ancient civilization - Daily Lalkaar

قدیم پنجاب اور آریاؤں کی آمد! (انڈس سِولائزیشن – قسط-3) – تحریر: رانا اعظم

للکار نیوز — Sun, 12 May 2024 20:21:45 +0000

قدیم و جدید تحقیق سے ثابت شدہ ہے کہ ہندوستان میں تہذیب کی بنیاد پنجاب، سندھ اور اس کے گردونواح سے رکھی گئی تھی۔ اس بات کی وضاحت کی خیر کوئی ضرورت تو نہیں ہونی چاہیئے لیکن کر دی جائے تو بہتر ہوگا ، کہ بات جدید پنجاب کی نہیں ہو رہی ۔ 4 سے 5 ہزارسال قبل مسیح کے پنجاب کا ریفرنس ہے۔ یہ ریفرنس پنجابی زبان کے حوالے سے نہیں ہے خطے کی بات ہے ۔ اب کوئی بھی اس بات پرمعترص نہیں ہے کہ ہندوستان میں لکھی گئی اولین کتاب، رگ وید ( 1700-110BC) پنجاب میں ہی لکھی گئی ۔ تاریخ پنجاب لکھنے کے لیے ایک اور قدیم تصنیف’مہا بھارت ‘(چھٹی صدی قبل مسیح ) سے استفادہ کیا جاتا ہے۔ اس بات پر بھی اتفاق تھا کہ 4 سے 5 ہزار سال قبل مسیح ہڑپہ کی تہذیب مروج تھی ، جو کسی وجہ سے ختم ہوگئی اور اس کی جگہ وسط ایشیا ءسے آنے والے آریاؤں نے لے لی۔

کھدائی کے دوران ہڑپہ کی تہذیب کے دو بڑے شہروں، ہڑپہ اور موہنجوداڑو ( دونوں ایک ہی تہذیب کے شہر ہیں ہڑپہ یا انڈس ویلی ) کے رہن سہن کے متعلق کافی معلومات ملتی ہیں مگر پڑھی نہیں جا سکیں ۔ اس لئے تمام محققین آریاؤں کی عبادات کی کتاب رگ وید اور دیگر مذہبی کتب سے ہی بنیادی شہادتیں لیتے ہیں۔

ہمیں ہڑپہ تہذیب کی بجائے پنجاب اس وجہ سے لکھنا پڑ رہا ہے کہ اب ہڑپہ کے علاوہ اور بھی بہت سی ہڑپائی عہد کی بستیاں دریافت ہو چکی ہیں ۔ ہڑپہ کی کھدائی چونکہ سب سے پہلے ہوئی ۔ وہی انڈس سولائزیشن کی بنیاد بنی۔ یقیناً یہ بنیاد مہرگڑھ سے ہی شروع ہوگی اور کرنی پڑے گی ۔ آگے نئی نئی دریافتیں ، معلومات مہیا ہوتی چلی گئیں ۔

پنجاب کی تاریخ کے متعلق معلومات اور تجزیے نے تین بڑی منازل طے کی ہیں۔ پہلا دور تو ہڑپہ کی کھدائی سے پہلے کا ہے۔ جس میں یہاں کی تاریخ کا سارا اندازہ رگ وید اور دیگر مذہبی کتب سے لگایا گیا۔ اس دور میں سب کچھ سنسکرت کی پرانی کتب ، شلوکوں اور کہانیوں پر مبنی ہے۔

یہ سب کچھ مذہبی تحاریر اور خرافات سے لگایا گیا تھا ۔ دوسرے دور کی ابتداء ہڑپہ کی کھدائی سے ہوئی جس میں مذہبی تفاسیر جمود کا شکار ہو گئیں اور سات ہزار سال قبل کے جدید سماج کو سامنے رکھتے ہوئے اس علاقے کی تاریخ کی از سر نو تصنیف شروع ہوئی ۔ نئی تاریخ کی تصنیف میں بنیادی مسئلہ یہ تھا ، کہ آریا مقامی تھے یا غیر مقامی۔ گزشتہ دو عشروں میں کئی تحقیقات میں یہ ثابت کیا گیا کہ آریاؤں کےباہر سے آنے کی کہانی غلط ہے یا اس میں نقائص ہیں۔

تاریخ پنجاب کے تجزیے کا تیسرا دور گزشتہ چند برسوں میں جینیاتی سائنس Genetics کے ذریعے ہوا۔ جس میں مسلمہ طور پر یہ ثابت ہوگیا کہ تقریبا 1500 سے 1300 سال قبل مسیح وسط ایشیا ء سے ایک بہت بڑا گروہ پنجاب آیا اور یہاں کی آبادی میں جوہری تبدیلیوں کے ساتھ نیا تہذیبی ارتقاء ہوا ۔ جینیاتی سائنس نے دودھ کا دودھ اور پانی کا پانی کر دیا۔

آرین مویشی پال وقت میں آئے ۔ خاص طور پر گائے ، گھوڑا ساتھ لائے ۔ آرین یہاں حکمران ٹھہرے ، لہٰذا گائے کی پوجا اور گھوڑا خاندانی برتری کی علامت بنا ۔ آریاؤں کی زبان سنسکرت کو پوجا پاٹ کی مقدس زبان کا درجہ ملا۔ ذات پات کا نظام اور مقامیوں( دراوڑوں) کو شودر کا گھٹیا ترین درجہ انہی کا دین ہے ۔

آریاؤں کا رنگ سفید، اونچا ناک، جسم دراوڑوں کے مقابل خوبصورت تھا ۔ تہذیبی ارتقاء کے پس منظر میں دیکھیں تو نئے فکری خیالات کے دباؤ میں وارث شاہ نے بھی رانجھے کی صورت میں نئے کرشن کو تلاش کیا۔

تبدیل شدہ حالات کی وجہ سے رانجھے کو کالا کی بجائے سفید ل دکھایا گیا ۔ مگر اس کی باقی صفات کرشن والی رکھی گئیں۔ حالانکہ دراوڑوں کا بھگوان کرشن تو کالے رنگ کا تھا ۔ پوری پنجابی شاعری میں رانجھا کرشن کی طرح بھگوان ہے ۔ اسی لئے وارث شاہ کی کرشن کے انداز میں رانجھے کی کردار کشی نے اس کی تصنیف کو مقبول ترین سطح پر پہنچا دیا ۔

چار مختلف لوگوں نے ہیر لکھی لیکن دوام وارث شاہ کی لکھی ہیر کو ملا ۔ وارث شاہ ہیر کی آنکھوں کی تعریف کرتے ہوئے کہتے ہیں”جلا نیناں دی دھار وچ پھب ریہا، چڑھیا ہند تے کٹک پنجاب دا جی ۔“ وارث شاہ مقامی سماجی بنت کے بہت قریب رہا ۔ صرف وارث شاہ نے نہ صرف ہیر رانجھے کا جسمانی ملاپ کروایا ہے بلکہ ملاپ کی خوبصورت منظر کشی کرتے ہوئے کئی ایک بند بھی لکھے ۔

جہاں تک آرین کے مقامی، غیر مقامی ہونے کے سوال پر تنازعے کا تعلق ہے ۔ بعض اوقات مخالف سیاسی نظریات رکھنے والی قوتوں کےمفادات ایک ہو جاتے ہیں ۔ ایسا کچھ آرین کے سوال پر بھی ہوا ہے ۔ آریاؤں کے باہر سے آنے کی کہانی کو غلط ثابت کر نا ہندوستانی اشرافیہ، ہندوتوا اور قوم پرست قوتوں کو اکٹھے کر دیتا ہے۔ ہندوستانی اشرافیہ کا اپنا تعلق آرین سے ہے ۔ آرین کا سیاسی ، مذہبی اور معاشرتی فلسفہ ہندوتوا کے مذہبی puritanism کو بنیاد فراہم کرتا ہے ۔ قوم پرست قوتوں کا نسلی puritanism ایک قوم کا جواز بنتا ہے۔ قوم پرست قوتوں کا بنیادی فریضہ ہی ایک قوم کے نام پر بورژوازی کےمفادات کا تحفظ کرنا ہوتا ہے۔ حکمران اپنی حکمرانی برقرار رکھنے اور اس کا دائرہ اثر وسیع کرنے کے لیے تاریخی، لسانی، ثقافتی ، سائنسی، قومی اور نسلی حقائق کو اچھالتے، گھماتے ، چھپاتے ، دباتے اور مسخ کرتے آئے ہیں اور مستقبل قریب میں بھی ایسا کرتے رہیں گے ۔

(جاری ہے)

—♦—

مصنف کے بارے

رانا اعظم کا تعلق عوامی ورکرز پارٹی سے ہے، آپ بائیں بازو کے منجھے ہوئے نظریاتی لوگوں میں سے ہیں اور اکثر سیاسی، سماجی اور فلسفیانہ موضوعات پر لکھتے رہتے ہیں۔

The post قدیم پنجاب اور آریاؤں کی آمد! (انڈس سِولائزیشن – قسط-3) – تحریر: رانا اعظم first appeared on Daily Lalkaar.

اِنڈس سِولائزیشن- مہرگڑھ ! (قسط-1) – تحریر: رانا اعظم

للکار نیوز — Sat, 04 May 2024 14:33:31 +0000

آج ہم جس موضوع پر طبع آزمائی کرنے جا رہے ہیں یہ زیادہ تر ہمارا موضوع نہیں رہا ۔ بس اتنا ہی ہے جس حد تک مارکس کے بقول ایک کیمونسٹ کو اپنے وقت کے دیگر علوم سے بھی آگاہی ضروری ہے ۔

سوال پیدا ہوتا ہے کہ پھر ہم اس گستاخی کی جراَت کیوں کر رہے ہیں ؟۔ ہوا کچھ یوں کہ عوامی ورکرز پارٹی کی حالیہ فیڈرل کمیٹی کی میٹنگ منعقدہ لاہور 20-21 اپریل کی درمیانی شب ہم کچھ دوست بیٹھے گپ شپ کر رہے تھے ۔ زبانوں سے بات چلتی چلتی مہر گڑھ، ہڑپہ اور موہنجوداڑو کی طرف چل نکلی ۔ ہماری ماڑی قسمت ہم نے بھی ایک رائے دے دی ۔ بس پھر دوستوں نے وہ دُرگت بنائی کہ نانی یاد آگئی ۔ خیراس وقت خاموشی ہی بہتر تھی ، سو ہم نے وہی راستہ چنُا ۔

اب اصل موضوع کی طرف آتے ہیں۔ مہرگڑھ پر دوستوں کی رائے تھی کہ مہرگڑھ 8/9 ہزار سال کی تہذیب ہے ۔ ہم نے کہہ دیا کہ نہیں 65000 ہزار سال کی تہذیب ہے ۔ 70000 ہزار سال قبل انسان افریقہ سے نکلا ۔ 5000 ہزار سال میں وہ مہرگڑھ تک پہنچا۔ ویسے تو دوست بھی درست تھے اور ہم بھی ۔ کھدائی یہی 8/9 ہزار سال کی تاریخ بتاتی ہے ۔ لیکن Genetic سائنس کے علم نے اس فیلڈ میں بھی انقلاب پرپا کر دیا ہے۔ جنیٹک سائنس سے یہ ثابت ہو گیا ہے کہ ہندوستانی خواتین کے 70 سے 90 فیصد جین 65000 ہزار سال قبل مسیح میں افریقہ سے آئے انسانوں سے مشابہ ہیں ۔ اس کے برعکس 10تا 40 فیصد مردوں کے جین 65000 ہزار سال قبل افریقہ سے آنے والے مردوں سے مشابہ ہیں۔ عورتوں اور مردوں کے جین کی تفصیل میں ہم فی الحال نہیں جا رہے۔ لیکن یہ ضرور ہے کہ عورت کے جین کا تقابل عورت سے ، مرد کا مرد سے کیا جاتا ہے ۔ یہاں یہ سوال ضرور پیدا ہوتا ہے کہ عورتوں اور مردوں کے جین میں یہ فرق کیوں ہے ۔

سماجی سائنس یہ بتا رہی ہے کہ آریا مویشی پال تھے ۔ مویشی پال وقتوں میں بہت کم امکان کہ ان کے ساتھ خواتین بھی ہوں ۔ خواتین کی اکثریت مقامی رہی ہے۔ جب کہ مرد باہر سے آتے رہے ۔ زور زبردستی یا دیگر صورتوں میں مقامی خواتین کے ساتھ ہی ملاپ یا شادیاں ہوتی رہیں ۔

آج بھی روٹی روز گار کی غرض سے پہلے نمبر پر نوجوان اورپھرشادی شدہ مرد زیادہ تر باہر کا رخ کرتے ہیں ۔ بہت کم اپنے خاندان ساتھ لے کر جاتے ہیں ۔ genes کی سائنسی تحقیق سے یہ بھی ثابت ہوا ہے کہ دنیا کے سارے انسان افریقہ سے نکل کر ہر طرف پھیلے ہیں ۔ اس سے کئ ایک اور مفروضوں کے پرخچے بھی اڑ گئے ہیں۔ ان پر آئندہ بات کریں گے ۔

7/8 ہزارسال قبل مسیح میں ایران کے علاقے زاگروس Zagros سے زراعت سے آشنا قبائل بھی مہرگڑھ پہنچے۔ زاگروس سے آنے والوں کے جین 65 ہزار سال قبل افریقہ سے آنے والوں سے مطابقت نہیں رکھتے۔

مہرگڑھ ( بلوچستان میں دریائے بولان پر ) کی کھدائی 20 ویں صدی کی آخری چوتھائی میں ہوئی ۔ فرانسیسی تحقیقاتی ٹیم کی ریسرچ سے ثابت ہوا کہ مہرگڑھ 7 ہزار سال قبل مسیح میں ایک شہر کی صورت میں بسا ہوا تھا۔ یہ پورے ایشیاء میں پہلا زرعی مقام تھا ۔ کپاس کے آثار بھی ملے ۔

یہ کپاس دو قبروں میں تانبے کے ہار میں پھنسی ہوئی ملی ہے ۔ یہ دنیا میں پہلی جگہ ہے ، جہاں کپاس کے وجود کے آثار ملے ہیں ۔ یہی آبادی ختم ہوکر بعد میں ہڑپہ کی ترقی یافتہ تہذیب میں تبدیل ہوئی ۔

ابھی تک ہڑپہ اور موہنجوداڑو سے ملنے والی تحاریر نہیں پڑھی جا سکیں۔ لیکن کچھ ثبوت ایک تیسرے فریق میسوپوٹیمیا (عراق) کی کھدائیوں سے ملنے والی تحریروں سے یہ ثابت ہو چکا ہے کہ میسوپوٹیمیا سے ہڑپہ اور موہنجوداڑو کی دریائی تجارت رہی ہے ۔ ہڑپہ، موہنجوداڑو کی تحریروں کے نہ پڑھے جا سکنے بارے میں ایک تھیوری یہ بھی ہے کہ یہ جان بوجھ کر پاکستان میں نہیں ہونے دیا جا رہا ۔ اس سے پاکستان کے قیام کی بنیادیں زمین بوس ہو جائیں گی ۔ دوسری طرف ہمارے ہاں ابھی تک پرانی نسل کو دراوڑ اور زبان دراوڑی کو لے کر ہی آگے بڑھا جا رہا ہے ۔ یہ بھی درست ہے کہ دراوڑی زبانوں کے ہمارے بہت اثرات ہیں۔ چونکہ ہڑپہ سب سے پہلے کی کھدائی ہے۔ اب تو خیر کئی ایک اور کھدائیاں ہریانہ، اُترپردیش، راجستھان، گجرات کے کئی شہروں کی کھدائی ہوئی ہے ۔
زبیرشفیع غوری کی کتاب ”راوی کنارے کی ہڑپائی بستیاں “ 14 ٹیلوں کی دریافت بھی ہو چکی ہے۔ آثار قدیمہ نے ان میں سے کئی ایک کو نوٹیفائی بھی کر دیا ہے ۔ میسوپوٹیمیا کی study بتاتی ہے کہ ہڑپہ اور موہنجوداڑو کی زبان دراوڑی نہیں تھی ۔ اسے مولوہا کا نام دیا جاتا ہے ۔ پنجابی اور سندھی بعد کی شکلیں ہیں۔ یہ زبانیں آریاؤں کے آنے کے بعد کی ہیں ۔ ہندوتوا آریاؤں کو باہر سے آنے والے نہیں مانتا ۔

حکمران طبقات کے سوشیواکنامک مفادات تاریخی ، نسلی اور لسانی حقائق کا کس طرح قلع قمع کرتے ہیں ۔ اس حقیقت کو ذہن میں نہ رکھنے کے باعث ہمارے پیٹی بورژوا لیفٹ کی ہمیشہ ایک بدقسمتی رہی ہے کہ وہ حکمران طبقات کے نسلی ، لسانی و دیگر نعروں سے متاثر ہوکر ان کا دُم چھلہ بنا رہتا ہے۔

ہمیں نسلی لسانی حقائق سے انکار نہیں ہے ۔ جس بیٹھک کا ذکر کر رہے ہیں ۔ اس میں بھی ہم نے عرض کیا تھا کہ زبانوں کی گرائمر، تاریخ اور ان کے مستعمل ادوار کو نظر میں رکھے بغیر ہم بورژوازی کے ہاتھوں شعوری ، لاشعوری طورپر استعمال ہوتے رہیں گے ۔ حاکم طبقات کے مفادات اپنے اپنے وقت کے سماج میں بہت بھاری ہوتے ہیں ۔

زبانیں توانسانی اتصال اور ضروریات کی بنیاد پر نشوونما پاتی ہیں ۔ زبانیں جامد Static نہ مقدس ہوتی ہیں ، البتہ اپنے علم کے خزانہ کے اعتبار سے rich اور poor ضرور ہوتی ہیں ۔

الفاظ یا زبانیں متروک اور نئی پیدا ہوتی رہتی ہیں ۔ ہاں یہ ضرور ہے کہ مادری زبان میں بچوں کا سیکھنا کہیں زیادہ ہوتا ہے ، بہ نسبت کسی دوسری کے۔ چند دن قبل ہمیں پنجابی دانشوروں کی ایک محفل میں جانے کا اتفاق ہوا ، وہاں دوران گفتگو ہم نے لفظ گندم بول دیا ۔ پنجابی دانشوروں نے اعتراض اٹھا دیا کہ ہم نے” کنک“ کیوں نہیں بولا، جب کہ ہم دیہاتی پنجابی ہیں ۔ جواب میں ہم نے پوچھا کہ” کنک“کا لفظ کہاں سے اور کب آیا۔ اس سوال کا کسی کے پاس جواب نہ تھا ۔ اس کا کوئی source اور خبر ہے بھی نہیں۔ اس محفل میں اور بھی سوالات زیر گفتگو آئے ان پر آئندہ بات کریں گے ۔

حوالہ جات

1. Joseph , Tony, Early Indians, Juggmaut Books 2018.

2. Oppenheimer , Stephen. The real eve: Modern Man’s Journey out of Africa 2003

3. Joseph, p 167

—♦—

The post اِنڈس سِولائزیشن- مہرگڑھ ! (قسط-1) – تحریر: رانا اعظم first appeared on Daily Lalkaar.