Feudal - Daily Lalkaar

غیرت کہاں سے پیدا ہوتی ہے؟ – تحریر: رانا اعظم

للکار نیوز — Tue, 09 Jan 2024 22:43:41 +0000

ہمارا آج کا موضوع صرف گفتگو کی حد تک آج کا کہا جا سکتا ہے، ورنہ یہ پہلا اور آخری یا بد قسمت کوئی Isolated واقعہ نہیں . گذشتہ روز میڈیا میں رپورٹ ہوا ہے، کہ خیبر پختون خواہ کے علاقہ کوہستان میں جرگہ کے فیصلے کے تحت ایک لڑکی کو غیرت کے نام پر خاندان کی معاونت سے قتل کر دیا گیا ۔ وجہ بتائی جا رہی ہے کہ لڑکے کے ڈانس پر کچھ لڑکیوں کی تالیاں بجاتے ویڈیو وائرل ہوئی ہے۔ وجہ کوئی بھی ہو قتل کا سرٹیفکیٹ فراہم نہیں کرتی ۔

ہماری خواہش اور کوشش ہے کہ کسی طرح ایسے بے رحمانہ واقعات کے اسباب کی صحت مند پڑچول ہو پائے ۔ ہوتا کیا ہے کہ ہمارے فیمنسٹ ساتھی مرد یا عورت اسے صرف پدر سری کا نام دے کر بات ختم کر دیتے ہیں ۔ فیمینسٹ ہم بھی ہیں ۔ اس سے قبل سوشلسٹ ہیں ۔ہر سوشلسٹ فیمنسٹ بھی ہوتا ہے ، لیکن ہر فیمینسٹ سوشلسٹ نہیں ہوتا۔ اس وقت ہم اس بحث میں پڑے بغیر تعمیری گفتگو آگے بڑھانا چاہتے ہیں۔

یہاں ہم اپنا مختصر نقطہ نظر رکھ دینا چاہتے ہیں ۔ ہمارے نزدیک یہ سب صرف اورصرف پدر سری تک محدود نہیں ہے۔ اس میں کوئی شک نہیں کہ پدر سری کئی اسباب میں سے ایک ہے ۔ سب سے پہلے تو یہ جاننا ضروری ہے ، کہ یہ غیرت کہاں سے جنم لیتی ہے ۔ کوئی جبلی شے ہے ۔ نہیں ، اسی دھرتی کے سماجی نظام کی پیداوار ہے۔ اسی لیئے کہیں کم کہیں زیادہ پائی جاتی ہے۔

ایسے واقعات زیادہ تر اندرون سندھ ، بلوچستان اور ایک حد تک جنوبی پنجاب میں بھی ہوتے ہیں۔ جن کا بڑا سبب جاگیردارانہ اور قبائلی نظام ہے ۔

دیکھا جائے تو پشتون معاشرہ سب سے زیادہ اس خباثت کی لپیٹ میں ہے۔ وجہ افغانستان، خیبر پختون خوا کی ایک ڈیموگرافی اور قبائلیت کی وجہ سےطالبنائزیشن کے اثرات تیزی سے قبول کر رہا ہے ۔

سندھ ، بلوچستان میں جاگیرداری اور قبائلیت کے باوجود پشتون معاشرہ سے صورتحال قدرے مختلف ہے ۔ سندھ میں پیپلزپارٹی پارٹی بڑی” عقلمندی ” سے کمرشلائزیشن پیدا ہی نہیں ہونے دے رہی ۔ اپوزیشن پیپلزپارٹی سے بھی زیادہ بوسیدہ ہے ۔ ہمارے ہر قوم کے ترقی پسند بھی اپنے ہاں کچھ نہ کچھ رونق لگائے رکھنے کے لیے قوم پرستی کے گرد گھومتے پھرتے رہتے ہیں ۔

پشتون معاشرہ بلکل مختلف حالات کی زد میں رہا ہے ۔ تاریخ میں جائیں تو بفر زون تھیوری پسماندگی کا سبب رہی ہے۔ قریب کے واقعات خاص طور پر افغان جہاد کے پیٹرو ڈالر، منشیات، اسلحہ ، سمگلنگ نےکمرشلائیزیشن ، Urbanization کو جنم دیا ۔ دوسری طرف شعوری، ثقافتی ارتقاء بہت سست روی کا شکار ہے ۔ قوم پرستی کے چکر میں ہم جتنا طالبنائزیشن کو نظر انداز کریں گے۔ پشتون سماج کی بربادی ہوتی رہے گی۔

جرگے قبائلی، جاگیردارانہ نظام کا حصہ ہیں ۔ سماج کے کمزور طبقات کےخلاف ہمیشہ فیصلے دیتے ہیں۔ ان کی ذد میں سب سے زیادہ عورت آتی ہے۔

ہم سرمایہ داری کو بھی پدر سری سے مبرا نہیں مانتے ۔ بنیادی طور پر طبقاتی نظام کی ہر شکل کم یا زیادہ اپنے اندر پدر سری کے grains رکھتی ہے ۔ اسے ڈھائے بغیر پدر سری سے نجات ممکن نہیں ۔ اس کا یہ بھی مطلب نہیں کہ تب تک ہاتھ پہ ہاتھ رکھ کر پدر سری کو قبول کیئے رکھا جائے ۔ نہیں بلکل نہیں ، ہمیں مسلسل اس کے خلاف جدوجہد جاری رکھنی پڑے گی۔

عورت کی سیاسی، سماجی، معاشی، ثقافتی empowerment کی جنگ کو ہر حال میں جاری رکھنا ہوگا ۔ دوسرا بڑا نقطہ یہ ہے ، کہ ایک جنسی صنف کو دوسرے کے مقابل کھڑا کرنے کی بجائے شانہ بشانہ ہونا چاہیے۔ خواہ سامراجی پروجیکٹ مقابل کے لئے کتنی ہی سرمایہ کاری کیوں نہ کرے ۔ جب تک ہم نظریاتی شفافیت سے طبقاتی جنگ کو اولیت نہیں دیں گے۔ عورت سماجی برابری حاصل نہیں کر پائے گی ۔ غیرت یونہی اپنے کرتوت دکھاتی رہے گی ۔

نوٹ: یہ مضمون 28 نومبر کو لکھا گیا تھا۔ موضوع کی اہمیت کے پیشِ نظر، قارئین کے پیشِ خدمت ہے۔

—♦—

مصنف کے بارے

رانا اعظم کا تعلق عوامی ورکرز پارٹی سے ہے، آپ بائیں بازو کے منجھے ہوئے نظریاتی لوگوں میں سے ہیں اور اکثر سیاسی، سماجی اور فلسفیانہ موضوعات پر لکھتے رہتے ہیں۔

The post غیرت کہاں سے پیدا ہوتی ہے؟ – تحریر: رانا اعظم first appeared on Daily Lalkaar.

سیاسی،سماجی بندشوں سے آزادی – تحریر: رانا اعظم

للکار نیوز — Sat, 16 Dec 2023 17:30:25 +0000

عنوان شاید کچھ پیچیدہ ہو گیا ۔ اسے تھوڑا کھولنے کی ضرورت ہے۔ سیاسی,سماجی بندشوں سے آزادی کا مطلب ہے ، کہ سیاسی، سماجی قدامت، رجعت پسندی سے آزاد ( Emancipate or Liberate ) ہونا ۔اکثر ایسا بھی ہوتا ہے کہ کچھ لوگ سماجی طور پر emancipate ہوتے ہیں ۔ سیاسی طور پر انتہائی رجعتی خیالات کے مالک ۔ دوسری صورت میں لوگ سیاسی طور پر Liberated ہوتے ہیں، لیکن سماجی طور پر الٹ ۔

ایسے لوگوں کو آپ نے اکثر یہ کہتے ہوئے سنا ہوگا ،کہ ہیر (وارث شاہ کی ہیر) خواتین کی آزادی کی پہلی خاتون علمبردار تھی یا ہے ۔ لیکن اگر ان لوگوں کے اپنے گھر میں ہیر پیدا ہو جائے ، تو اجمل خٹک جیسا سکہ بند ترقی پسند بھی پشتون کلچر کے نام پر اس ہیر کے قتل کی حمایت کر دیتا ہے ۔ یہ ہم صرف پشتون معاشرہ کی حد تک نہیں کہہ رہے ۔ ہمارے جیسے معاشروں کی ہر قوم میں ایک جیسی صورتحال ہے ۔ یہ سوال قوموں سے نہیں سوشواکنامک زندگی سے جڑا ہوا ہے ۔

ہماری خواہش اور کوشش بھی ہے ، کہ یہ دونوں وصف معاشرہ میں ایک ہی وقت میں پائے جاتے ہوں ۔ تبھی معاشرے آگے برھ سکتے ہیں ۔ ورنہ سماج جامد ۔ مردہ اور غیر تخلیقی رہ جاتے ہیں ۔ یہ سطور لکھتے وقت بھی بیسیوں مثالیں ہمارے ذہن میں ہیں۔ یہاں اکثر سیاسی، سماجی دونوں طرح کی یا کوئی ایک بندش موجود رہتی ہے ۔ دونوں بندشوں سے آزادی بہت نایاب شے ہے ۔ ہم اپنے آپ کو پاکستان کی حد تک محدود رکھیں گے۔

ہمارے ذہن میں یہ سوال انسانی حقوق کے دن کے حوالے سے انسانی حقوق کمشن کی سابق سربراہ محترمہ حنا جیلانی اور وجاہت مسعود صاحب کی گفتگو سننے کے دوران آیا ۔ ہم اپنی ان معروضات سے کسی طور پر بھی ان کی گفتگو کو undermine نہیں کرنا چاہتے۔ حنا جیلانی صاحبہ اور ان کے خاندان کی انسانی حقوق کے حوالے سے بہت شاندار خدمات ہیں ۔ سراہی جانی چاہئیں۔ ہم اس گفتگو میں اضافہ یا آگے بڑھانا چاہتے ہیں۔

وجاہت مسعود صاحب نے اپنے پہلے سوال کا آغاز ہی علی گڑھ میں قائداعظم کی 10 مارچ 1944 کی تقریر کے حوالے سے کیا ۔ جس میں قائداعظم فرماتے ہیں کہ کوئی قوم اس وقت تک height of glory نہیں پا سکتی ، جب تک وہ اپنی آدھی آبادی خواتین کو برابر کے حقوق نہیں دیتی ۔

درست بات ہے ۔ ہمارا المیہ یہ ہے کہ 76 سال گزرنے کے بعد بھی یہ فیصلہ نہیں ہو پایا ، کہ کیا قائداعظم خود سیاسی اور سماجی طور ایک Emancipated انسان تھے ؟ ۔

بد قسمتی سے اس کی ایک وجہ تو یہ ہے کہ خود قائد اعظم نے اپنے قلم سے اپنے خیالات بارے دو سطریں بھی نہیں لکھیں ۔ ویسے ساری مسلم لیگ یا مسلم اشرافیہ میں لکھنے پڑھنے کا رجحان نہ ہونے کے برابر رہا ہے ۔ کبھی پاکستان کے ترقی پسند دوست ان کی 11 اگست 1947 کی تقریر پکڑ کر انہیں سیاسی طور پر ایک Liberated , Emancipated انسان کے طور پر paint کرتے دکھائی دیتے ہیں۔ دوسری طرف سے رجعت پسند ان کی بیسیوں تقریریں اسلامی پاکستان بناتے ہوئے پیش کر دیتے ہیں۔ اب آتے ہیں ان کی سماجی Emancipation کی طرف ، جیسے وجاہت مسعود صاحب ان کی علی گڑھ کی تقریر کا حوالہ دے کر گفتگو کا آغاز کرتے ہیں۔ اس سے پہلے بھی ہم کہیں لکھ چکے ہیں، کہ وہ خود پارسی فیملی میں شادی کر لیتے ہیں ۔ جب بیٹی نے کرنا چاہی تو ہمیشہ ہمیشہ کے لیے اس سے اپنا رشتہ منقطع کر لیتے ہیں ۔ کہاں گ عورتوں کی برابری کی تقریر ۔

ابھی حال ہی کا عمران خان phenomenon آپ کے سامنے ہے ۔ ان کی مڈل کلاس Following سماجی طور پر Liberated نظر آتی ہے ، لیکن سیاسی طور پر سماج میں انتہائی رجعت پسندانہ کردار ادا کر رہی ہے ۔ آپ دیکھیں کہ ان کے ہاتھوں استحصال ذدہ عورتیں چیخ چیخ کر اپنی کتھائیں سنا رہی ہیں۔ کسی کے کان پر جوں تک نہیں رینگتی۔

ہم کہتے ہیں کہ جب تک ہم اور ہماری قیادتیں سیاسی اور سماجی طور پر غیر جمہوری، رجعت پسندانہ خیالات کی بندشوں سے آزاد نہیں ہوتیں ، معاشرہ وہیں کا وہیں کھڑارہے گا۔ اس لئے کہ ہمارے جیسے نیم قبائلی ، نیم جاگیردارانہ معاشروں میں غربت سے نیچے ہماری چالیس فیصد آبادی کو آپ کون سے انسانی حقوق دلا سکتے ہیں یا ان کے کون سے انسانی حقوق ہوتے ہیں۔ ان کا پہلا مسئلہ ان کی روٹی ہوتی ہے ۔ وہ اس قبائلی جاگیردارانہ سماج میں انہیں نہیں مل سکتی۔

ہماری مسلم اشرافیہ کا یہی المیہ رہا ہے ۔ conformism تقلید پسندی کی زندگی میں کیا نیا سیکھنا ہو تا ہے ۔نئے پن کی ضرورت تو مزاحمتی زندگی میں ہوتی ہے ۔ ایسے معاشروں میں خواتین ہوں یا دیگر کمزور طبقات، ان کی کوئی جگہ نہیں.

ہمارا ماننا ہے کہ ایسے معاشرے اسں سڑاند کا شکار رہیں گے۔ جب تک قبائلی اور جاگیردارانہ سماج کا خاتمہ نہیں ہو جاتا ۔ یہ کام NGOS کے بس سے باہر ہے۔ خواہ کتنی ہی مجموعی انسانی یا عورتوں کے حقوق کی علمبردار کیوں نہ ہوں ۔ یہ کام محنت کشوں کی نمائندہ سیاسی جماعتوں اور ان کے کارکنوں کا ہے ۔ جنہوں نے سماجی تبدیلی کا بیڑا اٹھایا ہوا ہے ۔

—♦—

رانا اعظم کا تعلق عوامی ورکرز پارٹی سے ہے، آپ بائیں بازو کے منجھے ہوئے نظریاتی لوگوں میں سے ہیں اور اکثر سیاسی، سماجی اور فلسفیانہ موضوعات پر لکھتے۔

The post سیاسی،سماجی بندشوں سے آزادی – تحریر: رانا اعظم first appeared on Daily Lalkaar.