Actor - Daily Lalkaar

ایشوریہ رائے جیسی یا دیدار جیسی ؟ – ڈاکٹر طاہرہ کاظمی

للکار نیوز — Thu, 16 Nov 2023 18:52:01 +0000

ہمیں عبدالرزاق سے مکالمہ کرنا ہے ۔ اس خواہش کے پیچھے ہماری نیت ہے جو جاننا چاہتی ہے کہ ”جیسی “ کے کیا معنی ہوتے ہیںان جیسے مردوں کے ذہن میں۔

آئیے پوچھتے ہیں ان سے کہ کیسی ہوتی ہے ” ایشوریہ رائے جیسی “عورت؟

خوبصورت؟

اس میں تو شک ہی نہیں __

سمارٹ؟

مس ورلڈ کو سمارٹ تو ہونا ہی چاہئے __

اداکارہ؟

یہ تو ایک صلاحیت ہے جس طرح کرکٹ __

عورت؟

اس جیسی کئی عورتیں رزاق کے گھر میں ہوں گی سو ایشوریہ کا عورت ہونا کیا خاص بات ہے ؟

پھر کیا سمجھیں ” ایشوریہ رائے جیسی “ کو!

ویسے اس جگ سا پزل کے بہت سے ٹکڑوں کو ہم نہ صرف پہچانتے ہیں بلکہ سمجھتے بھی ہیں ۔ اور اس سمجھ میں بھی عبدل رزاق اوران جیسے بھائیوں کا ہاتھ ہے جو دن رات یہ کہتے ہوئے نہیں تھکتے کہ ایسی یعنی کہ “ جیسی” عورت معاشرے کے منہ پر دھبہ ہے ۔

آئیے بتاتے ہیں ہم آپ کو “ایشوریہ رائے جیسی” عورت کے معنی؛

اپنی مرضی کی مالک، خود اعتمادی سے بھری، دنیا کا مقابلہ کرنے کو تیار، اپنی پسند کی شادی کرنے والی، اپنی پسند کا لباس پہننے والی، اپنی مرضی سے شو بز میں آنے والی،

ہاں …….یہاں مسئلہ ہوا ہو گا: عورت اور اُس کی مرضی؟

عورت کی اپنی مرضی، عورت اور مرضی میں کیا تعلق . . . ؟

جی جناب پاکستانی مرد کی یہ تھیوری کسی سے پوشیدہ نہیں۔

ہائیں، عورت اور یہ جرات ؟

مرضی اور وہ بھی عورت کی ؟

پسنداورعورت ؟

کیسی باتیں کرتی ہو؟

ایسی عورت سے میاں عبدالرزاق اور ان جیسے دل بہلانے والےتعلق تو بنا سکتے ہیں مگر زندگی کا ساتھی بنانا اور اس کی کوکھ سے نیک خوبچے پیدا کرنا … نہ بابا نہ ۔

کیسی باتیں کرتی ہو؟

ایشوریہ رائے کی کوکھ سے پیدا ہونے والے بچوں میں بیٹی بھی ہو گی اور ظاہر ہے ”ایشوریہ رائے جیسی “ ہی ہو گی ۔بیٹی اور اس ”جیسی “ ؟

کیسی باتیں کرتی ہو؟

عبدالرزاق ، شاہد آفریدی اور عمر گل جیسے مردوں کو یہ بات کیسے ہضم ہو سکتی ہے ؟ جو اپنی نام نہاد عزت و غیرت کو بیٹی سے باندھ کر رکھتے ہیں اور پھر اپنے جیسے ایک اور مرد کی حفاظت میں دے دیتے ہیں ۔ مرد سے مرد کو عورت ٹرانسفر ___ کیا کریں بھیا ؟ بھیڑیے بہت ہیں ہیں نا آس پاس __

البتہ اگر بیٹا پیدا ہو اور باپ جیسا ہو __وہ کسی بھی عورت سے تعلق رکھے ، جیسے عبدالرزاق کا تعلق اداکارہ و ڈانسر دیدار سے رہا اور بات شادی تک پہنچی __کیا حرج ہے جناب ؟

مرد بچہ ہے __ عاشقی معشوقی نہ کرے تو پتہ کیسے چلے گا ہمارے بیٹے پہ جوانی آئی تھی ۔

بقول عبدالرزاق کے ….یہ سچا پیار تھا مگر تعلق قائم کرنے کے بعد جب شادی کی نوبت آئی تو انہیں یاد آ گیا کہ ان کے خاندان کو شو بز پسند نہیں اور شوبز سے تعلق رکھنے والی آزاد خیال عورت بیوی نہیں بنائی جا سکتی ۔

البتہ عبدالرزاق کا ایسی ویسی عورت کو گرل فرینڈ بنانے پہ خاندان کو کوئی اعتراض نہیں تھا ۔ میٹھا میٹھا ہپ ہپ ، کڑوا کڑوا تھو تھو ۔

ہم عبدل رزاق کو یاد کروا دیتے ہیں کہ شادی کافیصلہ کرتے ہوئے انہیں یاد آ گیا تھا کہ بیوی بنانے کی صورت میں دیدار ان کے بچوں کی ماں بنیں گی اور ان بچوں میں بیٹیاں بھی ہوں گی جیسے شاہد آفریدی کی بیٹیاں ۔ ساتھی کرکٹر سات پردوں میں چھپائی گئی سے نیک خو بچے پیدا کر رہے ہوں اور عبدالرزاق دیدار سے ؟ توبہ توبہ !

کیسی باتیں کرتی ہو؟

روایتی پاکستانی مرد کی طرح تعلق توڑنے کا اس سے اچھا بہانہ کیا ہو گا کہ خاندان نہیں مانتا ۔

نہ جانے یہ خاندان تب کہاں ہوتا ہے جب ان جیسے مرد خوبصورت باعتماد اور آزاد خیال عورت کے ساتھ تعلق کا آغاز کرتے ہیں؟

ویسے اس بات سے ہمیں خیال آیا کہ ہو سکتا ہے واقعی ایشوریہ رائے کا نام ان کی زبان سے پھسل گیا ہو ۔ وہ کہا کرتے ہیں نا کہ بہو کی سرزنش کرنی ہو تو بیٹی کو سنا دو دو چار ___ بہو کو خود ہی کان ہو جائیں گے ۔

لگتا ہے اداکارہ دیدار آج بھی عبدل رزاق کے حواس پر سوار ہیں سو پس پردہ تھیں وہ ، بس عین وقت پر ایشوریہ کا نام زبان سے پھسل گیا ۔

عبدالرزاق جیسے مرد کو نیک خو بچے پیدا کرنے کے لیے ایسی عورت چاہئے جس پر بقول ان کے کسی کی نظر نہ پڑی ہو ۔ ہاں ان کی نظر جہاں چاہے ، جس پر چاہے ، جب چاہے ، جتنی چاہے پڑتی رہے ، اس سے کیا فرق پڑتا ہے ؟

شاید وہ اپنے نطفے کی تاثیر پر یقین نہیں رکھتے __ ہو سکتا ہے کہ ان کے نطفے میں بھی ویسی ہی عقل کی کمی ہو گی “جیسی” کہ …..سمجھ جائیے نا پلیز ۔

صاحب ، ان جیسے مردوں کے نزدیک عورت کا دوسرا نام بچے دانی ہے جس کا کام محض بچے پیدا کرنا ہے اور بس بچے پیدا کرنا ہی ہے ۔ دل پشوری کے لیے دیدار اور ایشوریہ رائے “جیسی “ ہیں نا ۔

جی چاہتا ہے کہ ان مردوں کی ایک غلط فہمی دور کرتے چلیں ہم __ اور ساتھ میں ایک مشورہ بھی ۔ جانتے ہیں نا آپ سب کہ ہمیں مفت مشورے دینے کا کس قدر شوق ہے ؟

جان لیجیے کہ ہر عورت ___ جی ہر عورت چاہے وہ سات پردوں میں لپٹی ہو یا سٹیج پہ کھڑی ہو ، اس کے پاس نہ صرف دماغ ہے بلکہ سوچنے سمجھنے کی صلاحیت بھی __مگر مرد برسوں ساتھ رہنے کے بعد بھی اس عورت کے اندر جھانک نہیں سکتا ۔

بے چارہ یہ سمجھتا ہے کہ یہ عورت اس لیے باکردار نظر آرہی ہے کہ چادر میں لپٹی لپٹائی ، منہ میں زبان نہ کوئی تیزی نہ طراری __باہر نکلنے کی اجازت جو نہیں دی گئی ۔

وہ جان ہی نہیں سکتا کہ اس عورت کے اندر کیا کچھ آباد ہے ؟ محشر یا گلزار ؟

جان لیجیے صاحب __عورت کا جو روپ آپ کے سامنے ہے وہ بس اتنا ہی ہے جتنا وہ دکھانا چاہے __جتنا وہ آپ کے سامنے ظاہر کرنا چاہے __ چاہے آپ اسے ایسی سمجھیں یا ویسی __ وہ کسی جیسی بھی ہونے کی پوری صلاحیت رکھتی ہے ۔ کیونکہ ہر عورت اپنے اندر ایک جہاں آباد کیے بیٹھی ہے __ ایسا جہاں جہاں وہ کھلکھلاتی بھی ہے، رقص بھی کرتی ہے اور سپنے بھی دیکھتی ہے۔

تو چلیے لگے ہاتھوں وہ مشورہ سن لیجیے جو ہماری پسندیدہ فلم one flew over the cuckoo’s nest اور پسندیدہ اداکار کے توسط سے ہم نے سیکھا ہے ۔

عبد الرزاق جیسے مردوں کو معیاری و غیر معیاری بچے کا خیال پریشان رکھتا ہے __ سو انہیں بتائے دیتے ہیں کہ عورت کے اندر رہنے والا یا رہنے والی نو ماہ تک ایسے رہتی ہے جیسے یک جان دو قالب __حمل میں سنی گئی ، سوچی گئی ، کہی گئی اور دیکھی گئی ایک ایک بات ویسے ہی بچے تک پہنچتی ہے جیسے اس کی ماں تک پہنچی ۔

سو اگر عبدالرزاق جیسے نیک باز بچے چاہییں آپ کو ، تو علاج کیجیے اس عورت کا کہ وہ اپنے اندر جہاں خلق کرنے کے قابل ہی نہ رہے __ بس ایک چھوٹا سا آپریشن کروانا پڑے گا آپ کو ۔

دماغ کے سوچنے سمجھنے والے حصے کو فرنٹل لوب Frontal lobe کہتے ہیں ۔ گئے زمانوں میں نفسیاتی مریضوں کا فرنٹل لوب کٹوا دیا جاتا تھا ۔ نتیجتا وہ زندہ تو رہتے تھے مگر ایسے کہ نہ منہ میں زبان ، نہ ذہن میں سوچ ___ ایک کٹھ پتلی جس کو جتنا نچوانا ہو ، نچا لو__ایک اشارہ اور بس ۔

سو کروائیے عورت کے فرنٹل لوب کا آپریشن __ پہلی فرصت میں نکلوا دیجئے ۔

یقین کیجیے ایک ایسی عورت آپ کے ہاتھ آئے گی جو حکم کی غلام تو ہو گی ہی مگر ان “ جیسی” بھی نہیں ہو گی جن کے پاس اپنی مرضی اور اپنی قوت فیصلہ ہوتی ہے ۔

کیسی اچھی زندگی ہوگی سوچیے تو __

نہ ہم”جیسی “ عورتوں سے جڑی ہوئی ناگواری اور نہ ہی یہ خدشہ کہ بچے نیک خونہیں ہوں گے ۔

اس مشورے پہ شادی شدہ حضرات بھی فائدہ اٹھا سکتے ہیں ۔

—♦—

ڈاکٹر طاہرہ کاظمی پیشے کے اعتبار سے میڈیکل ڈاکٹر ہیں۔ آپ مختلف موضوعات پر تسلسل کے ساتھ لکھتی رہتی ہیں۔ آپ کی متعدد کُتب بھی شائع ہو چکی ہیں۔

The post ایشوریہ رائے جیسی یا دیدار جیسی ؟ – ڈاکٹر طاہرہ کاظمی first appeared on Daily Lalkaar.

دیکھا ایک خواب … امیتابھ سے ایک ملاقات! — ڈاکٹر طاہرہ کاظمی

للکار نیوز — Sat, 04 Nov 2023 07:33:57 +0000

وہ ہمارے آگے آگے ڈگ بھرتا جا رہا تھا۔ طویل قامت، دبلا پتلا، عام سا پاجامہ قمیض پہنے، عام سا آدمی۔ لیکن کچھ تو تھا کہ نزدیک سے گزرنے والا ہر شخص پہلی اتفاقی نظر کے بعد چونک کے دوباره دیکھتا، چہرے پہ مسکراہٹ پھیل جاتی اور ہاتھ ہلا دیتا۔ جواباً طویل قامت کا سر خم ہوتا، لیکن چلنے کی رفتار سست نہ پڑتی۔

ہم ہانپتے کانپتے ایک ہاتھ میں بیگ، دوسرے میں لیپ ٹاپ سنبھالے اس کے پیچھے پیچھے چلے جا رہے تھے۔ اس طویل راہداری میں اس سے پہلے اور ہمارے بعد کوئی اور نہیں تھا۔

یہ لندن کا ہیتھرو ائیرپورٹ تھا!

اس صبح طویل سفر کے خیال سے ہی ہماری طبعیت کچھ نڈھال تھی سو جہاز میں سوار ہونے کے اعلانات پہ زیادہ دھیان نہ دے سکے۔ سٹار بکس کی کافی پیتے، کروسنٹ کھاتے ہم کتاب پڑھنے میں مگن تھے۔ چونکے تب جب یہ اعلان ہوا کہ جہاز کا دروازہ بند ہونے کو ہے۔ ہاتھوں کے توتے اڑ گئے اور سامان پکڑ کے گیٹ کی طرف دوڑ لگا دی۔

یہ ان دنوں کی بات ہے جب جہازی راہداریاں بہت عام نہیں تھیں سو کبھی کبھی عمارت سے باہر نکل کے بس پہ بیٹھ کے جہاز تک پہنچنا پڑتا تھا۔ ہم ایک ایسی ہی راہداری میں تیز تیز چلتے جا رہے تھے جس کے دروازے کے پاس بس ہماری منتظر تھی۔ اور اسی راہداری میں وہ شخص ہم سے آگے چل رہاتھا۔ ہم دونوں بس میں سوار ہونے والے آخری مسافر تھے۔

جونہی بس میں چڑھے ، دروازہ بند ہوا اور بس چل پڑی۔ اس ہڑبونگ میں بھی ہمیں محسوس ہوا کہ اس مسافر کے سوار ہوتے ہی بس کے سب مسافروں نے اسے گردن گھما کے دیکھا ہے۔ زیادہ تر مسافر ایشیائی تھے۔ ہمارے آگے چلنے والا مسافر ہمارے سامنے کھڑا تھا اور اب اس کا رخ ہماری طرف تھا۔ ایک ہاتھ سے سامان سنبھالتے اور دوسرے ہاتھ سے بس کے ہینڈل کا سہارا لیتے جونہی ہماری نظر اس کے چہرے کی طرف اٹھی، بے ساخته طور پہ ہمارے منہ سے چیخ نکل گئی اور ہمارا بیگ ہاتھ سے گر پڑا۔

فلم دیکھنے کا مرض ہمیں بہت بچپن سے لاحق ہوا۔ گھر میں سینما جانے کا رواج تو نہیں تھا لیکن ٹی وی پہ ہر اتوار کی صبح دکھائی جانے والی فلم کو دیکھنے کے صف اول کےامیدوار ہم ہی ہوتے۔ یوں اس زمانے میں ٹی وی پہ دکھائی جانے والی کوئی فلم بھی ہماری نظر سے نہ بچی۔ ان دنوں انڈین فلم وی سی آر پہ دیکھی جاتی تھی۔ کچھ گھنٹوں کے لئے وی سی آر کراۓ پہ لایا جاتا اور دو یا تین فلمیں اکٹھی دیکھ لی جاتیں۔ ہمارے گھر تو یہ ناممکنات میں سے تھا لیکن محلے میں کئی سہیلیوں کے گھر پر مہینے میں ایک بار اس شو کا اہتمام ضرور کیا جاتا۔

ہماری شوقین مزاجی کسی سے ڈھکی چھپی ہوئی نہیں تھی، سو ادھر انتظام ہوتا اُدھر بلاوہ آ جاتا۔ اماں ابا کے ماتھے کے بل کچھ گہرے ہو جاتے لیکن ہمارے مزاج شناس بھی تھے سو کچھ نہ کہتے۔

اس دور کی ریاضت کا ثمر ہے کہ اداکاروں کےمکالمے ہوں یا کرداروں کے نام، ذہن سے محو ہوتے ہی نہیں۔ آپریشن تھیٹر میں ہماری پشپا نامی نرس جھینپ جاتی ہے جب ہم راجیش کھنہ کے انداز میں اسے کہتے ہیں "پشپا”۔ کبھی آپریشن کے دوران بسنت نامی نرس کو بسنتی کہتے ہوئے اوزار طلب کرتے ہیں اور کبھی “میں اور میری تنہائی” کا ورد شروع کر دیتے ہیں۔ ہمارے انڈین ساتھی گزرے برسوں کے انڈین سنیما کے متعلق ہماری یادداشت پہ خوب حیران ہوتے ہیں۔

حیرت سے ہم گنگ تھے کہ کیا سامنے کھڑا شخص حقیقت تھا یا واہمہ؟

” کیا آپ امیتابھ بچن ہیں؟ شعلے، زنجیر اور سلسلہ والے امیتابھ؟”

ہم نے ہکلاتے ہوۓ پوچھا؛

وہ ہماری حماقت پہ مسکرایا اور سر اثبات میں ہلا دیا، شاید یہ سوچتے ہوئے کہ ان کھسکی ہوئی خاتون کو کوئی بتلائے کہ ہم بتلائیں کیا۔

جانتے ہوۓ کہ وقت کم ہے، ہم نے اگلے دو منٹ میں کچھ شرماتے، کچھ ہکلاتے امیتابھ بچن کو اپنی کیس ہسٹری سناتے ہوئے بتا دیا کہ کیسے اس کی ساری فلمیں ہمیں ازبر ہیں، پاکستان میں اسے کتنا پسند کیا جاتا ہے، اس کی اداکاری وقت کے ساتھ ساتھ کیسے بدلی ہے، اور ہمارے بیٹے حیدر کو اس کی فلم ”پا” کتنی پسند ہے۔

وہ بہت متانت اور سکون سے ہمارے ہر جملے کے بعد شکریہ کہتا اور سر ہلا دیتا۔

” مجھے آپ کے ساتھ تصویر کھنچوانی ہے اور آٹوگراف بھی“

”ضرور“

سیلفی کا زمانہ نہیں تھا اور مشکل یہ تھی کہ ہمارے زنبیل نما بیگ میں کیمرہ خدا جانے کہاں دفن تھا کہ چلتی بس میں مل کے ہی نہ دیتا تھا۔ ہم باتوں کے ساتھ ساتھ بیگ ٹٹولنے میں بری طرح مشغول تھے کہ بس رک گئی۔ جہاز کی سیڑھی سامنے تھی، مسافروں نے بس سے اتر کے جہاز پہ سوار ہونا شروع کردیا اور کیمرہ ابھی بھی ہاتھ میں نہیں آیا تھا۔

امیتابھ نے ہماری روہانسی شکل دیکھ کے تسلی دیتے ہوئے کہا، کوئی بات نہیں آپ جہاز میں تصویر کھنچوا لیجیے گا۔

ایک بات جو ہم دونوں کو یاد نہ رہی کہ امیتابھ بزنس کلاس کے مسافر تھے اور ہم اکانومی کے۔ اس مشکل کا ادراک تو جہاز میں بیٹھ کے ہوا، جب برطانوی ائر ہوسٹس نے ہمیں بزنس کلاس کا رخ کرنے سے روک دیا۔ اب ہم خود کو کوسے چلے جارہے ہیں کہ کاش کیمرہ گلے میں لٹکا لیا ہوتا تو یوں بام تک پہنچی کمند کو دیکھ کے آہیں نہ بھر رہے ہوتے۔

ہم بھی کہاں ہمت ہارنے والے تھے، آخر محلے میں ماہانہ وی سی آر کی محفلوں کے تربیت یافتہ تھے۔ ہم نے ائر ہوسٹس سے کہا کہ وہ بگ بی تک ہمارا پیغام پہنچا دے کہ ہم کیمرہ ڈھونڈھ چکے ہیں اور اب منتظر ہیں۔ بگ بی کو بھی اپنے وعدے کا لحاظ تھا سو تھوڑی ہی دیر میں ہم اگلے کیبن میں پہنچ چکے تھے جہاں ہمیں ڈاکٹر کاظمی کے نام سے آٹو گراف بھی ملا اور تصویر بھی کھنچی۔

آنے والے دنوں میں یہ داستان ہمارے انڈین ساتھیوں کو بہت بھائی اور ہم ہسپتال میں بگ بی فیم کے نام سے مشہور ہوئے۔ ہم سے بار بار سنا گیا کہ امیتابھ بات کرنے میں کیسے تھے ؟

کچھ لوگوں کو ہمارا پرجوش رویہ بچگانہ لگا لیکن ہم تو ایک ہی بات جانتے تھے کہ ہمارے بچپنے کی بسائی ہوئی دنیا جن یادوں کے گرد گھومتی ہے اس کا ایک اہم کردار اور ہماری زندگی کے کچھ لمحات ایک دوسرے سے ٹکرا گئے تھے۔ اور اسی بہانے ہم نے ان گزرے برسوں میں جھانک کے اس کم عمر ، الہڑ اور زندگی سے بھرپور لڑکی کو دوبارہ سے دیکھ لیا تھا جو فلم اور کتاب کی رسیا تھی اور لطف لینے کا کوئی موقع ہاتھ سے جانے نہیں دیتی تھی۔

ہمارا کہنا یہ ہے کہ اگر ایسا موقع کبھی آپ کو بھی میسر ہو تو زندگی کے موجودہ مقام اور حیثیت سے شرمائیے گا نہیں۔ لمحہ موجود سے کچھ دقیقے چرا کے گزرے ہوئے زمانے میں قدم ضرور رکھیے گا۔ یقین کیجیے آنے والا وقت سہل ہو جائے گا جب ماضی کے جھروکوں سے یادوں کی بارات اترے گی اور ایک دبی دبی سی مسکان تھکن زدہ چہرے کو زندگی بخشے گی۔

—♦—

The post دیکھا ایک خواب … امیتابھ سے ایک ملاقات! — ڈاکٹر طاہرہ کاظمی first appeared on Daily Lalkaar.