسمبلی(بلوچستان)

میر گہرام خان مری حلقہ پی بی 09کوہلو

دوسرے نمبر پر عوامی ورکرز پارٹی ہے جس کے 10 اُمیدوار انتخابات میں حصہ لے رہے ہیں۔

عوامی ورکرز پارٹی کا انتخابی نشان بلب ہے۔

عوامی ورکرز پارٹی کے اُمیدوار اور ان کے حلقۂ انتخاب

قومی اسمبلی

عثمان غنی حلقہ این اے 10 بونیر کے پی
باہیر روم حلقہ این اے 11شانگلہ کے پی
محمد اقبال خان حلقہ این اے 47اسلام آباد

صوبائی اسمبلی

صابر خان حلقہ پی کے25بونیر کے پی
محمود سلیمان حلقہ پی کے26بونیر کے پی
علی محمد حلقہ پی کے 27بونیر کے پی
نصر اللہ خان حلقہ پی کے 29شانگلہ کے پی
ممتاز احمد حلقہ پی پی 211خانیوال، پنجاب
سینگر علی حلقہ پی ایس 17نصیر آباد،سندھ
بیگم خاتون حلقہ پی ایس 04کشمور، سندھ

عوامی ورکرز پارٹی کے اُمیدوار وں میں گزشتہ انتخابات کے مقابلے میں اس مرتبہ کمی واقع ہوئی ہے۔ 2018ء کے عام انتخابات میں عوامی ورکرز پارٹی کے 17 اُمیدوار میدان میں تھے۔

حقوقِ خلق پارٹی کے تین اُمیدوار انتخابات میں حصہ لے رہے ہیں۔

حقوقِ خلق پارٹی کا انتخابی نشان لاؤڈ سپیکر ہے۔

ابتدائی طور پر حقوقِ خلق پارٹی کے دو اُمیدوار ہی میدان میں تھے جبکہ تیسرے اُمیدوار بائیں بازو کے سابق راہنما اور صحافی امتیاز عالم تحریکِ انصاف کو انتخابی نشان الاٹ نہ ہونے کی وجہ سے حقوقِ خلق پارٹی کے ٹکٹ سے الیکشن میں حصہ لے رہے ہیں۔
امتیاز عالم اپنی انتخابی کیمپین میں اپنی ذات کا بھی بھرپور پرچار کر رہے ہیں۔ وہ سید امتیاز عالم گیلانی کے نام سے انتخابی مہم چلا رہے ہیں۔

اسی طرح حقوقِ خلق پارٹی کے راہنما عمار علی جان نے بھی اپنی انتخابی مہم میں اپنے نام کے ساتھ اپنی ذات کا اضافہ لگایا ہوا ہے اور وہ اپنی تشہیری مہم ڈاکٹر عمار علی جان سندھو کے نام سے جاری رکھے ہوئے ہیں۔

حقوقِ خلق پارٹی کے اُمیدوار اور ان کے حلقۂ انتخاب

قومی اسمبلی

مزمل کاکڑحلقہ این اے127لاہور
سید امتیاز عالم گیلانی حلقہ این اے161بہاولنگر، پنجاب

صوبائی اسمبلی
ڈاکٹر عمار علی جان سندھو حلقہ پی پی 160چونگی امر سدھو لاہور، پنجاب

امتیاز عالم اور عمار علی جان دونوں دوستوں نے پہلے کبھی بھی اپنے ناموں کے ساتھ اپنی ذات/ برادری کی نسبت نہیں لگائی۔ بلکہ بہت سے دوستوں کو تو ان کی انتخابی تشہیر سے اس کا علم ہواہے۔ عام طور پر تو ہم دیکھتے ہیں کہ اکثر لوگ اپنی برادری کی سپورٹ لینے کے لئے اپنی ذات کو اپنے ناموں کے آگے لگاتے ہیں، مگر یہ عمل اُس وقت عجیب لگتا ہے کہ جب پہلے کوئی اپنے نام کے ساتھ اپنی ذات نہ لکھتا ہو اور انتخابی عمل میں چند ووٹ زیادہ ملنے کی اُمید میں ایسا کرگزرے۔
یہ عمل اُن لوگوں کی طرف سے کیا جائے جو کہ سماج کو طبقاتی بنیادوں پر پولرائز کرنے کے دعویدار ہیں تو پھر یہ اور بھی عجیب ہو جاتا ہے۔ کہ آپ سماج کو طبقاتی بنیادوں پر پولرائز کرنے کے بجائے ذات برادری کی بنیاد پر پولرائز کرنے کی سعی کر رہے ہیں۔

مزدور کسان پارٹی جو خیبر پختونخوا سے انتخابات میں حصہ لیتے آئی ہے، حشت نگر کی کسان تحریک کی بدولت علاقے میں مزدور کسان پارٹی کی اچھی عوامی حمایت بھی موجود ہے۔ ان انتخابات میں بطور پارٹی حصہ لیتے نظر نہیں آئی جبکہ مزدور کسان پارٹی کے راہنما سالار فیاض علی حلقہ پی کے 62خیبر پختونخوا سے انتخابی نشان’پلنگ‘ پر بطور آزاد اُمیدوار انتخابات میں حصہ لے رہے ہیں۔ ان کی انتخابی مہم مزدور کسان پارٹی کے بینر تلے ہی چلائی جا رہی ہے۔

پاکستان کی اشرافیہ کے اُمیدواروں کے مقابلے میں بائیں بازو کے یہ اُمیدوار عوامی حقوق کی بے لوث جدوجہد میں مصروفِ عمل ہیں۔ اس ملک کے 99 فیصد محنت کشوں، مزدوروں، کسانوں، خواتین، اقلیتوں اور دیگر مظلوم سماجی پرتوں کے حقوق کی جنگ لڑتے آئے ہیں۔ موجودہ انتخابات میں 45 اُمیدواروں کے ساتھ بائیں بازو نے مجموعی طور پر قومی منظر نامے پر اپنے وجود کا احساس دلایا ہے۔ اور اشرافیہ کے ارب پتی اُمیدواروں کے مدِ مقابل اس ملک کے عام لوگوں کو کھڑا کرنے کی سعی کرتے ہوئے سیاسی عمل کے اشرافیہ کی لونڈی بن کر رہ جانے کو بھی للکارا ہے۔
پاکستان بھر میں جس جس حلقے سے بائیں بازو کی جماعتوں کے اُمیدوار حصہ لے رہے ہیں،انہیں ووٹ دیجئے، ان کی حمایت کیجئے، کیونکہ یہی وہ لوگ ہیں جو سیاست کو اشرافیہ کی اقتدار کے لیے آپسی بندر کی بجائے عوامی مسائل کے حل کی جانب موڑ سکتے ہیں۔ اور پاکستان کے 99 فیصد استحصال زدہ عوام کے دکھوں، تکلیفوں اور اذیتوں کا مداوا کر سکتے ہیں۔

—♦—

The post الیکشن 2024ء: ووٹ کس کو دیں ۔۔۔؟ first appeared on Daily Lalkaar.

توشہ خانہ کیس میں سزا معطلی کے باوجود عمران خان کی رہائی ناممکن!

للکار نیوز — Tue, 29 Aug 2023 16:02:24 +0000

اسلام آباد ہائی کورٹ کی جانب سے توشہ خانہ کیس میں سابق وزیر اعظم عمران خان کی ضمانت پر رہائی کے حکم پر تحریکِ انصاف کے وکلاء اور کارکنان خوشی کے شادیانے بجانے لگے۔ اور انہیں لگا کہ شاید عمران خان کی رہائی اب یقینی ہو جائے جائے گی اور وہ اٹک جیل سے رہا ہو کر اپنے گھر جا سکیں گے۔ اسلام آباد ہائیکورٹ کے چیف جسٹس کے اس فیصلے پر تحریکِ انصاف کے کارکنان کی جانب سے سوشل میڈیا پر ان کی بہت زیادہ تحسین کی گئی کہ بہت درست فیصلہ دیا ہے اور عمران خان کی سزا معطل کر دی گئی ہے۔ سب سے پہلے تو یہ سمجھ لینا چاہئے کہ سزا معطلی کا ہر گز یہ مطلب نہیں ہے کہ وہ اس مقدمے سے بری ہوگئے ہیں۔

دوسری طرف حقائق یہ بتاتے ہیں کہ عمران خان کی سزا معطلی کے باوجودوہ فوری طور پر رہا نہیں ہو سکیں گے کیونکہ اسلام آباد میں آفیشل سیکرٹ ایکٹ کے تحت بنائی جانے والی خصوصی عدالت کے جج ابوالحسنات ذوالقرنین کی جانب سے اٹک جیل کے سپرٹنڈنٹ کو حکم دیا گیا ہے کہ ملزم عمران خان کو آفیشل سیکرٹ ایکٹ کے تحت درج مقدمہ میں جوڈیشل ریمانڈ میں زیر حراست رکھا جائے۔حکم نامے میں یہ بھی کہا گیا ہے کہ ملزم کو تیس اگست یعنی بدھ کے دن ان کی عدالت میں پیش کیا جائے۔یعنی عمران خان توشہ خانہ کیس میں سزا کے ساتھ ساتھ سائفر مقدمے میں بھی جوڈیشل ریمانڈ پر ہیں۔

اس ساری صورتحال کے پیشِ نظر اسلام آباد ہائیکورٹ کا یہ فیصلہ آنے سے کچھ دیر قبل ہی عمران خان کے وکیل سلمان صفدر کی جانب سے چیئرمین پی ٹی آئی کو کسی اور کیس میں گرفتار نہ کرنے کی درخواست بھی اسلام آباد ہائیکورٹ میں دائر کر دی گئی تھی۔ جس پر کوئی پیش رفت سامنے نہ آسکی۔ بادیَ النظر میں اسلام آباد ہائیکورٹ ساری صورتحال میں صرف اپنا دامن بچاتی نظر آتی ہے۔ کیونکہ اکثر ایسے مقدمات میں مجرم کی جانب سے سزا کے خلاف اپیل کا فیصلہ آنے تک سزاکی معطلی کوئی بڑی بات نہیں ہے۔
سپریم کورٹ کے چیف جسٹس عمر عطاء بندیال کی عمران خان کے مقدمات میں خصوصی طور پر ” ذاتی دلچسپی” پہلے دن سے عیاں ہے جس پر انہیں شدید تنقید کا نشانہ بھی بنایا جاتا ہے۔ سابق وزیراعظم شہباز شریف اور مسلم لیگ (ن ) کی طرف سے اسلام آباد ہائیکورٹ کے اس فیصلے کو چیف جسٹس عمر عطاء بندل کے زیر اثر فیصلہ قرار دیا گیا ہے۔ ایک بات تو طے ہے کہ چیف جسٹس عمر عطاء بندیال کی تمام ترکوششوں کے باوجود عمران خان کے لئے ” عشق کے امتحاں ابھی اور بھی ہیں”۔

اس ساری صورتحال سے کا غیر جانبدارانہ تجزیہ کیا جائے تو ایک بات بالکل واضح ہو جاتی ہے کہ عمران خان اُسی قانونی شکنجے میں جکڑے جا چکے ہیں جس میں وہ اپنے سیاسی حریفوں کو بڑے فخر سے جکڑتے رہے ہیں۔ دوسرا یہ کہ عمران خان اپنے سیاسی مقاصد کے حصول کے لئے خود ایسے دوراہے پر آپہنچا ہے کہ جہاں سے اب اس کی واسپ شاید ممکن نہیں۔ ابھی تو 9 مئی کے واقعات کا مقدمہ عمران خان کا انتظار کر رہا ہے جو سب سے خطرنا ک ثابت ہو سکتا ہے۔عمران خان نے پاکستان کی سیاست میں جس درجے کی غلاظت اور انتہا پسندی کو پروان چڑھایا ہے اس کی 76 سالہ تاریخ میں اور کوئی مثال نہیں ملتی۔ عمران خان کے جرائم کی ایک لمبی فہرست ہے کہ کس طرح پاکستانی سماج کو ایک انتہائی خطرنات دوراہے لا کھڑا کیا ہے،جن میں 40 ہزار پاکستانی طالبان کو بھی اپنے دورِ حکومت میں خیبر پختونخواہ میں دوبارہ آباد کروانا انتہائی بھیانک ہے۔( ان معاملات پر علیحدہ سے کسی تحریر میں تفصیل سے بحث کریں گے) ۔

عمران خان کو ایک چیز سمجھ لینی چاہئے کہ پاکستانی سیاست میں اب شاید ان کا کوئی مستقبل نہیں رہا۔ یا تو عمران خان کو سیاست کو خیر باد کہہ کر ملک چھوڑنا پڑے گا یا پھر ایک لمبا عرصہ جیلوں میں گزارنا ہوگا۔

The post توشہ خانہ کیس میں سزا معطلی کے باوجود عمران خان کی رہائی ناممکن! first appeared on Daily Lalkaar.

شاباش بھارت: چندریان-3 کی چاند پر کامیاب لینڈنگ

للکار نیوز — Fri, 25 Aug 2023 16:05:44 +0000

23 اگست کی شب 5 بجے بھارتی خلائی مشن چندریان-3 کی چاند پر کامیاب لینڈنگ کے بعد پورے بھارت میں جہاں جشن کا سماں تھا وہیں پاکستان میں بھی بھارتی خلائی مشن موضوعِ بحث بنا رہا۔ پاکستان سے تعلق رکھنے والے اہلِ علم و دانش نے تو اس کامیابی کو بہت سراہا جبکہ بعض رجعتی حلقے اسے کسی صورت بھی ہضم کرنے کو تیار نہیں۔

بھارتی خلائی پروگرام کی مستقل مزاجی، اس پر کام کرنے والے سائنسدانوں کی قابلیت، انجنیئرز، ٹیکنیشنز، معاونین اور بھارتی عوام یقیناً اس اہم ترین کامیابی پر دادو تحسین کے مستحق ہیں۔ لیکن اس کامیابی کا پہلو بھی نظر انداز نہیں کیا جا سکتا، وہ پہلو ہندوستان کے کروڑوں انسان غربت، بھوک، افلاس اور جہالت کی اتھاہ گہرائیوں میں زندگیاں گزارنے پر مجبور ہیں۔ ہندوستان کے حکمران طبقات کے پاس ان کے بنیادی مسائل کے حل کا تا حال کوئی طریقہ کار موجود نہیں ہے۔

"ستاروں پر کمندیں” ڈالنے سے پہلے اپنے دیس باسیوں اور دھرتی باسیوں کے بنیادی انسانی مسائل کا حل ضروری ہے۔ تیسری دنیا کی پسماندہ معیشتوں کے لئے اپنے سماجوں کے بنیادی مسائل کو حل کرنے کے بجائے اس نوعیت کے منصوبوں پر اربوں ڈالروں کی سرمایہ کاری بنیادی انسانی فہم سے بالاتر ہے۔

تیسری دنیا کے ممالک کی خلائی کاوشوں کا موازنہ کریں تو برصغیر میں پاکستان سپیس پروگرام میں سب سے آگے تھا، 1961ء میں سپارکو کا قیام عمل میں لایا گیا، پورے ایشیاء میں جاپان، اسرائیل کے بعد پاکستان وہ واحد ملک تھا جس نے خلاء میں اپنا راکٹ رہبر 1 کامیابی سے لانچ کیا اور اس طرح پاکستان خلا ء میں راکٹ بھیجنے والا دنیا کا دسواں ملک بن گیا تھا۔ اور اگلے برس رہبر 2 کا کامیابی سے تجربہ کیا گیا۔ سرد جنگ کے دوران امریکی خلائی ادارے ناسا کے تعاون کے ساتھ پاکستان کا سپیس پروگرام کافی ترقی یافتہ تھا۔ اور بعد ازاں 1972 میں رہبر راکٹ پروگرام تقریباً ختم کردیا گیا۔ اور پاکستان کو ایک ایسی ڈگر پر ڈالا گیا کہ جس کی راہ میں سائنس و ٹیکنالوجی میں ترقی کے جوہر دکھانے کے بجائے بربادیوں کے بیابان تھے۔ ایک پالیسی شفٹ نے سائنس و ٹیکنالوجی کی ساری ممکنہ "ترقی” کو لپیٹ کر رکھ دیا۔

ہندوستان کے چندریان-3مشن کی کامیابی کو خطے میں ہندوستانی اثر و رسوخ بڑھنے کی باتیں بھی کی جارہی ہیں، اور یہ بھی سننے میں آرہا ہے کہ ہندوستان اب عالمی طاقت بننے کی دوڑ میں شامل ہوگیا ہے۔ بعض معاشی پنڈت اگلی دہائی میں ہندوستان کو دنیا کی دوسری بڑی معیشت بننے کے دعوے بھی کر تے سنائی دیتے ہیں۔ وہ ہندوستان کے ملٹی کلچرل سماجی تضادات کو سرے سے ہی نظر انداز کر دیتے ہیں۔

بھارتی وزیراعظم نریندر مودی نے اپنے دورِ اقتدار میں ہندوستان کو اُسی ڈگر پر ڈالا ہے جس ڈگر پر چل کر پاکستان کا خلائی پروگرام بند کر دیا گیا۔ نریندر مودی نے اپنے ہندوستانی سماج کو مذہب کی بنیاد پر اس قدر پولرائز کر دیا ہے کہ اس کے نتائج دہلا کر رکھ دیں گے۔ ہندوتوا کے ایجنڈے پر عمل پیرا مودی سرکار کی گرتی عوامی مقبولیت کے وقت مشن چندریان کی کامیابی اسے اپنی سیاسی پوزیشن کو مستحکم کرتے ہوئے آئندہ انتخابات میں خاصی مدد گا ر ثابت ہو سکتی ہے۔ مگر غربت، بھوک، افلاس اور جہالت کی چکی میں پِستے کروڑوں غریب ہندوستانیوں کے لئے اُمید کی کوئی کرن نہیں۔
بقول شاعر ؎

تم آسماں کی بلندی سے جلد لوٹ آنا
مجھے زمیں کے مسائل پر بات کرنی ہے

——♦——

The post شاباش بھارت: چندریان-3 کی چاند پر کامیاب لینڈنگ first appeared on Daily Lalkaar.